Okuti Ukahi Nokulinga Atyiho Uvila Opo Ulongeswe na Jeova?
1. Oñgeni Jeova elitehelela konthele yokulongesa?
1 Jeova ‘Omulongesi wetu Omunene,’ uhanda tukale ovanthu valongoka. (Isa 30:20) Oe wahimbika okulongesa etyi atunga Omona wae wotete. (João 8:28) Konyima youmphuki wa Andau, Jeova kayekelepo okulongesa, anthi noluembia walinga epongiyo opo alongese ovanthu ovakuankhali.—Isa. 48:17, 18; 2 Tim. 3:14, 15.
2. Ovilinga patyi viokulongesa vikahi nokulingwa hono?
2 Hono, Jeova ukahi nokuhongolela ovilinga ovinene viokulongesa, vikahi nokulingwa ouye auho. Ngetyi Isaia aula, ovanthu ovanyingi mouye auho vekahi ngatyina velikongololela “komphunda yondyuo ya Jeova.” (Isa 2:2) Omokonda yatyi vailako? Opo valongeswe onondyila mba Huku, enga opo valongeswe na Jeova! (Isa 2:3) Menima lio 2010, Onombangi mba Jeova vaundapa onoola mbulamba po 1,6 yo nombiliau, okuava oumbangi nokulongesa ovanthu otyili tyo Mbimbiliya. Tupu, kese simano velilongesa Ondaka ya Huku mo mawaneno alamba po 105.000 ouye auho. Omupika Wekolelo no Kualunguka ukahi nokulinga omikanda viokulongesa otyili momalaka alamba po 500.
3. Oñgeni ukahi nokupola ouwa kelongeso Jeova ava?
3 Linga Ononkhono Mbokupolako Ouwa: Tukahi nokupola ouwa omunene ngatyi kelongeso lia Huku! Tuanoñgonoka okuti Huku una enyina, nesuko nonthue. (Sal. 83:18; 1 Ped. 5:6, 7) Tuanoñgonoka omakumbululo omapulo amwe akolela unene momuenyo, ngaa: Oityi ovanthu vamonena ononkhumbi, nokunkhia? Oñgeni ndyipondola okukala nehambu liotyotyili? Huku walinga ovanthu pala tyi? Tupu Jeova utuavela ehongolelo litukuatesako ‘okuendela nawa monondyila mbae.’—Jos. 1:8.
4. Onomphitilo patyi mbumwe mbokulongeswa ovaumbili va Huku vena? Oityi tuesukisila okulinga atyiho tuvila opo tulongeswe na Jeova?
4 Tupu, Jeova wava elongeso liavilapo, opo akuateseko ovaumbili vae ovinyingi okuyawisa ovilinga viokuivisa. Pomafo 4-6 pahonekwa onosikola mbumwe mbulingwa meongano. Pamwe onkhalelo yetu yomuenyo kaitavela okupita monosikola ombo. Okuti tulinga ononkhono mbokupola ouwa kelongeso aliho Huku aava litavela monkhalelo yetu yomuenyo? Ovakuendye novahikuena vamwe vahongiliyua novalongesi navakuavo opo vaovole okulongeswa monosikola ononene mbouye. Okuti onthue tuveavela ondundo opo vaovole okupita monosikola mbavilapo vali Jeova aava? Okulinga atyiho tuvila opo tulongeswe na Jeova, matyitukuatesako okukala nehambu momuenyo pahetyino, nomuenyo uhapu komutwe.—Sal. 119:105; João 17:3.
Osikola Yokulongesa Okutanga Nokuhoneka
• Yaonganekelwa Tyi: O pala okulongesa ovanthu okutanga nokuhoneka, opo vetyivile okutanga nokulilongesa Ombimbiliya yavo, nokulongesa vakuavo otyili.
• Ilingwa Momuvo Ulifuepi: Tyina ovanthu valongoka.
• Opi Ilingilwa: O Mondyuo Yomaliongiyo yo potyilongo.
• Ovalie Vapita Mosikola Oyo: Ovaivisi aveho novanthu vahanda.
• Oñgeni Velihonekesa Mo: Ovakulu vewaneno vaonganeka osikola oyo, okutala momasuka-suka ewaneno, iya avaavela ondundo aveho vesukisa opo velihonekese.
Osikola Yovilinga via Huku
• Yaonganekelwa Tyi: O pala okulongesa ovaivisi vakale nounongo wokuivisa nokulongesa onondaka onongwa.
• Ilingwa Momuvo Ulifuepi: Itualako.
• Opi Ilingilwa: O Mondyuo Yomaliongiyo yo potyilongo.
• Ovalie Velihonekesa Mo: Ovaivisi aveho. Tupu, na vana veliongiya apeho newaneno, vetavela omalongeso Ombimbiliya, nokutyinda omuenyo welikuata novitumino vio Vakristau.
• Oñgeni Molihonekesa Mo: Popia nomukulu wewaneno wendesa Osikola Yovilinga via Huku.
Osikola Yokulongesa Omalaka Omakuavo
• Yaonganekelwa Tyi: O pala okulongesa ovaivisi oñgeni mavaivisa onondaka onongwa melaka ekuavo.
• Ilingwa Momuvo Ulifuepi: Onohanyi ononkhuana ine ononthano. Haunene ilingwa mo Tyasapalo komuhuka moola ike ine onombali.
• Opi Ilingilwa: Haunene ilingilwa Mondyuo Yomaliongiyo ikahi popepi.
• Ovalie Velihonekesa Mo: Ovaivisi vena ovituwa oviwa, vahanda okuivisa melaka lio kondye.
• Oñgeni Velihonekesa Mo: Onosikola ombo mbuonganekwa nombetele okutala komasuka-suka otyilongo.
Ovilinga Viokutunga Onondyuo mbo Maliongiyo
• Viaonganekelwa Tyi: O pala okutunga nokupindulapo Onondyuo mbo Maliongiyo. Ovilinga ovio ha sikola ko, mahi vokuelipakula okuundapa mo, valongeswa omaunongo omanyingi opo vakuateseko okutunga Onondyuo mbo Maliongiyo.
• Vilingwa Momuvo Ulifuepi: Tyitei konkhalelo ya una welipakula okuundapamo.
• Opi Vilingilwa: Kese pana vatumwa no Komisau yo Vokutunga Onondyuo mbo Maliongiyo. Vamwe vaundapamo, vehole okukongwa opo vakakuateseko okuundapa kovilongo kuaenda oviponga.
• Ovalie Velihonekesa Mo: Ovakuatate no nomphange vambatisalwa vetavelwa novakulu vewaneno, vetyivila okutunga na vana vehetyivili.
• Oñgeni Velihonekesa Mo: Vahoneka omukanda Petição para o Serviço Voluntário em Construções de Salões do Reino (S-82) vapewa novakulu vewaneno liavo.
Osikola Yovilinga Vioukokoli-ndyila
• Yaonganekelwa Tyi: O pala okukuatesako ovakokoli-ndyila opo ‘vetyivile okulinga nawa ovilinga viavo viokuivisa.’—2 Tim. 4:5.
• Ilingwa Momuvo Ulifuepi: Onosimano onombali.
• Opi Ilingilwa: Ombetele iholovona omphangu. Haunene ilingilwa Mondyuo Yomaliongiyo ikahi popepi.
• Ovalie Velihonekesa Mo: O vokukahiale movilinga vioukokoli-ndyila enima like okuenda no komutwe.
• Oñgeni Velihonekesa Mo: Ovakokoli-ndyila vatokala osikola oyo, vaholovonwa nomutalelipo womauaneno.
Osikola Yovape mo Mbetele
• Yaonganekelwa Tyi: Osikola oyo, ikuatesako ovape vanyingila pahe, opo ovilinga viavo vio Mbetele viende nawa.
• Ilingwa Momuvo Ulifuepi: Oola ike kese simano mokueenda kuo nosimano 16.
• Opi Ilingilwa: Omo Mbetele.
• Ovalie Velihonekesa Mo: Ovava vahanda okutualako okukala mombunga Yombetele ine vahanda okuundapa mo (vala enima ine omanima amwe).
• Oñgeni Velihonekesa: Vana vatokala okupita mosikola oyo vaholovonwa no Mbetele.
Osikola Yovilinga Viouhamba
• Yaonganekelwa Tyi: O pala okulongesa ovakulu vomawaneno novakuatesiko vavo, opo vafuisepo ovilinga viavo vena meongano. (Atos 20:28) Osikola oyo ilingwa momanima Ononkhalamutwe mbo Nombangi mba Jeova vatokola.
• Ilingwa Momuvo Ulifuepi: Momanima okualamba, yovakulu vewaneno ihole okulingwa onthiki ike nomeya iya yovakuatesiko vavo ilingwa onthiki ike.
• Opi Ilingilwa: Haunene ihole okulingilwa Mondyuo Yomaliongiyo ikahi popepi ine o Mondyuo Yovionge.
• Ovalie Velihonekesa Mo: Ovakulu vewaneno ine ovakuatesiko vovakulu vewaneno.
• Oñgeni Velihonekesa: Ovakulu vewaneno novakuatesiko vavo vapita mosikola oyo, vakongwa nomutalelipo weuaneno.
Osikola Yovakulu Vewaneno*
• Yaonganekelwa Tyi: O pala okukuatesako ovakulu vewaneno opo vetyivile okulinga nawa ovilinga viavo mewaneno.
• Ilingwa Momuvo Ulifuepi: Ononthiki ononthano.
• Opi Ilingilwa: Ombetele iholovona omphangu. Haunene ihole okulingilwa Mondyuo Yomaliongiyo ikahi popepi ine o Mondyuo Yovionge.
• Ovalie Velihonekesa Mo: Ovakulu vewaneno.
• Oñgeni Velihonekesa: Ovakulu vewaneno vapita mosikola oyo, vakongwa nombetele.
Osikola Yovatalelipo Vomawaneno Novakai Vavo*
• Yaonganekelwa Tyi: Opo ovatalelipo womawaneno novakulu vo distritu vakale vali nounongo wokukuatesako omawaneno ‘nokuundapa nombili onene okuivisa nokulongesa’ nokunthita nawa vana vatumwa okuyunga.—1 Tim. 5:17; 1 Ped. 5:2, 3.
• Ilingwa Momuvo Ulifuepi: Onohanyi onombali.
• Opi Ilingilwa: Ombetele iholovona omphangu.
• Ovalie Velihonekesa Mo: Ovatalelipo womawaneno novakulu vo distritu.
• Oñgeni Velihonekesa: Ovatalelipo vewaneno novakai vavo vapita mosikola oyo, vakongwa nombetele.
Osikola Yombimbiliya yo Vakuatate Vahanepele*
• Yaonganekelwa Tyi: O pala okukuatesako ovakulu vewaneno novakuatesiko vavo vehenenepe, pala ovilinga ovikuavo mewaneno. Ovanyingi vapita mosikola oyo, vatumwa okukaundapa kuna kuesukisa motyilongo tyavo. Vehehi pamwe vatumwa okukaundapa kotyilongo otyikuavo, inkha ovo muene vahanda.
• Ilingwa Momuvo Ulifuepi: Onohanyi onombali.
• Opi Ilingilwa: Ombetele iholovona omphangu. Haunene ihole okulingilwa Mondyuo Yomaliongiyo ikahi popepi ine o Mondyuo Yovionge.
• Ovalie Velihonekesa Mo: Ovakuatate vahanepele, vokuna omanima 23 alo 62, vakongoka, vahanda okuundapela ovakuatate, novilinga Viouhamba wa Huku kuna kuesukisa. (Mar. 10:29, 30) Ovakuatate ovo, ovakulu veuaneno ine ovakuatesiko vavo vaundapale omanima evali tyihatalama.
• Oñgeni Velihonekesa: Inkha motyilongo tyenyi mulingwa osikola oyo, eliongiyo lia vana vahanda okulihonekesa mo, lilingwa motyonge tyononthiki onombali. Atyiho tyesukisa tyipopiwa meliongiyo olio.
Osikola Yombimbiliya yo Vakristau Ovalinepi*
• Yaonganekelwa Tyi: Yavela ovalinepi elongeso liavilapo opo vaundapeswe vali nawa na Jeova neongano liae. Ovanyingi vapita mosikola oyo, vatumwa okukaundapa kuna kuesukisa motyilongo tyavo. Vehehi pamwe vatumwa okukaundapa kotyilongo otyikuavo, inkha ovo muene vahanda.
• Ilingwa Momuvo Ulifuepi: Onohanyi onombali.
• Opi Ilingilwa: Onosikola mbehehi mbotete mbalingilwa ko Centro Educacional da Torre de Vigia ko Patterson, Nova York, EUA. Kononthiki mbo komutwe, maikalingailwa ponomphangu mambuholovonwa nombetele, haunene ilingilwa Mondyuo Yomaliongiyo ine o Mondyuo Yovionge.
• Ovalie Velihonekesa Mo: Ovalinepi vokuna omanima 25 alo 50 vakongoka nawa, vena onkhalelo yomuenyo itavela okukaundapa kuna kuesukisa, nokuna otyituwa tyokuti: “Ame uno! Nthume.” (Isa. 6:8) Tupu ovalinepi ovo, o vokuelinepale omanima evali, nokukahi movilinga viomuwo auho omanima evali tyihatalama.
• Oñgeni Velihonekesa: Inkha motyilongo tyenyi mulingwa osikola oyo, eliongiyo lia vana vahanda okulihonekesa mo, lilingwa motyonge tyonthiki ike. Atyiho tyesukisa tyipopiwa meliongiyo olio.
Osikola Yombimbiliya yo Gileade
• Yaonganekelwa Tyi: O pala okulongesa ovakokoli-ndyila novakuavo vaundapa vomuvo auho, pala ovilinga vioumisionaliu.
• Ilingwa Momuvo Ulifuepi: Onohanyi ononthano.
• Opi Ilingilwa: Omo Centro Educacional da Torre de Vigia ko Patterson, Nova York, EUA.
• Ovalie Velihonekesa Mo: Ovalinepi vena omanima etatu ombatisimu, nomanima 21 alo 38 pokuelihonekesa otyikando tyotete. Ovakuatate ovo, ovokutyivila okupopia o Ingelesi, velinepale omanima evali okuenda no komutwe, no kunale omanima evali movilinga viomuvo auho tyihatalama. Tupu, vena okukala nekongoko ewa. Ovakokoli-ndyila vaundapa kovilongo vo kondye (na vana vaundapa ngo nomisionaliu), novakulu ovatalelipo womauaneno, no vombunga Yombetele, na vana vapita Mosikola Yovilinga Viokuivisa, no Mosikola Yombimbiliya yo Vakuatate Vahanepele, no Mosikola Yombimbiliya Yovalinepi, navo vapondola okulihonekesa mo inkha vena onkhalelo yelikuata netyi tyaitwa.
• Oñgeni Velihonekesa: Mono filiyale mbaholovonwa, eliongiyo pala vana vesuka nosikola oyo, lilingwa motyionge tyononthiki ononthatu. Atyiho tyesukisa tyipopiwa meliongiyo olio. Inkha movionge vio motyilongo tyove kamualingilwe eliongiyo olio, iya ove uhanda okulihonekesa mo, upondola okuhonekela ko filiyale yenyi.
Osikola Yovakulu Vokomisau yo Filiyale Novakai Vavo
• Yaonganekelwa Tyi: O pala okukuatesako vana vaundapa mo Nokomisau mbono Filiyale, opo vaendese nawa ovilinga viavo viokuhongolela ovilinga mo no Mbetele, no vio mawaneno, no viovatalelipo womauaneno, no viono distritu mo notelitoliu mbavo. Tupu tyivekuatesako okuendesa nawa ovilinga viokupitiya, nokulinga omikanda, nokuviavununa, novilinga vio noseketa ononkhuavo vali.—Luc. 12:48b.
• Ilingwa Momuvo Ulifuepi: Onohanyi onombali.
• Opi Ilingilwa: Omo Centro Educacional da Torre de Vigia ko Patterson, Nova York, EUA.
• Ovalie Velihonekesa Mo: Ovakulu vo Komisau yo Filiyale vala ine ovo Komisau Yotyilongo ine vana mavapewa otyilinga otyo.
• Oñgeni Velihonekesa Ovakuatate vapita mosikola oyo novakai vavo, vakongwa no Nonkhalamutwe mbo Nombangi mba Jeova.
[Ehangununo liolutalatu pefo 4]
Onosikola Mbumwe Mbulingwa Neongano lia Jeova
[Ehangununo liolutalatu pefo 6]
* Osikola ei, nkhele kaikahi nokulingwa movilongo aviho.