Ivisa Nonthumbi Motelitoliu Yonovenda
1. Omokonda yatyi katusukisila okusoya inkha tuna owoma wokuivisa potelitoliu yonovenda?
1 Okuti una owoma wokuivisa potelitoliu yonovenda? Inkha una owoma, uhasoye, alo umwe Paulu, omuivisi ankho wokuakola omutima nokuhena owoma, wesukisile ‘okupamekwa’ opo aivise. (1 Tes. 2:2) Pombuelo matupopi konthele yovitateka tuhole okuvasa, no nondonga mbutukuatesako okuvifinda.
2. Omokonda yatyi tuhakalela notyiho tyokuti matunumanesa vana vaundapa monovenda?
2 Okuti Motalameka Ovaundapi Atyivenumanesa? Ovaundapi ovanyingi monovenda, vena otyilinga tyokukuatesako ovanthu valanda, iya vakevelela okutalamekwa movilinga viavo. Ovikando ovinyingi mavalekesa ehumbilo, mokonda mavekutale ngatyina noove weya okulanda. Mokonda wavala monkhalelo yaviuka, nokuapoleya nokupopia nohole, movepe ondundo yokukuhumba.
3. Oñgeni matulityilika okunumanesa vokueya okulanda?
3 Okuti Ndyina Okupopia Navo Tyina Pena Ovanthu Veya Okulanda? Inkha tyitavela, holovona omuvo una onovenda nkhele mbuheneyule ovanthu, ngo putyina vaikula. Okevelela alo tyina omuundapi ekahi aike, oendepo. Popia nae tyihasete.
4. Oityi matupopi tyina tuundapa potelitoliu yonovenda?
4 Oityi Mandyipopi? Popia na una utumina movenda, opo unoñgonoke inkha muna ovaundapi ovanyingi. Upondola okupopia okuti: “Haunene ovanthu vokulandesa kavavasiwa peumbo, otyo tueila okupopia nove povilinga viove. Ndyityii okuti ukahi nokuundapa, mandyipopi tyihasete.” Opo ovalandesi vahasoke okuti nonthue tukahi nokulandesa, otyiwa okuheveiti onombongo tyina tuvepa omikanda. Tuvepopila vala inkha vetupula opi tupola onombongo opo ovilinga vietu viokuivisa vitualeko. Tyitei kuetyi valandesa, opo wiite ku una utumina movenda ekuyeke okupopia tyihasete novaundapi. Vepopila elekeso wapongiya. Inkha omuundapi una ovilinga ovinyingi, popia liwa-liwa omusila otratadu. Inkha katyitavela okupopia novaundapi, hamwe moyekwa okuvesila omikanda mondyuo vapululukilwa, ine opomphangu onkhuavo.
5. Omahunga patyi tuna okuivisa nonthumbi potelitoliu yonovenda?
5 Jesus na Paulu, ankho vapopia nonthumbi novanthu pana vaundapa, iya noove upondola okutyilinga. (Mat. 4:18-21; 9:9; Atos 17:17) Ita ku Jeova ekukuateseko okutula omutima nokukala tyihena owoma. (Atos 4:29) Otelitoliu yonovenda, apeho muvasiwa ovanthu, ngotyo, oityi uhahetekelela onkhalelo oyo yokuivisa?