Omahuviso Ovipuka Huku Aetako Alekesa Enkhimano Liae
Ovanthu ovanyingi vahambukwa okutala ovipuka Huku aetako. Mahi kavehi vaimbuka okuti ovipuka ovio vilekesa omalusoke Omupakeko Omunene, nonkhalelo elitehelela. (Rom. 1:20) Kohale, David welilongesile konthele ya Jeova Mondaka Yae ahonekesa. Mahi, tupu “wemumuene” kovipuka aetako, iya afuene Kwe. (Sal. 8:3, 4) Ovideo yokuna osapi yati As Maravilhas da Criação Revelam a Glória de Deus, itukuatesako, novana vetu, novalongwa Vombimbiliya, okutala nawa ovipuka vimwe Jeova aetako, nokutala ovituwa nonkhalelo Yomupakeko wetu Omunene. Iya otyo tyitufueneka vali kwe. Tyina wamatale ovideo oyo, kumbulula omapulo maalandulako.
(1) Oñgeni ounene wouye neonganeko liao, vitulunda okupanda vali Jeova? (Isa. 40:26) (2) Tyina tutalela nawa popepi omeva, oityi etulongesa konthele ya Huku? (Rev. 14:7) (3) Ounene woohi nokukahi kuayo popepi nekumbi, oñgeni vilekesa ounongo wa Jeova? (4) Ohanyi ina otyilinga patyi? (Sal. 89:37) (5) Oñgeni Jeova alinga ovanthu opo vakale nehambu momuenyo? (6) O DNA oityi? (Sal. 139:16) (7) Oñgeni ovanthu velikalela kovipuka aviho Jeova alinga kombanda yoohi? (Gên. 1:26) (8) Oityi ukevelela mouye omupe?
Omapulo Omakuavo: (9) Opi kuatuka ovivala? (10) Oñgeni omeva etyivila okuenda alo komafo omiti? (11) Otyilinga patyi omeva alinga momalutu etu? (12) Popia onongeleka mbulekesa oupanga ukahi pokati kovipuka viokuna omuenyo. (13) Oñgeni ovipuka viokuna omuenyo vivila okulinga oupanga novikuavo? (14) Onkhalelo omiti novikuna aviho vikula ilekesa tyi konthele ya Huku?
“Tala Nawa” Ovilinga via Jeova: Jesus utuavela ondundo ‘yokutala nawa oviila viomeulu’ ‘nokulilongesila kononthemo mbomofika.’ (Mat. 6:26, 28) Okulinga ngotyo, matyipameka ekolelo lietu, nokuyumba onthumbi mo Mupakeko wetu, nokutukuatesako okupanda ounongo wa Jeova, nepondolo liae liokuyovola, noluembia lwae. Tulityilikei okutalukwa novilinga viouye uno. Tuovolei omuvo nokulinga ononkhono mbokutala omahuviso ovipuka Jeova alinga, nokusokolola nawa kuetyi vitulongesa konthele ya Huku yetu.—Sal. 19:1.