Kuna Omahunga Ekwi na Evali pala Okuivisa

Omokonda yatyi tuesukisila okuivisa nokulongesa onondaka onongwa? Okuti tuivisa pala okukuatesako ovanthu vomutima omukuatyili, opo vanyingile mondyila yomuenyo? (Mat. 7:14) Olio, olio ehunga liotete pomutete ukahi pombuelo, mahi halioko ehunga liotete tuivisila. Pomahunga 12 maalandulako, olipi usoka okuti olio liakolela vali unene tuivisila?

1. Okuivisa tyikuatesako okuyovola omienyo.—João 17:3.

2. Tuivisa pala okulondola onondingavivi.—Eze. 3:18, 19.

3. Okuivisa tyikuatesako okufuisapo omaulo Ombimbiliya.—Mat. 24:14.

4. Okuivisa tyilekesa ouviuki wa Huku. Nawike upondola okupopia okuti Jeova kaavelele onondingavivi omuwo opo velivele, etyi ehenevehanyeko.—Atos 17:30, 31; 1 Tim. 2:3, 4.

5. Okuivisa tyitupola mongele yokukuatesako ovanthu valandwa nohonde ya Jesus, opo vakale noupanga na Huku.—Rom. 1:14, 15.

6. Okuivisa tyitukuatesako okulityilika onkhali yohonde.—Atos 20:26, 27.

7. Tuivisa pala eyovo lietu muene.—Eze. 3:19; Rom. 10:9, 10.

8. Okuivisa tyilekesa okuti tuna ohole navakuetu.—Mat. 22:39.

9. Okuivisa tyilekesa okuti tutavela ku Jeova no ko Mona wae.—Mat. 28:19, 20.

10. Okuivisa onthele yefendelo lietu.—Heb. 13:15.

11. Okuivisa tyilekesa okuti tuhole Huku.—1 João 5:3.

12. Okuivisa tyikuatesako okusukukisa enyina lia Jeova.—Isa. 43:10-12; Mat. 6:9.

Tyotyili, omahunga oo haoko vala etuundapesa movilinga viokuivisa. Mongeleka, okuivisa tyipameka ekolelo lietu nokutuavela omphitilo yavilapo yokuundapa na Huku. (1 Cor. 3:9) Mahi, etyi tyakolela vali unene tuundapela movilinga viokuivisa, ehunga 12. Tyilinge ovanthu vetavela ine kavetavela, ovilinga viokuivisa vikuatesako okusukukisa enyina lia Huku, nokuavela Jeova omphitilo yokukumbulula una umulinga omukuele. (Pro. 27:11) Tyotyili, tuna omahunga ‘okutualako okulongesa nokuivisa onondaka onongwa tyihatepuluka.’—Atos 5:42.