Uhelikondole—Mokonda Yovilinga Ovinyingi
1. Omokonda yatyi vamwe velityilika okulongesa ovanthu Ombimbiliya?
1 Vamwe velityilika okulongesa ovanthu Ombimbiliya mokonda vena ovilinga ovinyingi. Okulongesa omunthu Ombimbiliya tyesukisa omuvo. Tyesukisa omuvo wokulifuiika, nokumulongesa, nokumukuatesako okufinda ovitateka. Apostolu Paulu wati ankho waava omuenyo wae opo akuatesako vana veya okunoñgonoka Jeova mo Tesalonika. (1 Tes. 2:7, 8) Oñgeni tupondola okulongesa omunthu Ombimbiliya alo umwe tyina tuna ovilinga ovinyingi?
2. Oñgeni ohole na Jeova itukuatesako okuundapesa nawa omuvo wetu?
2 Okufenda Tyesukisa Omuvo: Otyili okufenda tyesukisa omuvo. Mongeleka, tyesukisa omuvo wokuenda komaliongiyo, nomovilinga viokuivisa, nokutanga Ombimbiliya nokulikuambela. Vana vanepa vataindya omuvo wokukala nauna velinepa nae. Tupu nonthwe tuna okulinga ononkhono “mbokulanda” omuvo opo tufende Jeova mokonda tumuhole. (Efé. 5:15-17; 1 João 5:3) Ngetyi tyapopia Jesus, okulinga ovalongwa tyesukisa mokonda tyilinga onthele mefendelo lietu. (Mat. 28:19, 20) Okusokolola kuotyo tyitukuatesako okuhelikondola okutavela otyilinga tyokulongesa ovanthu Ombimbiliya.
3. Oñgeni tupondola okulongesa ovanthu Ombimbiliya alo umwe tyina pena tyimwe tyitateka omuwo wetu wokuivisa?
3 Mahi inkha omuwo wetu unyonwa novilinga, ine tuna ovitateka viekongoko ine ovilinga mewaneno? Ovaivisi vamwe valongesa ovanthu Ombimbiliya okupopila mo telefone ine okomputadole. Vana vena ovitateka viekongoko pamwe vaita ovalongwa veye meumbo liavo opo valilongese. Vamwe tupu vataindya omuivisi makalongesa omunthu tyina ovo vehepo.
4. Ouwa patyi tuvasa tyina tulongesa ovanthu Ombimbiliya?
4 Paulu ankho uhambukilwa okumanena omuwo wae nononkhono mokukuatesako ovanthu okunoñgonoka otyili. (Atos 20:35) Tyina atala ovilinga viae viaenda nawa mo Tesalonika, tyemulundile okupandula Jeova. (1 Tes. 1:2) Ehambu lietu maliliyawisa movilinga viokuivisa inkha katuyeke ovilinga vietu vitutyilike okulongesa ovanthu Ombimbiliya.