Etyi Matyikukwatesako Ulilongese Apeho
OKUTI pamwe tyikupwiya okulilongesa Ombimbiliya mwene awike onosimanu ambuho? Okuti tyina uti pokulilongesa pamwe kuhambukwa-le? Atuho pamwe otyo umwe tukala ngootyo. Mahi soka kovipuka tuna okulinga ononthiki ambuho, ngeetyi okulikoha. Omunthu pala ulikohe una okulikwatehila, una umwe okutyitaindyila omuvo watyo, mahi tyina wamelikoho, olutu lukala nawa! Okulilongesa Ombimbiliya natyo tyikalesa nawa, ukala umwe ngeetyi olutu lukala nawa tyina wamelikoho. (Efe. 5:26) Tala ovipuka vimwe vipondola okukukwatesako.
Panga etyi molingi mosimanu. Okulilongesa Ombimbiliya mwene awike otyimwe povipuka “viesukisa vali” ovanthu va Huku vena okulinga. Naina twehetyilingei omusenyo. (Fili. 1:10) Opo utyivile okulinga etyi wapanga, honeka pokamukanda onthiki noola molilongaisa, okemate apa utala ononthiki ambuho. Tupu upondola okupaka o alarme kotelefone yove opo ikuhinangelese tyina oola yokukelilongesa ili nokuhika-po.
Linga etyi matyikukwatesako wahatalukwe. Ove otyityi tyikupepukila vali? Utyivila okukala oola nokulilongesa? Ine hahe vali okulilongesa vala omuvo wehehi? Ove ulii nawa, etyi tyikahi vali nawa kwoove utyii. Naina, tyina upanga etyi molilongesa, soka kweetyi matyikupepukila. Ine uti tyina oola wapangele okulilongesa ihika-po, ove ulitehela ñgaa kwahandele okulilongesa, upondola okulilongesa vala onominutu 10. Okulilongesa onominutu 10 hahe vali, tyipona okwehelilongesa umwe natyike. Ya pamwe tyilinga ovipuka, moti vala himbikee, ukatehela pahe komutima tyeya-ko umwe. — Fili. 2:13.
Koya etyi haa molilongesa. Ine upumphama ulilongese, mahi etyi molilongesa kunetyisoke, opo kumetyivili okulinga etyi ‘tyitiwa otyetyi momuvo una-o.’ (Efe. 5:16) Tyimwe upondola okulinga, okuhoneka ononthele, novipuka wahanda okulilongesa. Ine una otyipuka ulipula wahanoñgonoka nawa, natyo tyihoneka haa ulilongese-tyo. Tyina wamamane etyi ankho wapanga okulilongesa, tyipondola momutwe mamuya vali ovikwavo haa upondola okulilongesa.
Ine pena etyi una okupilulula, tyipilulula umwe. Pokupanga etyi molilongaisa, nomuvo molilongaisa, tala umwe etyi movili. Etyi tyihandwa apa hakuti, onalupi molilongesa, omuvo ulifwe-pi molilongesa, neetyi molilongesa, mahi tyihandwa okulilongesa apeho.
Ine tulilongesa umwe onosimanu ambuho, matumono oviwa. Matukala noupanga omuwa na Siovaa, matulilongo okulinga ovipuka nonondunge, matukala tyapama. — Susu. 1:8.