Lifwiika Pala Ehinangelo Nomutima Wahambukwa
1. Ehinangelo lituavela omphitilo yokulinga tyi?
1 Ehinangelo malilingwa Muvali 26 ya Tyitalale, malituavela onomphitilo onongwa mbokuhambukiswa Huku wetuavela eyovo. (Isa. 61:10) Tyina nkhele tuheneende Kehinangelo, okukala tyahambukwa matyitukuatesako okulifuiika nawa. Ñgeni?
2. Oityi tyitulunda okulipongiya tyina tuenda Kehinangelo?
2 Lipongiya Pala Ehinangelo: Ondalelo ya Tatekulu otyipuka tyakolela unene. Moluotyo, tyesukisa okulifuika nawa nokukala nonthilo atuhakambe. (Prov. 21:5) Oola nomphangu malilingwa potyilongo tyenyi vina okuholovonwa. Tyesukisa okutaindya ombolo novinyu. Omphangu malilingilwa pena okukombwa nokulingwa nawa. Omunthu waholovonwa opo alinge elongomona wesukisa okulipongiya nawa, vana mavapitisa ombolo novinyu vesukisa okupopilwa oñgeni mavalingi. Tyotyili ongotyo tuhole okulinga. Katulingi vala ngatyina tuakuluminyua. Mokonda tuapandula epondolo liotyilikutila tyeyovo, otyo tyitulunda okupongiya nawa monthiki oyo.—1 Ped. 1:8, 9.
3. Oñgeni tupondola okupongiya omutima pala Onthiki Yondalelo ya Tatekulu?
3 Okupongiya Omutima: Otyiwa okufuiika omutima wetu opo tunoñgonoke etyi Ehinangelo lihangununa. (Esd. 7:10) Tupu tuesukisa okuovola omuwo wokutanga nombunga ine atuike ononthele mbo Mbimbiliya mbupopia konthele Yehinangelo, opo tunoñgonoke nawa ononthiki mbahulilila mba Jesus pano pohi. Okusokolola kotyituwa tya Jesus tyokuhaundapela-ndyambi matyitukuatesako okumuhetekela.—Gál. 2:20.
4. Ouwa patyi otyilikutila tyeyovo tyaava?
4 Ononkhia mba Kristu mbunkhimaneka Ouhamba wavilapo wa Jeova. Mbetuyovola konkhali nokononkhia. (1 João 2:2) Mbutuavela omphitilo yokukala nombembwa na Huku nokukala nomuenyo uhapu. (Col. 1:21, 22) Tupu mbutukuatesako okupameka elipakulo lietu tualinga ku Jeova nokutualako okukala ovalongwa va Kristu. (Mat. 16:24) Okulifuika nokuenda Kehinangelo, matyiyawisa ehambu liove!