“Tyilingei Lingei Apeho” Ehinangelo lia Tatekulu Malilingwa mu 5 ya Tyikukutu
1. Ehinangelo lio Nonkhia mba Tatekulu liakolela mokonda yatyi?
1 “Tyilingei lingei apeho mehinangelo liange.” (Luc. 22:19) No nondaka ombo, Jesus watuma ovalanduli vae, vahinangele ononkhia mbae. Mokonda yatyiho ofeto yeyovo yalinga, kutupu onthiki yakolela vali ine yapandwa no Vakristau, tyipona Yehinangelo lio Nonkhia mba Tatekulu. Putyina onthiki 5 ya Tyikukutu yehinangelo ifuena popepi, oñgeni matulekesa olupandu luetu ku Jeova?—Col. 3:15.
2. Oñgeni melilongeso lietu matulekesa okuti tuapanda Ehinangelo lia Tatekulu?
2 Lipongiya: Opo tulinge ovipuka viakolela, apeho tulipongiya. Tupondola okupongiya omitima vietu pala Ehinangelo lia Tatekulu, mokulilongesa nombunga konthele yetyi tyaendele kononthiki mbahulilila mba Jesus pano pohi, nokusokolola nawa konthele oyo. (Esd. 7:10) Ono testu mbumwe, mbutyipopia mbuvasiwa mokalendaliu, no mo Examine as Escrituras Diariamente. Mahi, ononkhuavo mbukahi mo A Sentinela 1 ya Fevereiro yo 2011 pomafo 23-24, novikapitulu vityipopia momukanda o Maior Homem.
3. Oñgeni matulekesa okuti tuapanda Ehinangelo lia Tatekulu, mokuundapa unene movilinga viokuivisa?
3 Ivisa: Tupu tupondola okulekesa olupandu luetu, mokuundapa unene movilinga viokuivisa. (Luc. 6:45) Ovilinga viokukonga vakuetu opo veye Kehinangelo lia Tatekulu mavihimbika Motyasapalo, 17 ya Tyitalale ouye auho. Okuti upondola okuovola omuvo, opo uundape vali unene movilinga viokuivisa, ine okukala omukokoli-ndyila wapola pokati? Oityi uhatompholela nombunga konthele oyo, Melilongeso lienyi Liombunga?
4. Esilivilo patyi tupola pokukala Pehinangelo lia Tatekulu?
4 Okukala apeho Pehinangelo lia Tatekulu kese nima, tupolako esilivilo enene! Ehambu lietu nohole tuna na Huku, viliyawisa vali, putyina tusokolola kotyali tya Jeova, mokuaava Omona wae wongunga opo akale ofeto yeyovo. (João 3:16; 1 João 4:9, 10) Otyo tyituavela ondundo opo tuhakaleko vali pala onthue muene. (2 Cor. 5:14, 15) Tupu tyilunda ehando lietu liokunkhimaneka Jeova kounyingi. (Sal. 102:19-21) Tyotyili, ovaumbili va Jeova volupandu, vakevelela nombili Ehinangelo lia Tatekulu matulingi mu 5 ya Tyikukutu, opo ‘vaivise ononkhia mba Tatekulu.’—1 Cor. 11:26.