Oityi Tyitulunda Okuivisa?
1. Oñgeni ovilinga viokuivisa vielikuata noluembia?
1 Okuivisa onondaka onongwa mbouhamba wa Huku otyilinga tyimwe tyakolela unene tupondola okulinga hono. Tyotyili, notyilinga otyo tulekesa okuti tuetavela ovitumino vivali ovinene, oluembia na Jeova noluembia navakuetu. (Mar. 12:29-31) Oluembia otyituwa tyitulunda okukala nombili movilinga viokuivisa.—1 João 5:3.
2. Oñgeni ovilinga viokuivisa vilekesa oluembia tuna na Jeova?
2 Oluembia na Jeova: Oluembia Nepanga lietu enene, Jeova lutulunda okuyemba kwe. Palambale omanima 6.000 Satanasi atualako okumutendeleya. (2 Cor. 4:3, 4) Ngotyo, ovanthu vetavela okuti Huku umonesa ononkhumbi ovanthu ovakuankhali mo ifelunu yotupia, nokuti Huku outatu Ukola, nokuhesukile novanthu. Ovanyingi alo umwe vasoka okuti kutupu Huku. Ovanthu vesukisa okunoñgonoka unene otyili konthele ya Tate yetu wokeulu! Ononkhono tulinga mbokuava oumbangi tyihambukiswa Huku nokunumanesa Satanasi.—Pro. 27:11; Heb. 13:15, 16.
3. Omonkhalelo patyi movilinga vietu viokuivisa tulekesa oluembia novanthu?
3 Oluembia Navakuetu: Apeho tyina tuava oumbangi kovanthu, tulekesa okuti tuvehole. Ovanthu vetupu ekevelo vesukisa okutehelela onondaka onongwa mokueenda kuononthiki mbuno mbepuiya. Ovanthu ovanyingi velifwa novanthu voko Ninive kononthiki mba Jona, “kavei okulio kuavo nokumbili kuavo.” (Jonas 4:11) Ovilinga vietu viokuivisa vilongesa ovanthu okukala nomuenyo omuwa nehambu. (Isa. 48:17-19) Otyo tyiveavela ekevelelo. (Rom. 15:4) Inkha vatehelela nokulilongesila, “mavakayovolwa.”—Rom. 10:13, 14.
4. Oityi Jeova ahamalimbwa?
4 Omona omunandunge kalekesa vala okuti uhole ovohe putyina vekahi ponthele yae. Ulinga ononkhono apeho okulekesa okuti uvehole. Tupu, oluembia olunene na Huku, novanthu lutulunda okutala nawa onomphitilo mbokuava oumbangi apeho, ha putyina vala tukahi movilinga viokuivisa. Onthue matuave oumbangi tyahatalama. (Atos 5:42) Jeova nalumwe malimbwa oluembia luetu.—Heb. 6:10.