Hetekela Ongeleka Yovauli—Mikeia
1. Epulo patyi Mikeia elilingile? Omokonda yatyi ononkhono alinga movilinga viokuivisa kambapesekele?
1‘Onalupi onthyulilo youye uno wovivi maiya?’ Omuuli Mikeia tyafuile nae welilingile epulo ngolio, puetyi ankho ekahi nokuivisa okuti Jeova mahanyeko ouhamba wo Isilayeli no wo Judaa. Mahi, ononkhono alinga movilinga viokuivisa kambapesekele. Puetyi nkhele Mikeia ena omuenyo, menima 740 P.K.E., onondaka mba Jeova konthele yo Samaria mbafuisiluepo. (Miq. 1:6, 7) Menima 607 P.K.E., o Jelusalei aihanyuapo. (Miq. 3:12) Oñgeni hono tupondola okuhetekela Mikeia putyina tukevelela onthiki ya Jeova yekoyeso?
2. Oñgeni iya omokonda yatyi tulekesila oumphua-lundo putyina tukevelela onthiki ya Jeova?
2 Pwa Elundo: Mikeia wahoneka okuti: “Ame madyitualako okukevelela Jeova. Mandyikala notyituwa tyokukevelela Huku yeyovo liange.” (Miq. 7:7) Tyotyili, putyina Mikeia ankho akevelela ehanyauno, watuaileko notyilinga tyokuula apelwe na Jeova. Mokonda nonthue tukevelela onthiki ya Jeova, tuesukisa okukala “novituwa viasukuka novilinga vilekesa onthilo na Huku.” (2 Ped. 3:11, 12) Oumphua-lundo wa Jeova utuavela omphitilo yokulivela. (2 Ped. 3:9) Moluotyo, tuesukisa okulandula onondonga Mbombimbiliya mbokuhetekela oumphua-lundo wovauli.—Tia. 5:10.
3. Omokonda yatyi tuesukisila okuiita ononkhono mba Jeova?
3 Yumba Onthumbi Mononkhono Mba Jeova: Mokonda otyilinga tya Mikeia ankho tyepuiya, waovolele okukuatesiwako na Jeova opo etyifuisepo. (Miq. 3:8) Jeova utyii okuti tuesukisa okukuatesiwako nae, moluotyo Ondaka yae itupopila opo tuyumbe onthumbi mononkhono mbae. Jeova waavela ononkhono vana vaponwa opo vetyivile okufuisapo ovilinga viavo meongano. (Sal. 84:5, 7; Isa. 40:28-31) Omuvo ukahi nokuumbila Jeova, okuti otyo tyamonekale momuenyo wove? Okuti apeho wiita ku Jeova opo ekukuateseko nononkhono mbae?—Luc. 11:13.
4. Omuenyo wa Mikeia, utuavela ongeleka patyi ongwa hono?
4 Otyipuka ankho tyakolela vali unene ku Mikeia, okupaka tete momuenyo wae ehando lia Huku. Watokolele okutualako nekolelo namphila ankho ekahi pokati kovanthu vena ovituwa ovivi. Tupu, ekolelo lietu apeho lilolwa. Moluotyo, tutokolei okutualako “okueendela menyina lia Jeova, Huku yetu apeho.”—Miq. 4:5.