Undapesa Nawa Omikanda Omikulu
Omikanda omikulu kavikuatesako nawike inkha vikala vala tyapakwa nawa, ngotyo tuesukisa okuviavela ovanthu. Omutala Womulavi ine o Despertai! vipondola okukuatesako omunthu akala nesuko notyili nokuhimbika okuhilivika enyina lia Jeova. (Rom. 10:13, 14) Tala onondonga mbupondola okutukuatesako okuundapesa nawa omikanda omikulu.
Tyina ukaivisa motelitoliu yahaundapwa unene, upondola okuvisa momaumbo muhavasiwa ovanthu.
Tyina wivisa mounyingi pana ovanthu vakevela omakalela ine omboyo, vepula inkha vahanda okutanga, olekesa omikanda vielikalaila oyeke omunthu aholovonepo.
Tyina wenda konondyuo mbokukoha ovikutu, no konosipitali ine opo nomphangu ononkhuavo potyilongo tyenyi, visa pana pakala ovanthu. Mahi otyiwa tete okuita kovanthu vaundapapo inkha tyitavela okusapo omikanda. Inkha uvasa penale omikanda ominyingi, otyiwa okuhasipo vietu.
Tyina ulipongiya opo ukatelelepo vana vesuka notyili otyiwa utale etyi vehole vali. Okuti vena ombunga? Okuti vehole okulinga oungendi? Okuti vehole otyikunino? Tala pomikanda omikulu inkha pena ononthele vapondola okuhambukilwa ovetuailavio tyina ukevetalelapo.
Tyina wamavasi vali omunthu uhole okutalailapo wesuka notyili, mulekesa omikanda vimwe omikulu opo apolopo evi ehena.