Undapesa o jw.org Movilinga Viokuivisa

O site yetu otyiti tyitukuatesako unene okuyandyaneka onondaka ongwa “alo kononthele mbokokule-kule mbo ohi.” (Atos 1:8) Ovanthu ovanyingi kavetyivili okuvasa o site jw.org. Anthi, velilongesa vala otyili nomikanda vamapewa.

Omutalelipo umwe womawaneno wapolamo ovidiu Oityi Wesukisila Okulilongesa Ombimbiliya? eipake motelefone yae opo eilekese ovanthu avasa. Mongeleka, etyi ankho ekahi nokuivisa umbo na umbo, oe wati: “Natalelapo ovanthu opo ndyivekuatesako okusa omakumbululo omapulo etatu akolela ati: Omokonda yatyi kuakalela ovitateka ovinyingi? Oñgeni Huku mekevimanako? No ñgeni tuna okuvitala? Ovidiu oyo ihehi muvasiwa omapulo oo.” Umanga vala pombutau yokuhikisa atale etyi omunthu asoka. Ovidiu oyo ipa ovanthu olumbwe avatualako okuitala alo ivituka. Omutalelipo womawaneno konyima ati: “Ngetyi watala ove upondola okuitila mo Internete opo ulongeswe Ombimbiliya. Pahetyino, ame ndyipondola okukulekesa tyihasete oñgeni tyilingwa.” Inkha omunthu wetavela, umulekesa oñgeni tyililongeswa Ombimbiliya okuundapesa ombruchula Onondaka Onongwa. Inkha omunthu utupu omuvo, velipakelamo opo emulongese tyina ameya. Tyina enda mombale, ulinga ngotyo nomunthu ahimbika nae etompho ukahi ponthele yae. Ove uhole okuundapesa o jw.org movilinga viokuivisa?