Okulongesa Ovanthu Ombimbiliya Avekulu
1. Otyilinga patyi ovaivisi vena pokulongesa ovanthu Ombimbiliya?
1 Petupu omunthu uumbila Huku, ‘ahakokelwe’ na Jeova. (João 6:44) No ngotyo, ovaivisi valongesa ovanthu Ombimbiliya okuvekuatesako okufuena ku Tate yavo keulu. (Tia. 4:8) Otyo tyesukisa okulipongiya. Okutanga kese palagrafu nokulinga epulo likahi pombuelo hatyo vala tyikuatesako ovalongwa okukula motyili.
2. Oityi tyesukisa pala okulongesa ovalongwa avekulu?
2 Opo ovaivisi vetyivile okulongesa ovanthu avekulu, vesukisa okuvekuatesako (1) okunoñgonoka oityi Ombimbiliya ilongesa, (2) okutavela etyi Ombimbiliya ilongesa (3) okuendela muetyi Ombimbiliya ilongesa. (João 3:16; 17:3; Tiago 2:26) Otyo tyesukisa onohanyi ononyingi opo omulongwa etyifuisepo. Kese nthambo ilekesa oupanga omulongwa ena na Jeova nelipakulo alinga kwe.
3. Omokonda yatyi pokulongesa tyesukisa okulinga omapulo akuatesako omunthu okupopia etyi asoka?
3 Oityi Omulongwa Wombimbiliya Asoka?: Opo utale inkha omulongwa unoñgonoka nokutavela etyi ekahi nokulongwa, lityilika okupopia unene, avela ondundo omulongwa apopie etyi asoka. (Tiago 1:19) Okuti omulongwa ukahi nokunoñgonoka etyi Ombimbiliya ipopia konthele yetyi mukahi nokulilongesa? Utyivila okutyihangununa monondaka mbae? Oñgeni atala etyi ekahi nokulongeswa? Utavela okuti etyi Ombimbiliya ilongesa katyalemene? (1 Tes. 2:13) Utavela okuti etyi alongeswa tyipondola okupilulula onkhalelo yae yomuenyo? (Col. 3:10) Opo tutale inkha ukahi nokufuisapo omapulo oo, tuesukisa okulinga omapulo opo apopie etyi asoka, atumutehelela.—Mat. 16:13-16.
4. Oityi tuesukisa okulinga inkha omulongwa kekahi nokunoñgonoka nokuendela muetyi ekahi nokulongeswa?
4 Ovituwa vietu novipuka tualongesiwa tunde kohale tyesukisa omuvo opo tuviyekepo. (2 Cor. 10:5) Oityi matulingi inkha omulongwa ketavela ine kalandula etyi ekahi nokulongeswa? Tyesukisa okupwa elundo okuyeka Ondaka ya Huku nospilitu sandu yundape momutima womulongwa. (1 Cor. 3:6, 7; Heb. 4:12) Inkha omulongwa tyemupuiya okunoñgonoka nokuendela mondongeso imwe Yombimbiliya, otyiwa okuenda no komutwe, atuhemukuluminya. Okutualako okumulongesa noumphua-lundo, noluembia ondongeso Yombimbiliya, mokueenda kuomuvo upondola okupiluluka.