Undapesa o jw.org Movilinga Viokuivisa​— “Kala Epanga lia Jeova”

“Omikanda, onovidiu” mo jw.org, pena apa pati “Kala Epanga lia Jeova” pavahiwa oviimbo, no novidiu, novipuka ovikuavo. Okuti uhole okuviundapesa movilinga viokuivisa? Inkha ulongesa Ombimbiliya omunthu umwe una ovana, omokonda yatyi uehemulekesila ovipuka ovio? Otyo tyipondola okumulunda akaovole mo site yetu, ovipuka ovikuavo.

Puetyi tukahi nokuaava otratadu Onondaka Mbouhamba No. 38, omukuatate umwe wavasa omukai umwe, etyi emuavela otratadu ahimbika okuitanga. Mokonda una ovana ovanyingi, otratadu oyo aimukalesa nolumbwe. Omukuatate emupopila etyi otratadu oyo yalingwa iya emulekesa o site yetu ikahi konyima yotratadu. Mokonda omukai walekesa esuko, omukuatate emulekesa ovidiu ya Kalebe, aveitale kumwe novana vae motelefone yae.

Omphange umwe wapopilile ou vaundapa nae una ovana o site yetu, iya novipuka ovikuavo vikuatesako onombunga. Omukai oo, atale o site jw.org novana vae. Konyima, atolela omphange okuti, omona wae tyina enda oku akanyanena wimba otyiimbo “Ivisa Ondaka,” otyiimbo tyimwe tyivasiwa pana pati “Kala Epanga lia Jeova.”

Talei apeho mo jw.org, amupolomo onovidiu, noviimbo, novipuka ovikuavo notelefone yenyi. Okulinga ngotyo matyikukuatesako okuivisa no jw.org. Otyo, otyiti tyimwe tyakolela tyitukuatesako okukala ovapika va Tatekulu!— Atos 20:19.