Lilongesila Kovaivisi Ovanongo

Onthue tyotyili tuhambukwa unene tyina tutala ovaivisi ovanongo tunavo mewaneno. Vamwe ovanongo mokonda vaundapale movilinga via Jeova omanima omanyingi. Ovakuavo, namphila vehena omanima omanyingi movilinga via Huku, mahi ovanongo. Ovaivisi ovo vekahi nokutala oñgeni Jesus ekahi nokuhongolela ovilinga viokuivisa nokulinga ovalongwa, meongano lia Huku, mononthiki mbuno mbokuahulilila. (Mat. 28:19, 20) Mokuyandyanesa ovilinga viavo, vatualako okupewa “ononkhono mbavilapo” putyina vavasa ovitateka na tyina valolwa. (2 Cor. 4:7) Pena ovipuka ovinyingi tupondola okulongesila kovaivisi ovanongo vaundapale movilinga via Huku tunde kohale. Tyina vamamono omphitilo, vahambukwa unene okulongesa vakuavo etyi vei. (Sal. 71:18) Ngotyo, tupondola okuovola onomphitilo tulilongesile kuvo. Oñgeni tupondola okutyilinga?

Movilinga Viokuivisa. Opo ovaivisi ovape na vana vehevanongo valongoke, vesukisa okukuateswako novaivisi ovanongo. Okulilongesila kovaivisi ovanongo tyipondola okupuiya. (Tala onthele ivasiwa Momutala Womulavi 15 ya Hitandyila yo 2015 “Tualako Nombili Yove Movilinga Viokuivisa,” popalagrafu yatatu, pokasapi kati, “Kuatesako Ovaivisi Ovape.”) Oñgeni okuundapa novaivisi ovanongo tyekuetela ouwa?

Okuti upondola okupopia nomuivisi umwe omunongo mukaivise nae? Inkha omuivisi oo uvela, upondola okukonga omulongwa wove Wombimbiliya, amukelilongesila keumbo liomuivisi oo. Konyima, muiita ekukuateseko etyi wehevilile, netyi wesukisa okulinga vali nawa.

Ovola Omuvo Ulilongesile Kuvo: Ovola okunoñgonoka ovaivisi ovanongo mokuovola omuvo wokukala navo. Konga umwe puvo eye pelilongeso lienyi liombunga, omupulo ovipuka uhanda okunoñgonoka. Ankho omuivisi oo uvela, okuti mupondola okukalingila efendelo lienyi liombunga meumbo liae? Mupula oñgeni anoñgonoka otyili? Ouwa patyi akala nao? Oñgeni ovilinga vikahi nokuliyawisa potyilongo tyae? Otyityi tyimukalesa nehambu mokuundapela Jeova?

Noñgonoka nawa tyina apopia, tupu pola pokati. Ngetyi ovanthu atuho tukahi, ovaivisi vokuakala omuvo omunyingi movilinga viokuivisa, navo vena etyi vevila, netyi vehevili. (Rom. 12:6-8) Mokonda vamwe vakulupa, tyipondola okuvepuiya okukala omuvo omunyingi nonthue. No ngotyo, onthue tupondola okulilongesila konongeleka mbavo mokuundapela Jeova nekolelo.