Tualako Okukala Nombili Mokulongesa Ovanthu Vakale Ovalongwa
1. Otyipuka patyi tyesukisa okulingwa opo ovanthu veye okuhupa?
1 Onolelatoliu mbenima liovilinga lio 2014, mbalekesa okuti, ovanthu va Huku vena ombili iya vatokola okuivisa onondaka onongwa Mbouhamba. (Mat. 24:14) Ovilinga viokuivisa umbo-na-umbo, novikambanya viokuava onotratadu, nomikanda viokukonga, nokuivisa mounyingi, vikahi nokutukuatesako vali unene okuvasa ovanthu ovanyingi tuvelongese etyi Ombimbiliya ipopia tyipona kohale. Opo ovanthu veye okuhupa, tuna okuvekuatesako vakale ovalongwa va Jesus mokulilongesa navo Ombimbiliya.—1 Tim. 2:4.
2. Omapulo patyi tupondola okulilinga opo tukale tyafuapo pala okulongesa ovanthu Ombimbiliya?
2 Kala Tyafuapo Ulongese Ovanthu Ombimbiliya: Okuti tyina omunthu amalekesa esuko, wovola okunoñgonoka enyina liae, na apa akala, opo haa ukemutalelapo? Onalupi wahula okulekesa omunthu oñgeni tyililongeswa Ombimbiliya onthiki yotete wemuvasa? Onalupi wahula okulekesa oñgeni tyililongeswa Ombimbiliya, vana utuaila-tuaila vala omikanda? Okuti uhole okulekesa ono vidiu, Oityi Wesukisila Okulilongesa Ombimbiliya?, no yokuati, Oñgeni Tyililongeswa Ombimbiliya? vana uundapa navo, na vana ulongeswa navo kosikola, na vana mukala navo pomaumbo, nombunga yove, ine omunthu omukuavo vali? Okuti tyina wivisa nokamutala komikanda, uhole okupopila vana vapolako omikanda evi tulongesa navio, vanoñgonoke okuti vapondola okulongeswa Ombimbiliya otyali?
3. Opo tutyivile okulongesa nawa-nawa otyili, tuesukisa okulinga-tyi?
3 Ekuateso Litunda ku Jeova Noku Jesus: Etyi Jesus apopila ovalongwa vae okuti “lingei ovalongwa,” wapopile okuti “endei,” tyilekesa okuti tuesukisa okulinga ononkhono, nokuovola onomphitilo. Mahi, Jesus ketuyeke tulinge ovilinga ovio atuike, mokonda walaa okuti makala nonthue. (Mat. 28:19, 20) Tyihe-otyo vala, Jeova utuavela ospilitu sandu noviti tuundapesa, iya etulongesa opo tutyivile okulongesa ovanthu otyili. (Zac. 4:6; 2 Cor. 4:7) Tupu tupondola okulikuambela opo ‘tukale nehando, nononkhono’ mbokulinga ovilinga ovio viesukisa.—Fil. 2:13.
4. Omokonda yatyi tuesukisila okutualako nombili movilinga viokulinga ovalongwa?
4 Okuivisa onondaka onongwa tyitukalesa nehambu. Mahi, ehambu lietu liliyawisa vali haunene putyina tuamalongesa omunthu umwe otyili, atumukuatesako aendele kumwe nonthue ‘mondyila ituala komuenyo.’ (Mat. 7:14; 1 Tes. 2:19, 20) Otyipuka tyakolela vali, tuesukisila okutualako nombili movilinga viokulinga ovalongwa, omokonda tyihambukiswa Jeova, una “wahahande na wike ahanyueko, mahi uhanda ovanthu aveho velivele.”—2 Ped. 3:9.