Kala Apeho Tyafuapo Pala Okuhimbika Okulilongesa Ombimbiliya Novanthu
1. Oityi tyakutikinya okufuisapo otyilinga Jesus etuavela mu Mateus 28:19, 20?
1 Jesus wetuavela otyilinga ‘tyokulinga ovalongwa . . . , nokulongesa.’ (Mat. 28:19, 20) Moluotyo, tukalei tyafuapo pala okulongesa ovanthu Ombimbiliya ononthiki ambuho, hakutyilinga vala monthiki yosimano yaholovonwa newaneno pala okuhimbika okulongesa ovanthu Ombimbiliya. Onondonga ombu mbulandulako mambutuvatela.
2. Ovalie matuhimbika okulilongesa navo Ombimbiliya?
2 Himbika Okulongesa Ombimbiliya: Tyina tuundapa movilinga viokuhimbika okulongesa ovanthu Ombimbiliya, matukala nonomphitilo mbokukala novalongwa. (Ecl. 11:6) Wahetekelale okutomphola nomunthu omupulu inkha uhanda okulilongesa Ombimbiliya? Ewaneno limwe ko Estadu Unidu valingile ononkhono opo vetyilinge mohanyi aiho. Ovo vahambukilwe unene moluetyi vahimbika okulilongesa Ombimbiliya novanthu 42! Uhasoke okuti ovanthu vokuesuka uvasa vetyii okuti ove uhanda okuvelongesa Ombimbiliya. Tyina ukondokako onthiki onkhuavo, omokonda yatyi uhemutolela okuti tukahi nokulilongesa Ombimbiliya novanthu? Inkha vetavela himbika okulilongesa navo. Tualako okukemutalelapo. Wapulale ovomunthele yove, ombunga, vana uundapa navo, navana ulilongesa navo kosikola inkha vahanda okulilongesa nove Ombimbiliya? Upondola okupula ovalongwa vove Vombimbiliya inkha vena omapanga ine onombunga vahanda okulilongesa Ombimbiliya.
3. Otyiti patyi tuna pala okuhimbika okulilongesa Ombimbiliya, iya onalupi tupondola okutyiundapesa?
3 Ombatelo Imwe Yakolela: Otratadu Okuti Ove Uhanda Okunoñgonoka Otyili? otyiti tyimwe tyakolela pala okuhimbika okulongesa ovanthu Ombimbiliya. Upondola okuiavela ovanthu vana vetavela omukanda omukuavo ine vana vehetavela. Upondola okuyundapesa pomphangu yovitanda, tyina uundapa metapalo, tyina utuma omikanda, na tyina ukatalelapo ovanthu. Tupu upondola okusapo otratadu pomaumbo ana uhavasile ovanthu. Omokonda yatyi kuityindila tyina wendela movituku-tuku, tyina wenda kopalasa, na tyina wenda kovilinga? Pefo liahulililako yotratadu, palekesa oñgeni onthue tulilongesa novanthu Ombimbiliya, iya omuavela omukanda Ombimbiliya Ilongesa.
4. Oñgeni matuundapesa otratadu Okunoñgonoka Otyili pala okuhimbika okulongesa ovanthu?
4 Tyina wamaavela omunthu otratadu, upondola okumulekesa omapulo ekahi ponthyimbi yefo iya omupulu okuti: “Pomapulo aa, olipi likusukalalesa vali?” Amutale ekumbululo motratadu, otange ine opopi onondaka mbukahi konthyulilo yefo mbuhangununa oñgeni onthue tulilongesa novanthu Ombimbiliya. Upondola okumulekesa apa pavasiwa onondaka ombo momukanda Ombimbiliya Ilongesa, omuavela omukanda, olingi ononkhono ukondokeko opo mutualeko nokutomphola.
5. Omokonda yatyi tuna okukala tyafuapo pala okulilongesa Ombimbiliya novanthu?
5 Motelitoliu yetu nkhele muna ovanthu vahanda okunoñgonoka etyi Ombimbiliya tyili ilongesa. Inkha tukala tyafuapo pala okulilongesa Ombimbiliya novanthu, matukala nehambu enene liokuvatela vakuetu okunyingila mondyila yomuenyo.—Mat. 7:13, 14.