Oviti Vietu Viokulongesa
1. Omonkhalelo patyi Ovakristau vapondola okuelekwa nomupangiyi omunongo?
1 Omupangiyi, ukala novityuma ovinyingi viokupangiya. Ovityuma vimwe, uviundapesa vala pamwe, mahi ovikuavo upangiya navio apeho. Omunthu omunongo utyivila okupangiya, ukala novityuma apangiya navio apeho, iya ovio vali evila okuundapesa. Ombimbiliya yavela ondundo Ovakristau aveho vakale ovanongo movilinga viokuivisa iya avakala ‘ovaundapi vahalingi natyike tyikundisa.’ (2 Tim. 2:15) Otyipi otyiti tuna tyakolela vali? Ondaka ya Huku—otyo, otyiti tyakolela vali tupondola okulongesa natyo ovanthu “vakale ovalongwa.” (Mat. 28:19, 20) Ngotyo, tuesukisa okulinga ononkhono tukale ovanongo “tuundapese nawa ondaka yotyili.” Mahi, pena oviti ovikuavo vali Ovakristau vena okulilongesa, opo vanoñgonoke oñgeni vina okuundapeswa nounongo, opo tulongese ovanthu otyili.—Pro. 22:29.
2. Oviti patyi ovikuavo tulongesa navio?
2 Oviti Vietu Ovikuavo Viokulongesa: Tyihe-Mbimbiliya vala, oviti patyi ovikuavo tuna okuundapesa? Otyiti tyimwe tulongesa natyo otyili Tyombimbiliya, omukanda Oityi Ombimbiliya Tyili Ilongesa? Tyina omulongwa amamane omukanda oo, una okulongeswa momukanda, “Tualako Okukala Mohole ya Huku,” opo anoñgonoke oñgeni apondola okuendela movitumino Viombimbiliya. Ngotyo, onthue tuesukisa okulinga ononkhono opo tukale ovanongo pokuundapesa omikanda ovio vivali. Onombrochula nambo oviti vietu viokulongesa. Ombruchula Onondaka Onongwa Mba Huku! nayo otyiti tyimwe tulongesa natyo Ombimbiliya, tyina tuavasa omunthu motyikando tyotete. Ankho motyilongo tyetu, muna ovanthu vehetyivili okutanga, ine ovanthu vapopia elaka lihena omikanda ovinyingi ine litupu omikanda, tupondola okuvelongesa nombruchula Tehelela Huku ine Tehelela Huku opo Ukale Nomuenyo Wahapu. Omukanda omukuavo wesukisa pala okulongesa omunthu anoñgonoke eongano lia Jeova, ombruchula Ovalie Valinga Ehando lia Jeova Hono? Ono vidiu tupondola okuundapesa, opo tulongese ovanthu vakale ovalongwa ombombu: Oityi Wesukisila Okulilongesa Ombimbiliya?, Oñgeni Tyililongeswa Ombimbiliya?, Okuti Huku Una enyina?
3. Oityi Ovilinga Vietu Viouhamba haa mavitukuatesako okulinga?
3 Ovilinga Vietu Viouhamba haa matutambula, mavitukuatesako okukala ovanongo opo tutyivile okuundapesa omikanda vietu viakolela vali pala okulongesa. Putyina tulinga ononkhono opo tukale nounongo wokulongesa nomikanda ovio, otyiwa okusoka kelondolo liokuati: ‘Liyunga nawa ove muene nonkhalelo yove yokulongesa. Tualako okuendela movipuka ovio, mokonda mokulinga ngotyo, moliyovola ove muene na vana vekutehelela.’—1 Tim. 4:16.