Ivisa “Kovanthu Aveho”
1. Oñgeni ovaivisi ovanongo vekahi ngomuhongi omunongo?
1 Omuhongi omunongo una oviti ovinyingi, mahi utyii onalupi no ñgeni aundapesa kese tyimwe. Tupu, nonthue tuna oviti ovinyingi vitukuatesako okufuisapo ovilinga vietu viokuivisa. Mongeleka, tuna ono mbrochula mbupopia konthele yovipuka vielikalela mbutukuatesako okuivisa “kovanthu aveho.” (1 Cor. 9:22) O suplemendu yomukanda ou Wouhamba ipopia mbumwe po nombrochula ombo, nokuhangununa ovalie mbalingilwa, nokulekesa oñgeni onombrochula mbupondola okuawa.
2. Onalupi tupondola okuava onombrochula movilinga viokuivisa?
2 Onalupi Tuundapesa Onombrochula: Omuhongi omunongo maundapesa otyiti tyina tyimukuatesako. Tupu, nonthue tupondola okuava ombrochula tyina tutala okuti maikuatesako omunthu, ha mokonda vala ikahi nokuava mohanyi oyo. Mongeleka, inkha tukahi nokuava omukanda Ombimbiliya Ilongesa, iya tukahi nokuivisa motyilongo tyihe tyo Vakristau, muna ovanthu vena esuko lihehi no Mbimbiliya, otyiwa tuave ombrochula yevetokala iya tyina pahe omunthu amalekesa esuko, atupopi nae konthele yomukanda Ombimbiliya Ilongesa.
3. Oityi tuesukisila okuundapesa nawa oviti vietu viokuivisa?
3 Ovihonekwa vipopia nawa vana vaundapa nounongo movilinga viavo. (Pro. 22:29) Tyotyili, kutupu ovilinga viakolela vali hono tyipona ‘ovilinga vikola viokuivisa onondaka onongwa.’ (Rom. 15:16) Opo tukale ‘ovaundapi vehena ohonyi’ tulinga ononkhono mbokuundapesa nawa oviti vietu.—2 Tim. 2:15.