Oityi Ovauli Vapopia Konthele ya Huku?
Kohale, Huku ankho ulaa ovauli etyi ovanthu vesukisa okulinga opo evekuateseko. Okuti pena etyi tupondola okulilongesila ku etyi ovauli vapopia? Yoo. Tala etyi tupondola okulilongesila ku etyi tyapopile ovauli vetatu.
AMBALAIAU
Huku kalingi okapungulula, uhanda okukuatesako ovanthu vatyo aveho.
Huku wapopilile omuuli Ambalaiau okuti “onombunga ambuho mambupewa ovipuka ovinyingi mokonda yae.” — Gênesis 12:3.
Otyo tyitulongesa-tyi? Tyitulongesa okuti Huku utuhole unene. Maavela ovipuka oviwa aveho vemutavela, tyilinge ovana, tyilinge ovakulu.
MOISESI
Huku una okankhenda, ukuatesako vana vesuka nokumunoñgonoka.
Huku wapele ononkhono mbae omuuli Moisesi, alingi ovipuka ovinyingi vihuvisa. No ngotyo, Moisesi aiti ku Huku okuti: “Noñgonokese onondyila mbove, opo ndyikunoñgonoke, andyitualako okupandwa no ove.” (Êxodo 33:13) Etyi Moisesi emuita ngotyo, Huku ahambukwa, emuyawisila kounongo wae. Emunoñgonokesa ovitumino viae novituwa viae. Mongeleka, Moisesi anoñgonoka okuti Omutungi wetu, o “Huku wokankhenda.” — Êxodo 34:6, 7.
Otyo tyitulongesa-tyi? Tyitulongesa okuti, ine tusuka nokunoñgonoka Huku, metukuatesako, tyilinge tuvana tyilinge tuvakulu. Mondaka yae Ombimbiliya, utupopila oñgeni tuna okumufenda, no ñgeni akala tyina tulikuatehila opo tulinge etyi tyaviuka.
SESUSI
Sesusi wahakulile omauvela aeho mokonda ankho una okankhenda na vakuavo
Ine tulilongesa ovipuka Sesusi alingile nevi apopile, tupondola okukapewa ovipuka oviwa komutwe wandyila.
Ombimbiliya ipopia ovipuka ovinyingi Sesusi alingile nevi alongesile. Sesusi walingile omahuviso omanyingi kononkhono mba Huku. Mongeleka, wahakulile ovamphoki, no nompholo, novilema. Utyii okuti atee umwe vokuankhia Sesusi wevetutilisile? Ovipuka ovio alinga, ankho uhanda vala okulekesa etyi Huku makalingila ovanthu komutwe wandyila. Wapopia etyi tuesukisa okulinga opo tukamone ovipuka ovio. Wati: “Opo vakamone omuenyo uhapu, vena okunoñgonoka ove Huku wike wotyotyili, nokunoñgonoka una ove watuma, Sesusi Kilisitu.” — Suau 17:3.
Sesusi ankho ukahi nawa, ankho ulinga nawa vakuavo. Wapopilile ovanthu okuti: ‘Lilongesilei ku ame, mokonda ame napoleya, tupu ndyina omutima weliola.’ Aveho ankho vetyihole tyokukala ponthele yae, tyilinge ovana tyilinge ovakulu. (Mateusi 11:29) Pononthiki mbae, ovanthu ankho valinga onya ovahikuena. Mahi Sesusi ankho uvelinga nawa.
Otyo tyitulongesa-tyi? Tyitulongesa okuti no onthue tuesukisa okulinga nawa vakuetu nga Sesusi.
SESUSI HA HUKU-KO
Ombimbiliya ipopia okuti “kuna vala Huku wike.” Sesusi ankho omutumwa-ndaka wa Huku. (1 Ova Kolindu 8:6) Sesusi nae wapopile umwe okuti Huku omunene kwe, iya oe ankho wemutuma pano pohi. — Suau 11:41, 42; 14:28.a
a Opo unoñgonoke vali etyi Sesusi Kilisitu alingile netyi apopile, tala elongeso 8 no9, liomukanda Verdadeira Fé — O Segredo de uma Vida Feliz. Upondola okuupola mo www.jw.org.