Huku Mekukuatesako Atee-tee

Huku wapopilile omuuli Ambalaiau okuti mombuto yae, ankho mamutundu omunthu makuatesako “ovanthu vovilongo aviho kombanda yeheke.” (Gênesis 22:18) Omunthu watyo oo, olie?

Omanima 2000 konyima, Huku waavelele Sesusi ononkhono mbae opo etyivile okulinga omahuviso. Ankho utyii-ale okuti Sesusi watunda mombunga ya Ambalaiau? Mahi omahuviso oo Sesusi alingile, alekesa-tyi? Alekesa okuti, oe yatyo Huku apopile okuti makakuatesako ovanthu vovilongo aviho. — Ova Galata 3:14.

Omahuviso a Sesusi, kaalekesile vala okuti oe yatyo Huku apopilile Ambalaiau, tupu alekesile oñgeni Huku makalinga ovipuka opo ovanthu vakakale nomuenyo omuwa. Tala oñgeni omahuviso Sesusi alingile alekesa etyi ankho ekahi.

Omutima omuwa — Sesusi wahakulile ovavei.

Nthiki imwe, omunthu umwe ankho una otyilunda, eya ku Sesusi, emuiti emuhakule. Oityi Sesusi alinga? Emuyame, emupopila okuti: “Nahanda!” Poola yatyo opo, akala nawa. — Maluku 1:40-42.

Otyali — Sesusi waavelele okulia ovanthu ankho vankhia ondyala.

Sesusi ankho kahande ovanthu ankho ena-vo vende nondyala. Walingile ehuviso aavela ovanthu ovanyingi-nyingi okulia, aveho avekuta, nkhele apahupu. Mahi ankho pena vala onombolo mbehehi, nombisi ihehi. Tuvali alingile otyipuka otyo tyihuvisa! — Mateusi 14:17-21; 15:32-38.

Okankhenda — Sesusi watutilisile wokuankhia.

Sesusi watutilisile omona womuhepe umwe. Ankho oe vala aike enae, pahe ankho utupu vali ou memutekula. Oityi tyalundile Sesusi okumututilisa? ‘Okankhenda’ ankho ena-ko. — Luka 7:12-15.