Okuti Ondaka ya Huku Yapilululwa?

Ovanthu vamwe vehole okulipula ine Ondaka ya Huku kayapilululilwe. Omuuli umwe utiwa o Isaiya, wapopia okuti Ondaka ya Huku “ikala-ko apeho.” (Isaías 40:8) Mahi oñgeni matunoñgonoka inkha etyi tyili mo Mbimbiliya hono, otyo umwe Huku atumine ovauli vahoneke?

Huku utyivila okupaka nawa Ondaka yae opo yahanyonwe. Kohale, ovanthu vokukopiyala Ombimbiliya ankho vapwa-elundo. Ankho vavalula umwe nawa onondaka vahoneka opo vatale ine vayawisa-ko ondaka ike ine pena ei yevelamba. No ngotyo, ovanthu ovo, navo ankho ovakuankhali, ovipuka vimwe vaponya.

OKUTI ETYI TYILI MO MBIMBILIYA HONO, OTYO UMWE OVAULI VAHONEKELE KOHALE?

No hono nkhele kuna omikanda ominyingi vyo Mbimbiliya viakopiyalelwe kohale. Onthue tueleka etyi tyili momikanda ovio, netyi tyili mo Mbimbiliya. Ine tuvasa oupuka umwe welipona, atukuate vali omukanda omukuavo wo kohale, tutale apa ovanthu vokuakopiyalele vaponya. — Opo unoñgonoke vali, nyingila mo internete, mo jw.org, otange onthele yati: “A Bíblia Foi Alterada?”

Mongeleka, kuna omukanda umwe wahonekwa kohale wavasiwa meleva mo 1947, utiwa Onombuingwa Mbelunga Liankhia. Apa omukanda oo wakopiyalwa, pena-le omanima alamba po 2000. Ovanongo vaeleka onondaka mbuli momukanda oo, netyi tyili mo Mbimbiliya. Oityi vamona?

Vamona okuti etyi tyili mo Mbimbiliya hono, otyo umwe ovauli vahonekele kohale.a Oñgeni vetyinoñgonoka? Valinga ñga: Vaeleka etyi tyili Mondaka ya Huku hono, netyi tyili momikanda viakopiyalelwe kohale-hale. Onthue tupondola okuyumba onthumbi yokuti Huku wapaka nawa Ondaka yae opo ihanyonwe.

Ngotyo, upondola okutanga Ombimbiliya nonthumbi yokuti ukahi nokutanga Ondaka ya Huku. Pahe tala etyi ovauli va Huku vapopile konthele yae, netyi upondola okulilongesilako.