Tualako Okulikuambela ku Huku

Huku wavela ovanthu otyipuka tyimwe, ovipuka ovikuavo vehena. Ovanthu vapondola okulikuambela kwe, vemupopile onkhalelo velitehelela. Omuuli umwe utiwa o Daviti, wati: “Ove Muteheleli womalikuambelo, ovanthu aveho mavehiki ku ove.” (Salmo 65:2) Mahi oñgeni tupondola okulikuambela opo Huku etutehelele?

LIKUAMBELA NONONDUNGE, OPOPI ETYI TYILI MOMBUNGO YOVE

Tyina ulikuambela, nengulila omutima wove ku Huku. Otyo tyilekesa-tyi? Tyilekesa okuti upondola okupopia atyiho tyili momutima wove. (Salmo 62:8) Huku, wehena etyi tyimupona, uhambukwa tyina tumupopila etyi tyili mombungo yetu.

TYINA ULIKUAMBELA TUMBULA ENYINA LYA HUKU

Huku una omanyina omanyingi otyihapua-nyina. Mahi una enyina liae muene. Wati: “Ame, ame Siovaa. Eli olio enyina liange.” (Isaías 42:8) Mo Mbimbiliya enyina olio, liahonekwa-mo ovikando vilamba po 7.000. Ovauli ovanyingi, ankho vatumbula enyina lya Huku tyina velikuambela. Ambalaiau wati: ‘Mbambavo Siovaa, . . . ndyeke-vo ndyipopie vali no ove.’ (Gênesis 18:30) No onthue tuna okutumbula enyina lya Huku tyina tulikuambela nga Ambalaiau.

LIKUAMBELA MELAKA LIOVE

Huku utehelela omalikuambelo etu tyihetei kelaka tupopia. Ombimbiliya yati: “Huku utupu okapungulula, mahi momalongo aeho omunthu una onthilo nae nokulinga etyi tyaviuka umutavela.” — Ovilinga 10:34, 35.

Mahi opo Huku atehelele omalikuambelo etu, tuesukisa okulinga vali otyipuka otyikuavo. Onthele mailandulako maipopi oityi tuesukisa okulinga.