OKUYAWISA OUNONGO WETU WOKUIVISA Okuhimbika Etompho Likuatesako Okuava Oumbangi

Jesus wetyivilile okuava oumbangi komukai omu Samaliya mokonda oe wahimbikile okutomphola nae. Oñgeni tupondola okuyawisa ounongo wetu tyina tuhimbika etompho nomunthu tuhei?

• Kala ondyandyi mokutomphola nomunthu. Namphila Jesus ankho aponwa wahimbikile etompho lihepuiya etyi aita omaande. Ove upondola okukukunya omunthu monkhalelo ikahi nawa iya konyima ohimbika okupopia konthele yomuvo ine ehipululo limwe vala lietyi tyaenda-po ononthiki ombu. Hinangela okuti otyipuka tuhanda okuhimbika etompho, ngotyo popia konthele ya tyimwe tyikalesa omunthu nesuko. Inkha kahandele okutomphola uhasoye, popia nomunthu omukuavo. Ita ku Jeova omutima wakola. — Nee. 2:4; Atos 4:29.

• Tala nawa onomphitilo mbokupopia onondaka onongwa, mahi uhalumbane. Yeka etompho liende monkhalelo ikahi nawa. Inkha umukuluminya, upondola okulitehelela omapita iya ahahande vali okutomphola. Uhanumane inkha etompho liapwa liwa iya ove ohetyivili okumupopila natyike konthele ya Huku. Inkha tyikupuilisa okuava oumbangi, lilongesa vala okuhimbika etompho novanthu, ohesuku nkhele nokuava oumbangi. [Hikisa iya opopi konthele yovidiu 1.]

• Ovola onomphitilo mbokuava oumbangi tyina upopia noukuatyili konthele yekolelo liove, matyikuatesako omunthu okutehelela etyi ukahi nokupopia. Jesus wapopia ovipuka vikalesa nolumbwe iya otyo atyilundu omukai omu Samaliya okumulinga omapulo. Etyi ahimbika okuava oumbangi konthele yonondaka onongwa, akumbulula vala omapulo emulinga. [Hikisa iya opopi konthele yovidiu 2, tupu hikisa iya opopi konthele yovidiu 3.]