Okuyawisa Ounongo Wetu Wokuivisa — Okuyekapo Okulilongesa Novalongwa Vehekahi Nokukula

TYAKOLELA MOKONDA YATYI: Opo ovanthu vakayovolwe vena okuivisa enyina lya Siovaa. (Loma 10:13, 14) Mahi haveho vetavela okulongeswa Ombimbiliya, vahanda umwe okuendela movitumino vya Siovaa. Moluotyo, matuundapesa nawa omuvo wetu movilinga viokuivisa tyina tukuatesako vana vahanda okulinga omapiluluko opo vahambukiswe Siovaa. Inkha tuna omulongwa uhekahi nokukala motyili ngwe tuelilongesa-le nae ehimbwe, hahe vali okumuyekapo, atuovola vana vahanda okuya meongano lya Siovaa. (Suau 6:44) Mahi inkha omulongwa oo tuayekapo, mokueenda kuomuvo ulinga omapiluluko alekesa okuti “uhanda omuenyo uhapu” tupondola okulilongesa vali nae. — Ovil. 13:48.

TYILINGWA ÑGENI:

• Mupandula mokonda yehando ena liokukala nenoñgonoko liaviuka liotyili. — 1 Tim. 2:4.

• Mupopila omokonda yatyi tyesukisila okuendela muetyi elilongesa. — Luka 6:46-49.

• Hipulula nae konthele yonthengele-popia ya Sesusi yomukuni, omupopila atale nawa oityi tyikahi nokumutyika. — Mat. 13:18-23.

• Nounkhengela mupopila omokonda yatyi moyekela-po okulilongesa nae.

• Mutolela okuti pamwe-pamwe momutalelapo, iya ankho ulinga omapiluluko ha mupondola okuhimbika vali okulilongesa.

TALA OVIDIU, KONYIMA AMUKUMBULULA OMAPULO AA:

• Metompho eli, oityi tyalekesa okuti omulongwa kekahi nokukula?

• Oityi omuivisi alinga tyakuatesako omulongwa okunoñgonoka okuti wesukisa okupiluluka?

• Oityi omuivisi apopia tyanoñgonokesa omulongwa okuti inkha ha uhanda vali okulilongesa upondola okumupopila?