Oñgeni Tupondola Okulifuika Pala Onthiki Yehinangelo?

Opasikwa yahulililako Sesusi alile, yapilululile ovipuka ovinyingi. Mokonda Seusi ankho utyii okuti maipawa, alingi ononkhono mbokulia Opasikwa novalongwa vae. Iya monthiki yatyo oyo, evelongesa oñgeni mavahinangaila Ononkhia Mbae. Atumu Petulu na Suau opo vakafuiike apa mavalila opasikwa. (Luka 22:7-13; tala olutalatu lwo kondye.) Otyo tyituhinangelesa okuti, no onthue tuesukisa okulifuiika pala Ehinangelo malilingwa monthiki 27 ya Março. Ovakulu vewaneno vaovolale ou malingi elongomona, na vana mavalingi ombolo, novikuavo vali. Mahi, oityi ove wesukisa okulinga opo ulifuiike pala Ehinangelo?

Fuiika omutima wove. Tanga, osokolola konotesitu mbutangwa Pehinangelo. Onthele imwe ilekesa onotesitu mbutangwa Pehinangelo, ivasiwa momukanda Tanga Ovihonekwa Ononthiki Ambuho. Tupu Omukanda Ukuatesako Okulilongesa Ondaka ya Huku, melongeso 16, nao upondola okukukuatesako. (Tupu tala Omukanda Wovilinga wa Abril yo 2020.) Omikanda omikuavo, vipondola okumukuatesako mefendelo lienyi liombunga, na mutale oñgeni ofeto yeyovo itukuatesako. Omikanda ovio, mupondola okuvivasa Momukanda Wokuovolola wo Nombangi mba Siovaa.

Konga vakuenyi veye Kehinangelo. Linga ononkhono mbokukonga ovanthu ovanyingi. Soka kovanthu upondola okukonga. Upondola okukonga vana uhole okutalelapo, na vana walongesile-ale Ombimbiliya, na vana mulii navo, no vombunga yove. Ovakulu vewaneno vena okulinga ononkhono mbokukonga vana vayekapo okuivisa nokuenda komaliongiyo. Tyina wamakongo omunthu wahakala kotyilongo tyenyi, nyingila mo site jw.org, otale omphangu noola Ehinangelo malilingwa kotyilongo tyavo, omupopila-tyo. Nyingila pana pati ONTHUE VALIE, omange pana pati, “Ehinangelo Liononkhia Mba Sesusi Kilisitu.”

Oityi vali tupondola okulinga opo tulifuiike?