Siovaa ‘Waviukisa Onondyila Mbange’

OVO TATE VAMPHAKA MONDYILA YAVIUKA

Konyima yo 1920 etyi ovo tate velinepa, avahimbika okulilongesa Ombimbiliya. Ame natyitwa mo 1939. Ame ankho ndyienda no tate keliongiyo, tupu ankho ndyihole unene Onthele Yosikola Youhamba. Mokonda ankho ndyina vala omanima epandu, etyi nalinga onthele yange yotete, andyiliatelela kotyipundi opo ndyivase kotribuna. Monthiki nalingile elongomona ankho natila unene owoma okutala movanthu ovanyingi.

Opo ndyityivile okuivisa nawa, tate anthyonekela onondaka mbumwe popapelo. Onondaka ombo, ankho ombo ndyina okupopia tyina ndyenda movilinga viokuvisa. Etyi nahimbika okuivisa ankho ndyina omanima etyinana. Natilile owoma etyi naavela omukanda nahonekelwa na tate, omunthu movilinga viokuivisa. Mahi ina tyilinga ovipuka, eutange umwe tupu etavela omukanda “Seja Deus Verdadeiro”! Otyipuka otyo, andyityipopila tate. Ovilinga viokuivisa nomaliongiyo viankhautesako okukala noupanga wapama na Huku, tupu avindyavela ondundo yokuundapa movilinga viomuvo auho.

Otyili tyehimbika okunthyika komutima, etyi tate ahimbika okumpha Omitala Viomilavi. Tyina ankho Tate amamphe omukanda ankho ndyiutanga auho. Otyo atyipameka oupanga wange na Siovaa, andyitokola okulipakula Kwe.

Mo 1950, ombunga yange aiho aiyende kotyonge tyati Aumento da Teocracia ko Nova York. Osapi yomukuana, 3 ya Agosto ankho yati “O Dia do Missionario.” Monthiki oyo, omukuatate Carey Barber, konyima wakalele umwe Pononkhalamutwe Mbonombangi mba Siovaa ngae ulinga elongomona liombatisimu. Etyi nalingwa omapulo ombatisimu, andyikumbulula okuti “Yoo.” Ankho ndyina vala omanima 11 etyi nambatisalwa. Ankho natila owoma okuenda momaande mokonda ankho hityiivili okuyoa. Titiyu anthyindikila, ati wehesuke. Tyili atyihepuiya nii vala katutu. Etyi nanyingila momaande atyiti, omukuatate ou ambatisala, omukuavo ampholomo. Tunde ponthiki oyo, Siovaa utualako okuviukisa nokuhongolela onondyila mbange.

OKUYUMBA ONTHUMBI MU SIOVAA

Etyi ndyikahi nokulongeswa, ankho ndyisoka okuti nga namana mandyikala omukokoli-ndyila. Mahi ina omulongesi ehimbika okunthyongiliya. Andyihongiliyua umwe andyende mosikola onene; Mahi etyi namona okuti, okulongeswa mosikola onene katyikahi nokunkhuatesako okupameka oupanga wange na Huku, andyisoko okutunda mosikola onene. Tete andyilikuambela ku Siovaa, konyima andyihonekela ovalongesi omukanda opo ndyiyekeko okulongeswa. Andyiyumbu onthumbi mu Siovaa, andyihimbika ovilinga vioukokoli-ndyila.

Mohanyi ya Julho yo 1957 andyikaundapa movilinga vioumuvo auho kepunda-umbo lyo Wellingborough. Andyipopi novakuatate vomo Betele yoko Londres vanthume omukuatate umwe omunongo tuundapa nae. Avatumu omukuatate Bert Vaisey. Omukuatate Bert Vaisey wankhuatesileko unene. Tyati umwe ankhuatesako okuonganeka nawa ovipuka tupu ankhuatesako okuivisa nombili onondaka onongwa. Mewaneno lietu ankho muna onomphange epandu vakulupa, naame na Vaisey. Tyankhuatesileko okuyumba onthumbi nokupameka ekolelo liange mu Siovaa, okulilongesa etyi matulilongesa meliongiyo nokukumbulula tyina ndyili meliongiyo.

Omuvo umwe andyipakwa mokalela mokonda yokuhelipake moufualali. Etyi natunda mokaleya andyinoñgonoka omphange umwe, ankho omukokoli-ndyila wavilapo ukahi nawa utiwa o Barbara. Mo 1959, atulinepe atupewa ovilinga ovikuavo. Tete tuatuminwe ko Lancashire mo Inglaterra. Pahe mohanyi ya Janeiro yo 1961, atukongwa, tukalongeswe mosikola yovakokoli-ndyila mo Mbetele yo Londres. Atuhuvu unene, mokonda etyi tuamana okulongesiwa atunakwa tukale ovatalelipo vomawaneno. Andyilongeswa onosimanu onombali ngomutalelipo womawaneno mepunda-umbo litiwa Birmingham. Tembwa ame ankho wahambukwa unene. Atukondoka vali kepunda-umbo litiwa Lancashire, konyima atuende ko Cheshire.

UNA UYUMBA ONTHUMBI MU SIOVAA APEHO MAYAMBWA

Puetyi tuli monofelia mohanyi ya Agosto menima 1962, Ombetele aitutumu oivelope. Moivelope omo ankho muna ono petisau onombali ankho tuesukisa okuhoneka opo tuende kosikola yo Gileade! Atulikuambela nomukai wange Barbara, atukondoka liwa-liwa ko Mbetele. Etyi palamba onohanyi ononthano, pahe ankho tuliale ko Brooklyn, Nova York. Tualongesilwe mosikola Gileade 38, mokueenda kuonohanyi ekwi.

Mosikola yo Gileade katualongesilwe vala Ondaka ya Huku, Neongano liae, mahi tupu tualongeswa okukala noluembia novakuatate ouye auho. Namphila ankho tuna vala omanima alamba po 20, no ngotyo kese wike welilongesile ovipuka oviwa ku mukuavo. Mosikola oyo, nali nelao liokulongeswa nomukuatate Fred Rusk. Wetukuatesako okunoñgonoka okuti, katuesukisile okukuatesako omunthu nonondaka mbetu mwene, mahi tuesukisa okumukuatesako nonondaka mbo Mbimbiliya. Tyihe ovipuka vala vetulongesile, tupu tuelilongesilile unene konongeleka mbovakuatate, ngetyi omukuatate Nathan Knorr na Frederick Franz, na Karl Klein. Tupu tuelilongesilile unene komukuatate Alexander Macmillan, ankho weliola unene omutima. Omalongomona omukuatate Alexander Macmillan ankho apopia oñgeni Siovaa ahongolela ovaumbili vae vamonesilwe ononkhumbi okupolelela mo 1914 kalee konthyimbi yo 1919!

OVILINGA OVIPE

Etyi tuhungi kokumanuhula okulongeswa omukuatate, Knorr etupopila okuti matukaundapa ko Burundi mo Afrika. Atukaovola mo Anualiu opo tutale ankho mo Burundi muna ovaivisi veñgapi. Nii atuhavasimo natyike, nii vala okafoto kotyilongo otyo! Motyilongo otyo ankho kamuneiviswe onondaka onongwa. Omukuatate Knorr walingile wetutumine ko Burundi! Mahi tyetukuatesileko okutula omutima okulikuambela.

Ko Burundi oku ankho tuatumwa ovipuka vielikalela unene. Tyati vala omphepo yoko, ovituhiwa viovanthu viavo nelaka liavo ankho vielikalela unene. Otyikuavo, ankho katupopi nawa o Frances. Tupu okuvasa ondyuo tyetupuiyile unene. Etyi palamba ononthiki onombali, omukuatate Harry Arnott, tualongesilwe nae mosikola yo Gileade, ankho wenda no Zambia oko makaundapa eya okututalelapo. Etukuatesako okuvasa ondyuo. Ondyuo oyo aikala, ondyuo yetu yotete yonomisionaliu. Ovatumini avahimbika okututyika mokonda ankho kavei natyike konthele yo Nombangi mba Siovaa. Etyi pahe tukahi nokutyiliya otyilinga tyetu, ovatumini avapopi okuti katupondola vali okukala mo Burundi, mokonda ankho onondukumendu mbetu mbakandukala. Mokonda yotyo, atutumwa kotyilongo otyikuavo ko Uganda.

Pokuenda ko Uganda tuesukisile okuyumba onthumbi mu Siovaa mokonda ankho tutupu omikanda vituyeka okunyingila motyilongo otyo. Omukuatate umwe woko Kanada ankho uundapa oku kuesukisa ovaivisi mo Uganda etukuatesako. Akapopia no pulisa mbokulinga omikanda viokuyeka ovanthu okukala motyilongo tyehetyavo. Avetuyeke okukala motyilongo otyo. Mahi avamphopila okuti matukalamo vala onohanyi mbumwe otyo ndyiovola omikanda. Etyi ovipuka aviho viaenda nawa, atumono okuti Siovaa oe wetukuatesako.

Ko Uganda ovipuka ankho vielikalela no ko Burundi oku tuatunda. Mo Uganda ovilinga vietu ankho kaviailikilwe. Mokonda yotyo motyilongo atyiho ankho muna-le Onombangi mba Siovaa 28. Haunene ovanthu motyilongo otyo ankho vapopia vala o Ingelesi. Opo tukuateseko ovanthu vahanda okulilongesa Ombimbiliya tuesukisile okulilongesa omalaka omakuavo. Mokonda tuehimbikilile okuivisa ko Kampala kupopiwa eleka lyo Luganda, atuhimbika okulilongesa elaka olio. Pakalele omuvo opo tutyivilie okupopia nawa o Luganda, mahi tyetukuatesileko unene movilinga viokuivisa! Okupopia elaka tyetukuatesako okunoñgonoka oityi ovalongwa vetu vesukisa opo vakale noupanga wapama na Siovaa. Pahe navo avahimbika okupopia oñgeni etyi velilongesa tyivekalesa.

TUAENDAILE UNENE

Atupewa otyilinga otyipe tyetuhambukisilwe unene. Otyilinga otyo ankho okulinga oungendi movilongo opo tukaivise onondaka onongwa. Etyi tuatumwa no Mbetele yoko Quenia, atulingi oungendi opo tukaovole ovilongo viesukisa ovakokoli-ndyila vavilapo. Tyili tuavasile ovanthu ovanyingi, ankho vetutambula nawa, vehenemone-ale Onombangi mba Siovaa. Ankho vetuliepesa nawa nokutuavela okulia.

Pahe ankho matulingi oungendi omukuavo. Tuatundile ko Kampala, atuendela momboyo ononthiki onombali. Atuhiki ko Mombasa mo Quenia. Atulondo mombapolo atuii noko Seychelles, okalongo kamwe keli pokati kelunga ko Oceano Indico. Okupolela menima 1965 - 1972, Barbara nae ahimbika okuenda naame ko Seychelles. Momaungendi oo, tuasilepo ovaivisi vevali avalingi otyikundyi, otyikundyi otyo atyikala umwe ewaneno. Tupu tualingile omaungendi omakuavo atutalelapo ovakuatate ko Eritreia, noko Etiopia noko Sudau.

Etyi tuakondoka ko Uganda ovipuka ankho viapiluluka unene. Ankho pahe muna ovilwa. Mokueenda kuovilwa ovio, andyinoñgonoka esilivilo lionondaka mbati “fetei ku Sesale ovipuka vya Sesale.” (Malu 12:17) Pomuvo umwe, onongendi ambuho ambutolelwa opo mbulihonekese. Onthue atulihonekesa liwa-liwa. Nthiki imwe ankho tuna omisionaliu mukuetu ko Kampala. Opulisa aitukuate. Atuteketa unene! opulisa avetupopila okuti tuvalavi, mahi onthue atuti: Au tunomisionaliu vala. Tupu atuvepopila okuti, onthue ankho tuelihonekesale populisa ili popepi nondyuo yetu. Avehetutavela nii vala katutu. Avetukuate atuende kopulisa yatyo, opo vatale ine etyi tuapopia otyili umwe. Tuati vala hike, opulisa imwe aituimbuka. Aiveti velihonekesa-le veyekei, avetuyeke!

Mokueenda kuononthiki pahe ankho tumona vala omafualali omanyingi etai momatapalo. Ankho tyitutilisa unene owoma tyina tuamatalamekwa nomafualali akolwa. Mahi apeho tyina ankho tuamatalamekwa nomafualali oo, tulikuambela unene ku Siovaa, opo tutule omutima. Mahi tyilinga ovipuka ankho vetuyeka umwe tulambe. Mahi, menima 1973 onomisionaliu ambuho onongendi avatumwa okutunda mo Uganda.

Atupewa vali otyilinga otyikuavo mo Afrika. Atukaundapa ko Costa do Marfim. Ankho matusukisa okulinga omapiluluko amwe: Ngetyi okulilongesa ovituwa vyo motyilongo otyo, nokulilongesa nawa o Frances, nokukala apeho nonomisionaliu vatunda kovilongo vielikalaila! Tuetavelele ehongolelo lya Siovaa nomutima auho. Tuamuene umwe ononkhono mba Huku mbutukuatesako, mokonda ovanthu avahimbika okutavela onondaka onongwa. Atuho tuayumbile onthumbi mu Siovaa, ngwe etuhongolela.

Tembwa ame Barbara avasiwa no cancer. Atukondauka ko Europa opo akahakulwe. Mahi menima 1983 andyimono okuti kamatutyivili okutualako novilinga vietu mo Afrika. Otyipuka otyo tyetusoyesile unene!

OVITATEKA VIMWE TUAKALA NAVIO

Ouvela wa Barbara auliyawisa. Etyi tuli mo Mbetele yoko Londres anyimi. Ovakuatate vomo Mbetele avankhuatesako unene. Mahi pena ovalinepi vamwe vankhuatesileko okutualako okuyumba onthumbi mu Siovaa. Konyima andyinoñgonoka omuhikuena umwe utiwa o Ann ankho uundapa mo Mbetele. Omuhikuena oo, wali omukokoli-ndyila wavilapo. Ankho uhole unene Siovaa, iya tupu ankho una oupanga wapama nae. Menima 1989, ame na Ann atulinepe, nkhele tyo opo, tutualako okuundapa ko Mbetele yoko Londres.

Okupolela menima 1995 - 2018, nali nelao liokutumwa Nononkhalamutwe Mbonombangi mba Siovaa, okukatalelapo ono Mbetele mbumwe. (ankho vatiwa superintendente Zonal) Andyitalelapo ono Mbetele mbuhungi po 60. Mokueenda-enda movilongo ovio, namona oñgeni Siovaa atualako okuyamba ovakuatate namphila vena ovitateka.

Menima 2017 andyitumwa ko Afrika. Andyihambukwa etyi nalekesa Ann, mo Burundi. Pahe ovilinga viokuivisa, kavikahi ngo kohale, vili nokuliyawisa! Pana ankho tuivisa umbo-umbo mo 1964, opo patungilwa Ombetele imwe ongwa. Pahe mo Burundi muna ovaivisi valamba po 15.500.

Mo 2018, andyihambukwa unene etyi napewa omukanda wokukatalelapo ovilongo. Povilongo ovio ankho pena o Costa do Marfim. Ankho matuhikila mo Abidjan. Epunda-umbo olio kuame ankho ongatyina o meumbo liange vala. Pokutala onombalulo mbovakuatate vaundapa mo Mbetele, andyimono okuti, mokualutu ili ponthele muna omukuatate utiwa, Sossou. Andyisoko okuti, hamwe oyouna wali omutalelipo womawaneno etyi ndyili ko Abidjan. Mahi ankho haeko. Omona wae.

Siovaa apeho ufuisapo etyi apopia. Namphila tuali novitateka ovinyingi, mahi tyina tuyumba onthumbi mu Siovaa, ngwe utuhongolela. Pahetyino nahanda okutualako okuendela mondyila oyo mokonda oyo mainthuala mouye omupe. — Pro. 4:18.