Oluembia Lutukuatesako Okukoleleya Tyina Tuyalwa

1. Ngetyi tyipopia Mateusi 24:9, omokonda yatyi tuahahuvila tyina tuyalwa?

SIOVAA wetutunga opo tukale nohole na vakuetu, navo vakale nohole no onthue. Mahi tyina tumoneswa ononkhumbi na vakuetu tyituihama. Mongeleka omphange Georgina ukala ko Europa wapopia okuti: “Etyi ndyina omanima 14, me ankho umonesa ononkhumbi mokonda ndyifenda Siovaa. Mokonda yotyo ankho ndyilitehelela okuti hisilivila, himunthu ukahi nawa.”b Omukuatate Danylo wapopia okuti: “Etyi navetelwe nomafualali mokonda Ndyimbangi ya Siovaa, andyisoko okuti hisilivila.” Okumoneswa ononkhumbi tyiihama. Mahi ngetyi tutyii Sesusi wapopile-ale okuti matumoneswa ononkhumbi. — Tanga Mateusi 24:9.

2-3. Omokonda yatyi ovalongwa va Sesusi ankho veyelelwe?

² Ovanthu ankho veyele ovalongwa va Sesusi. Omokonda yatyi? Omokonda nga Sesusi ovalongwa vae ankho ‘kavalingi onthele youye.’ (Suau 15:17-19) Ankho valinga umwe onthilo ovatumini. Mahi ankho kavetavela tyina ovatumini veveita okulinga tyimwe tyihelikuatele novitumino vya Siovaa. Tupu ankho vafenda vala Siovaa. Ankho vahula Kouhamba wa Huku. Mahi Satanasi ketavela Ouhamba oo. (Gên. 3:1-5, 15) Tupu ankho vaivisa okuti, Ouhamba wa Huku mauya okumanako aveho vatyitukilapo Ouhamba oo. (Dan. 2:44; Ehol. 19:19-21) Mahi onondalawa mavakakalako apeho, onondingavivi ambukanyimuako. — Sal. 37:10, 11.

³ Tupu ankho veyelwe mokonda vetavela ovitumino vya Siovaa. Etyi Huku apopia okuti tyaviuka, mouye vetyitala ngatyina tyapenga. Mongeleka ovanyingi kavetavela okuti, okulinga oundalelapo, noumbalehi tyapenga. Mahi onthue tutyii okuti tyapenga mokonda otyo Siovaa ahanyenene-po o Sodoma no Gomola! (Sunda 7) Mokonda onthue tulandula ovitumino vyo Mbimbiliya ovanthu ovanyingi vetulinga omukuele nokutupopia omapita! — 1 Pet. 4:3, 4.

4. Ovituwa patyi vitukuatesako tyina tumoneswa ononkhumbi?

⁴ Oityi tyipondola okutukuatesako tyina ovanthu vetupopia omapita? Tete, tukalei nonthumbi yokuti Siovaa metukuatesako. Tyavali ngondyakulilo, ekolelo lietu lipondola okutukuatesako “okunyima omihongo aviho viatema viondingavivi.” (Efe. 6:16) Mahi katuesukisile vala ekolelo. Tupu tuesukisa oluembia. Omokonda yatyi? Omokonda omunthu woluembia “kanumana liwa.” Tupu ukevelela, nokukoleleya movipuka aviho. (1 Kol. 13:4-7, 13) Pahe matulilongesa, oñgeni okukala nohole na Siovaa, novakuatate, nonondyale mbetu tyitukuatesako okukoleleya.

OHOLE NA SIOVAA ITUKUATESAKO OKUKOLELEYA TYINA TUYALWA

5. Oityi Sesusi alingile mokonda yokuhole Tate yae?

⁵ Etyi kuakamba onthiki ike opo Sesusi aipawe, apopila ovalongwa vae okuti: “Ame ndyihole Tate, [tupu] ame ndyilinga ngetyi Tate anthuma.” (Suau 14:31) Ohole Sesusi ankho ena na Siovaa, yemukuatesileko okukoleleya tyina ankho amoneswa ononkhumbi. Nonthue inkha tukala nohole na Siovaa, matyitukuatesako okukoleleya tyina tuyalwa.

6. Ngetyi tyipopia Ova Loma 5:3-5, oñgeni ovaumbili va Siovaa vakala tyina vamoneswa ononkhumbi?

⁶ Okukala nohole na Huku, tyakuatesileko ovaumbili vae okukoleleya tyina ankho vamoneswa ononkhumbi. Mongeleka ono apositolu mba Sesusi vaihanenwe Kombonge Onene yova Sundeu avapopilwa opo vahaivise vali. Mahi mokonda ankho vehole Siovaa, atyivelunde “okutavela ku Huku tyipona kovanthu.” (Ovil. 5:29; 1 Suau 5:3) Na hono, tyikuatesako ovakuatate nonomphange okukoleleya tyina vahataikiswa, nokumoneswa ononkhumbi novatumini, ohole vena na Siovaa. Okumoneswa ononkhumbi katyitusoyesa, tyituhambukiswa. — Ovil. 5:41; tanga Ova Loma 5:3-5.

7. Oityi tuhapondola okulinga tyina ombunga yetu ituyele?

⁷ Tyipondola okutupuiya unene okukoleleya, tyina vetumonesa ononkhumbi ombunga yetu muene. Mongeleka, tyina ombunga yetu vamamono okuti tuna nokulilongesa otyili, vapondola okusoka okuti etyi tuli nokulinga katyaviukile. Ovakuavo vapondola okusoka okuti tukahi nokukala ovityova. (Tyieleka na Maluku 3:21) Atee umwe vapondola okuhimbika okutumonesa ononkhumbi. Otyipuka otyo katyituhuvisa, mokonda Sesusi wapopile okuti: “Omunthu mayalwa no vomeumbo liae muene.” (Mat. 10:36) Namphila onombunga mbetu vetumonesa ononkhumbi, mahi onthue katuesukisile okuvetala ngatyina onondyale mbetu. Mokonda ohole tuna na Siovaa, itukuatesako okukala noluembia novanthu. (Mat. 22:37-39) Tupu onthue katuliatela kovitumino vya Siovaa, nga tuhambukiswe vala ovanthu.

8-9. Oityi tyakuatesileko omphange Georgina okukoleleya?

⁸ Georgina, tuapopiale, wakoleleyile etyi ankho amoneswa ononkhumbi na me yae. Georgina wapopia okuti: “Tuehimbikile umwe okulilongesa Ombimbiliya Nonombangi mba Siovaa na me. Mahi etyi palamba onohanyi epandu, andyihande okuenda keliongiyo, me anumana. Andyimono okuti wanumana tupu, omokonda watompholele novanthu vatyitukilapo otyili. Ovanthu ovo avemupopila omatutu konthele Yonombangi. Iya pahe ovipuka ovio, ankho ovio amphopila. Me ankho unthukana, umbeta, tupu ankho uyumbahi omikanda viange. Mahi etyi natuukisa omanima 15, andyimbatisalwa. Mokonda me ankho uhanda nehelilongese vali, amphake mondyuo yokupakwa ovityova. Mondyuo oyo yovityova ankho muna ovakuendye vapuenaine omapangwe, nokualingaile ovipuka ovivi. Okulingwa onya na me yove, una wii okuti ñgeno ankho oe una okukutekula nawa, tyiihima unene.”

⁹ Oityi tyakuatesileko Georgina okukoleleya? Georgina wati: “Etyi me ahimbika okunthyitukilapo, ankho namanale okutanga Ombimbiliya aiho. Ankho ndyityii okuti navasa umwe otyili. Otyipuka otyo atyipameka oupanga wange na Siovaa. Tyina ankho ndyilikuambela kwe, unthehelela. Etyi ankho ndyili mondyuo ina yovityova, omphange umwe, amphopila ndyende keumbo liae. Atuhimbika okulilongesa nae Ombimbiliya. Mokueenda komuvo, mokonda yokuenda komaliongiyo, ovakuatate nonomphange avamphameka unene. Ovakuatate ovo avakala ngatyina ombunga yange. Nelimonena-ko umwe nawa okuti, Siovaa wamphamekele katyesukisile apa ndyikahi, namphila ankho ndyimoneswa ononkhumbi.”

10. Onthumbi patyi tupondola okukala nayo mu Siovaa Huku yetu?

¹⁰ Apositolu Paulu wapopia okuti, petupu ‘natyike matyityivili okutuyapula koluembia lwa Huku luli mu Kilisitu Sesusi Tatekulu yetu.’ (Loma 8:38, 39) Namphila pamwe tumoneswa ononkhumbi, mahi tukalei nonthumbi yokuti Siovaa apeho utukuatesako nokutuungumanesa. Tupu ongeleka ya Georgina itulekesa okuti, Siovaa nonthue metukuatesako, iya uhole ovakuatate vetu.

OLUEMBIA NOVAKUATATE LUTUKUATESAKO OKUKOLELEYA TYINA TUMONESWA ONONKHUMBI

11. Oñgeni ohole Sesusi apopia mu Suau 15:12, 13 yakuatesileko ovalongwa vae? Popia ongeleka.

¹¹ Etyi kuakamba onthiki ike opo Sesusi aipawe, wapopilile ovalongwa vae opo vakale nohole pokati kavo. (Tanga Suau 15:12, 13.) Sesusi ankho utyii okuti inkha ovalongwa vae vakala noluembia na vakuavo, matyivekuatesako okukoleleya, nokulikuata okapandi. Tutalei etyi tyaendele newaneno lyo Tesalonika. Etyi ewaneno olio, liaonganekwa ovakuatate avahimbika okumoneswa ononkhumbi. Mahi no ngotyo ovakuatate vakalele ongeleka ongwa youkuatyili nokukala noluembia na vakuavo. (1 Tes. 1:3, 6, 7) Paulu, evelundu okutualako okukala noluembia novakuatate. (1 Tes. 4:9, 10) Oluembia luevelundile okupameka ovakuatate vasoya nokuvekuatesako. (1 Tes. 5:14) Ovakuatate ovo, valandulile umwe onondongwa mba apositolu Paulu, mokonda etyi palamba enima, Paulu evehonekela okuti: “Oluembia muna na vakuenyi nalo lukahi nokuliyawisa.” (2 Tes. 1:3-5) Okukala noluembia tyevekuatesileko okukoleleya mononkhumbi.

12. Mokueenda kuovilwa oñgeni mepunda-umbo limwe, ovakuatate valekesile okuti vehole ovakuatate vavo?

¹² Tutalei etyi tyaendele na Danylo nomukai wae, tuapopia-le konthyimbi. Etyi mepunda-umbo liavo muna ovilwa, vatuaileko okuenda komaliongiyo, nomovilinga viokuivisa, nokuavela okulia ovakuatate nonomphange. Nthiki imwe meumbo liae amuya omafualali. Danylo wapopia okuti: “Omafualali amphopila okuti ndyina okuyekapo okukala Ombangi ya Siovaa. Etyi naanya avambete, avahande okundoya. Etyi vati pokuenda avati, matukondoka atulala nomukai wove kononkhono. Mahi etyi ovakuatate vetyiiva, aveya liwa-liwa, avetutuala apa pavelekela onomboyo opo tuende kepunda-umbo ekuavo. Himalimbwa onkhalelo vakalele noluembia nonthue. Etyi tuehika kepunda-umbo ekuavo, ovakuatate avetutambula nawa. Avetuavela okulia, avetukuatesako okuvasa ondyuo, novilinga! Mokonda yokuakuatesuako, nonthue atutyivili okutambula vakuetu ankho navo vatilila mepunda-umbo olio.” Onongeleka ngo ombo, mbutukuatesako okutala okuti, okukala noluembia novakuatate tyivekuatesako okukoleleya tyina vamoneswa ononkhumbi.

OLUEMBIA NONONDYALE MBETU LUTUKUATESAKO OKUKOLELEYA

13. Oñgeni ononkhono mba Siovaa mbutukuatesako okukoleleya tyina tumoneswa ononkhumbi?

¹³ Sesusi wapopilile ovalongwa vae vakale nohole nonondyale mbavo. (Mat. 5:44, 45) Okuti ankho tyapepuka? Au. Mahi ankho mavetyivili vala inkha vakuatesuako nononkhono mba Huku. Movinyango viononkhono mba Huku, muakutikinya ohole, noumphua-lundo, nokankhenda, nouwa-tima, nokulikondola omutima. (Gal. 5:22, 23) Ovituwa ovio, vitukuatesako okukoleleya tyina tumoneswa ononkhumbi. Ovanthu ovanyingi ankho vetuyele pahe vapiluluka. Omokonda yatyi? Omokonda yovituwa oviwa, viomukai wange, ine omulume wae. Iya pahe vamwe ovakuatate vetu nonomphange. Inkha ukahi nokumoneswa ononkhumbi mokonda uumbila Siovaa, likuambela omuiti ononkhono mbae. (Luka 11:13) Kala nonthumbi yokuti okulinga etyi tyihambukiswa Siovaa otyo otyipuka tyikahi vali nawa tuna okulinga. — Pro. 3:5-7.

14-15. Oñgeni omukanda Ova Loma 12:17-21 wakuatesileko Yasmeen okukala noluembia nomulume wae namphila emutekula onya?

¹⁴ Tutalei ongeleka ya Yasmeen ukala ko Médio Oriente. Etyi Yasmeen akala Ombangi ya Siovaa, omulume wae asoko okuti, ukahi nokukembwa. Mokonda yotyo alingi atyiho opo emutyike okuumbila Siovaa. Ankho kemutekula nawa, umutukana. Tupu akapopia nononkhalamutwe mbonongeleya, nonosova. Apopi okuti: “Omukai wange uya nokuhanyapo eumbo lietu”. Nthiki imwe etyi Yasmeen aya keliongiyo, omulume wae emulandula, anyingila meliongiyo, ahimbika okutukana ovakuatate! Yasmeen ankho ukalela vala okulila mokonda omulume wae kemutekula nawa.

¹⁵ Mahi tyina enda keliongiyo Yasmeen ankho ulitehelela nawa, mokonda ovakuatate vemupameka nokumuungumanesa. Ovakulu vewaneno avemupopila aendele monondongwa mbuli momukanda Ova Loma 12:17-21. (Tanga.) Yasmeen wati: “Ankho tyalema. Mahi andyilikuambela ku Siovaa opo ankhuateseko okuendela monondongwa ombo. Tyina ankho ayumba vala ovinthyuma pohi, ndyivipola-po. Tyina ankho ayumba oliso motyitelekwa ankho ndyikomba vala. Tyina ankho anthukana, ndyimukumbulula vala nawa. Tyina ankho avela, ndyimutekula nawa, nokumulisa.”

16-17. Oityi welilongesila ku Yasmeen?

¹⁶ Yasmeen wayambelwe mokonda yovipuka alingile. Yasmeen wati: “Pahe omulume wange undyumba onthumbi, mokonda utyii okuti apeho ndyipopia otyili. Tupu unthelela nawa tyina ndyipopia omatavelo ange. Pahe meumbo lietu muna ombembwa. Pehepano, tyina omulume wange apopia na ame konthele yomaliongiyo, upopia umwe nawa. Ombunga yetu ina ombembwa nehambu. Ndyikevelela okuti nthiki imwe omulume wange melilongesa otyili, atuumbila nae Siovaa.”

¹⁷ Ongeleka ya Yasmeen ilekesa okuti omunthu wohole “ulikuatehila movipuka aviho, . . . ukevela ovipuka aviho, ukoleleya movipuka aviho.” (1 Kol. 13:4, 7) Tyili okumoneswa ononkhumbi tyituihama, mahi okukala noluembia tyitupameka. Nthainya, inkha tukala noluembia novanthu, tyipondola okuvekuatesako okuyekapo okutuyala, atuhambukiswa Siovaa. Tupu ovanthu vapondola okutuyala mahi onthue atutualako nehambu. Ñgeni ngotyo?

HAMBUKWA TYINA UYALWA

18. Omokonda yatyi tuhambukilwa tyina tumoneswa ononkhumbi?

¹⁸ Sesusi watile: ‘Hambukwei tyina muyalwa.’ (Luka 6:22) Hakuti okuyalwa tutyihanda. Mokonda nonthue tyituihama umwe. Mahi omokonda yatyi tuhambukilwa tyina tumoneswa ononkhumbi? Omokonda yovipuka vitatu. Tete, tyina tukoleleya matupandwa na Huku. (1 Pet. 4:13, 14) Vali, ekolelo lietu malipame vali. (1 Pet. 1:7) Tatu, matukapewa ondyambi imwe onene na Siovaa, omuenyo wahapu. — Loma 2:6, 7.

19. Omokonda yatyi ono apositolu vatuaileko nehambu etyi vavetwa?

¹⁹ Etyi Sesusi eya keulu, ono Apositolu mbae vakalele nehambu evepopilile. Etyi vavetwa, avatolelwa opo vahaivise vali onondaka ongwa, vatuaileko nehambu. Omokonda yatyi? Omokonda vamonesilwe “ononkhumbi mokonda yenyina lya Sesusi.” (Ovil. 5:40-42) Ohole vena na Sesusi yevekuatesileko okuhatili owoma onondyale mbavo. Iya valekesile okuti vena ohole, etyi vatuaileko okuivisa onondaka onongwa. Na hono, ovaumbili va Siovaa, vatualako okumuumbila namphila vamoneswa ononkhumbi. Tupu, vetyii okuti Siovaa nalumwe malimbwa ovilinga valinga, noluembia vena nenyina liae. — Heb. 6:10.

20. Oityi matulilongesa monthele mailandulako?

²⁰ Ovanthu vetuyele tupu, omokonda katulingi onthele youye. (Suau 15:19) Mahi katuesukisile okutila owoma, mokonda ngetyi matulilongesa monthele mailandulako Siovaa ‘metupameka . . . nokutuyakulila.’ (2 Tes. 3:3) Naina, tutualeiko okukala nohole na Siovaa, novakuatate, nonondyale mbetu. Inkha tulandula onondongwa ombo, matutualako newaneko, nekolelo liapama. Tupu matuetela omunkhima Siovaa. Otyiwa okunoñgonoka okuti oluembia, olo malutukuatesako okukoleleya tyina tumoneswa ononkhumbi.