Ndyina Ehambu Movilinga Vya Siovaa

Etyi palamba enima, ovakuatate avetupopila okuti ko Mbetele yoko Africa do Sul makusukisa ovakuatate opo vakaundape nonomakina onomphe mbokulinga omikanda (impressora). Ame andyiliave ndyende mahi ankho natila owoma. Ame novakuatate ovakuavo vetatu vomo Mbetele yoko Canada atukoyua tuende. Ankho pena omukuatate Dennis Leech na Bill McLellan na Ken Nordin. Ankho tuhanda umwe okukala mo Africa do Sul, omanima omanyingi!

Andyilikalela me, andyiti: “Me pena etyi nahanda okukupopila. Natumwa okukaundapa ko Africa do Sul!” Me ankho una ekolelo liapama noupama omuwa na Huku. Kapopile natyike mahi ankho ndyityii okuti mesala notyiho. Namphila ovo tate, kavanthyilikile okuenda mahi ankho vasoya mokonda mandyikakala kotyilongo otyikuavo.

ETYI NAYA KO AFRICA DO SUL!

Otyikando tyotete tuaile ko Mbetele yoko Brooklyn, atuho vekuana atulongeswa mokueenda kuonohanyi ononthatu oñgeni tupondola okuundapa nonomakina mbokulinga omikanda. Pokuenda ko Cape Town, mo Africa do Sul tuaendelele mombapolo ankho yatyinda omavai omanyingi. Ame ankho ndyina vala omanima 20. Etyi tuatunda nomboyo ko Cape Town okuenda noko Johannesburg ankho kuanthikovela. Etyi tyati kombimba atutalama mepunda-umbo litiwa Karoo, ankho likahi vala ngoluhandya. Ankho tyati vala ame nepuila mombundo nomomuihi, nokuatokotelwa. Atuho vekuana atutalela pondyela atumono omphangu imwe ongwa. Atulipopila okuti, mphuaino okuundapa kuno matyihiwa. Etyi palamba omanima amwe atuende pomphangu ina tuamuene, ankho pehiwa nawa.

Mokueenda kuomanima omanyingi, ankho ndyiundapa nomakina yokulinga Omutala Womulavi no Pahukei! Mombetele omo tupu mulingwa omikanda pala ovilongo ovikuavo vyo mo Africa. Tuahambukilwe unene etyi tuehimbika okuundapa nawa nonomakina onomphe mbatunda ko Canada!

Konyima andyiuundapa motyilinga otyikuavo. Andyikalela komutwe ovilinga viokulinga omikanda nokuvituma tupu novilinga viokupitiya. Ankho ndyina ovilinga ovinyingi mahi ankho ndyikahi nawa.

OTYINEPO TYANGE NOVILINGA OVIPE

Menima lyo 1968, atulinepe na Laura Bowen, ankho ukala popepi no Mbetele. Ankho omukokoli-ndyila mahi tupu uundapa mo Mbetele omupitiyi. Pomuvo pana tyina omunthu amanenepe ankho utunda mo Mbetele akakala omukokoli-ndyila wavilapo. Ame ankho nasukalala unene. Mo Mbetele ankho tupewa okulia, naapa tulala, mahi pahe oñgeni ankho mandyifete ovipuka ovio tyina tupewa vala oumbongo wehehi? Ankho kese umwe, mohanyi upewa ono rande 25. (kohale ankho ombongo oyo $ 35, dolale yo Amelika) Kese hanyi ankho tuna oola tuanakelwa tuundapa movilinga viokuivisa, tutalelapo ovanthu, nokuavela omikanda ovanthu. Konombongo ankho tupewa, tupolako mbokufeta olenda, nokulanda okulia kuetu, nokufeta momatuku-tuku tuendela, novihemba novipuka ovikuavo tuesukisa.

Atutumwa okukaundapa ngovakokoli-ndyila mepunda-umbo limwe popepi nepunda-umbo lyo Durban. Ankho mukala ono Indiu, mahi ovanyingi ankho ovana vovanthu ankho veile okuundapa mo fambilika yo suka mo Africa do Sul mo 1875. Pahe ankho vena ovilinga ovikuavo, mahi no ngotyo ankho vatualako noviso viavo, atee umwe ankho vateleka nawa. Tupu vapopia nawa o Ingelesi ngo onthue.

Ovakokoli-ndyila vavilapo ankho vena oku- undapa onoola 150 mokueenda kuohanyi, mokonda yotyo ame na Laura atulipakemo opo tuundape onoola epandu monthiki. Ankho kutokota unene. Mokonda ankho tutupu ovalongwa novanthu tutalelapo, otyo tyilekesa okuti matuivisa umbo na umbo onoola epandu. Tyina tuivisa umbo na umbo ankho tusoka okuti tuaundapa onoola ononyingi, mahi tyina namatale pololoso, mphuaina tuaundapa vala onominutu 40! Pahe ankho tulipula okuti: “Oñgeni matutyivili okuundapa ngovakokoli-ndyila vavilapo?”

Ankho tuesukisa okulionganeka nawa. Kese nthiki ankho tulinga onombolo no mayiyi, atupake mopasita iya tupu pamwe ankho tutyindya o kafe. Tyina ankho tuhanda okulia, tukala metuku-tuku popepi nomiti, iya pamwe ankho tuongelwa novana vova Indiu veya okututala mokonda tuelikalela navo! Mokueenda kuononthiki tyina tuamaundapa onoola onombali ine ononthatu, pahe omuvo ankho ulamba vala liwa.

Otyili tyo Mbimbiliya atyietela ehambu ovanthu vo mepunda-umbo lina! Tuavasile ovanthu ovanyingi ova Indiu ankho vena onthilo nokankhenda tupu vehole Huku. Ova Hindu ovanyingi ankho vetavela okulilongesa no onthue Ombimbiliya. Ankho vahambukwa unene okunoñgonoka Siovaa, na Sesusi, Nombimbiliya, nokuti komutwe wandyila matukala mouye omupe, tupu ankho vahambukwa okunoñgonoka okuti vavo vankhia vapondola okukatutiliswa. Etyi pakala omanima amwe atukala novalongwa 20. Ankho tuhambukwa unene okulia nonombunga mbovalongwa vetu.

Etyi pakala omuvo umwe andyipewa otyilinga otyikuavo, andyikala omutalelipo womawaneno. Ono simanu ambuho ankho tuenda pomaumbo ovakuatate, tuenda navo movilinga viokuivisa, tupu tuvepameka. Ankho tukala omuvo omunyingi novakuatate novana vavo. Omanima evali aalambe. Onthiki imwe ovakuatate voko Mbetele avandikalela. Avamphopila okuti: “Tukahi nokusoka ukondoke kuno.” Andyiveti: “Kuno tuli nawa, tuna ehambu.” Mahi no ngotyo ankho tuafwapo pala okuundapa mu kese tyilinga tuamapewa.

ETYI TUAKONDOKA MO MBETELE YO AFRICA DO SUL

Mo Mbetele andyiundapa Moseketa Yovilinga iya ankho ndyina elao liokuundapa novakuatate ovanyingi ovanongo. Pomuvo pana tyina omutalelipo womawaneno amamane okutalelapo ewaneno limwe, utuma omukanda ko Mbetele. Pahe Oseketa yovilinga aitumu omukanda kewaneno liatyo, okuatalela kuetyi omutalelipo womawaneno apopia. Omukanda oo ankho opala okuvepameka nokuvepopila ovipuka vesukisa okulinga. Ankho tyesukisa okupitiyila mo Ingelesi omikanda vitumwa novatalelipo vomawaneno velaka lyo Xhosa no Zulu, nomalaka omakuavo omo Africa. Mahi tupu omikanda ankho vipitiyua okupolwa momalaka ou okupakwa mo Ingelesi. Nahambukilwe unene okuundapa novakuatate vana vankhuatesileko okunoñgonoka ovitateka ovakuatate vetu nonomphange ovanthikovei ko Africa do Sul vena.

Momuvo umwe mo Africa do Sul, ovindele novanthikovei ankho kavapondola okukala kumwe. Ovakuatate vetu ovanthikovei mo Africa do Sul ankho vapopia omalaka avo muene, vaivisa momalaka avo iya tupu valinga omaliongiyo melaka liavo muene.

Ame ankho hanoñgonokele nawa ovakuatate ovanthikovei mokonda motelitoliu omu ankho ndyiundapa ovakuatate vapopia vala o Ingelesi. Pahe andyihimbika okulilongesa ovituwa viovakuatate ovanthikovei, noviso viavo. Nelilongesila unene kovitateka ovakuatate vetu ovanthikovei ankho vena, mokonda yoviso vilingwa apa vakala, novipuka vetavela. Ovakuatate vetu ankho vakola unene omutima. Mokonda ankho vesukisa okuaanya oviso vilingwa apa vakala viehelikuatela no Mbimbiliya namphila ankho vapondola okuyalwa nonombunga mbavo novo munthele yavo. Ovanthu ankho vahepa unene. Ovanyingi ankho kavalongesilwa–ale unene mahi no ngotyo ankho vena onthilo no Mbimbiliya.

Nali nelao liokukala ponomphela, opo tuyakulile ovakuatate vetu okuyekwa okuumbila Siovaa, nokuhelipake mo pulitika. Ekolelo liange liapamene unene etyi namona ovakuatate ovakuendye vakola omutima, vatatwa monosikola mbavo mokonda ankho vaanya okuimba inu, nokulikuambela momaliongiyo ankho alingwa monosikola mbavo.

Ovakuatate tupu vakalele novitateka ovikuavo mepunda-umbo limwe litwa Suazilândia. Etyi Ohamba Sobhuza II ankhia, ovanthu aveho ankho vakuluminyua okulinga oviso ankho vilingwa pomitambo ngetyi okulula. Ovalume ankho vena okukululwa onohuki, iya ovakai vanepwa vena okukululwa ekaku. Ovakuatate vetu nonomphange ankho vamoneswa ononkhumbi mokonda vaanya okulinga oviso ovio. Tuahambukilwe unene okumona oukuatyili wavo! Tuelilongesila unene kekolelo, noukuatyili, noumphua-lundo wovakuatate vomo Africa do Sul.

ANDYIKONDOKA OKULINGA VALI OMIKANDA

Mo 1981, andyikaundapa vali motyilinga tyokulinga omikanda. Ankho otyipuka nahalingi vali! Onkhalelo yokulinga omikanda ankho yapiluluka. Omulandesi umwe wonomakina mbokulinga omikanda aavela o Mbetele yo Africa do Sul o makina ike, vahetekele inkha ikahi nawa. Mokonda yotyo atulandesa onomakina etyive ankho tuna, atulande onomakina ononthano onomphe. Tupu amupakwa omakina omphe yokulinga omikanda. Ovilinga ankho viendelela vali!

Ono kombutadole mbetukuatesako okulinga ovilinga monkhalelo ikahi nawa, ankho tuundapesa o MEPS (Sistema de Editoração Eletrônica Multilíngue) Mokueenda kuomuvo omunyingi ankho tuundapa nonomakina ononene, mbuseta nokutokota unene, tuaetele mo Africa do Sul etyi tuatunda ko Mbetele yoko Canada! (Isa. 60:17) Pahe atuho vekuana atunepe, onomphange ovakokoli-ndyila vehole unene Siovaa. Ame na Bill tuundapa mo Mbetele. Ken na Dennis vekahi nokutekula onombunga mbavo.

Ovilinga mo Mbetele aviliyawisa unene. Pahe ankho pena omikanda ovinyingi vina okupitiyua, tupu nomalaka omanyingi ankho esukisa okulingilwa omikanda, nokutuma omikanda kono Mbetele ononkhuavo. Ankho tyesukisa Ombetele onkhuavo. Ovakuatate avatungu Ombetele omphe, ongwa, mepunda-umbo lyo Johannesburg, aipakulwa menima lyo 1987. Ndyina ehambu etyi nakuatesako ovilinga mo Africa do Sul, netyi nakalela komutwe ovilinga vilingwa mo Mbetele mokueenda kuomanima omanyingi mo Africa do Sul.

ANDYIPEWA VALI OTYILINGA OTYIKUAVO!

Tuahuvile unene etyi menima lyo 2001 tuakongwa opo tukaundape ko Estados Unidos iya ame andyikala umwe povo wo Komisau Yofiliale yoko Estados Unidos. Namphila ankho tuasoya mokonda yokuasapo ovilinga vietu nomapanga etu mo Africa do Sul, mahi no ngotyo ankho tuahambukwa okukala vombunga yo Mbetele yoko Estados Unidos.

Ankho tuasukakalala unene okusapo me ya Laura wakulupale. Ankho kamatutyivili okumutekula otyo tuli ko Nova York, mahi onomphange mba Laura vetatu avemukutasako muatyiho ankho esukisa. Avetupopila okuti: “Onthue katukahi movilinga viomuvo auho mahi inkha tukuatesako me, onwe mamutualako okulinga nawa ovilinga vienyi.” Ndyipandula etyi vetukuatesako.

Ngetyi tyalinga onomphange mba Laura, tupu omukulu wange nomukai wae ankho vakala ko Toronto mo Canada avatekula me ankho wasiwapo. Me ankho wakala nomukulu wange nomukai wae mokueenda kuomanima alamba po 20. Ndyivepandula unene mokonda yokuatekula me nokankhenda noluembia alo anyima etyi tuehika pahe ko Nova York. Ndyina ehambu limwe enene, mokonda ndyina ombunga yafuapo pala okukuatesako vakuavo aloo movilinga viepuiya unene!

Mokueenda kuomanima mo Mbetele yoko Estados Unidos ankho ndyiuundapa kokulinga omikanda, mahi pahe onkhalelo yokulinga omikanda ikahi vali nawa. Pahetyino ndyiundapa Moseketa Yokulanda ovipuka. Ndyihambukwa unene okusoka komanima 20 nakala pokati kovakuatate vaundapa mo Mbetele. Pahetyino vokukala mo Mbetele vehungi po 5.000 iya veya okuundapa-mo vala vehungi po 2.000!

Hilivele ovipuka nalinga mokueenda kuomanima 60. Omanima oo aeho Laura utualako okunkhuatesako. Unkhuatesako unene! Nali novilinga ovinyingi oviwa, ngetyi ovilinga viokuundapa novakuatate nokutalelapo ono Mbetele ononyingi mouye. Pahe ndyina omanima 80 ovilinga ankho ndyilinga pahe vilingwa novakuendye, mokonda vena ononkhono nekongoko likahi nawa.

Ombimbiliya yati: “Lina ombembwa elongo Huku yalio o Siovaa.” (Sal. 33:12) Onondaka ombo ombotyotyili! Ndyina unene ehambu liokuumbila Siovaa novakuatate nonomphange.