Oityi Ouye Weyulila Ovanthu Veliyele?

Opo tutyinoñgonoke, tete tuesukisa okunoñgonoka oityi oundyale. Oityi tyilingisa ovanthu avehimbika okuliyala? Iya oñgeni oundyale ukahi nokuliyawisa?

Oundyale Oityi?

Oundyale okuyele ovanthu vamwe, pamwe vehena etyi vekulinga mokonda vala ovo tyilongo otyikuavo. Oundyale hakunumanena vala pamwe omunthu.

OITYI TYILINGISISA OVANTHU OVAHIMBIKA OKULIYALA?

Ovanthu veliyele mokonda yovipuka ovinyingi. Vamwe veyele vakuavo hamokonda pena etyi vevelinga mahi omokonda vala yetyi vekahi. Ovanthu vana vokuyelwe pamwe vatalwa ngatyina vahasilivila, vehenale etyi vevila okulinga, vehenale oko vapilukila vaeta vala ovitateka pokati kavakuavo. Vana vokuyele vakuavo vetyilinga mokonda pamwe ankho vamonaisilwe ononkhumbi iya pahe vena onkhongo mokonda yovipuka ovivi valingailwe.

OUDYALE UKAHI NOKULIYAWISA UNENE

Omunthu umwe atee pamwe uyala vakuavo namphila pamwe vehenekaliale kumwe. Mongeleka, ovanthu vamwe veyele umwe vala vakuavo mokonda hamwe ombunga yavo aa omapanga avo kavevehande. Mokonda yotyo, ovanthu aveho avai umwe vala mokuehelihande vali.

Tyina tunoñgonoka oñgeni oundyale uliyawisa, tupu matunoñgonoka omokonda yatyi ovanthu ovanyingi veliyelele. Mahi, kuna vali otyipuka otyikuavo tyilingisa ovanthu okuliyala. Opo tutyinoñgonoke tete tuesukisa okunoñgonoka opi kuatuka oundyale. Otyipuka otyo matutyinoñgonoka vala mokutanga ondaka Huku Ombimbiliya.

OMBIMBILIYA IPOPIA OKU KUATUKA OUNDYALE

Otyipuka tyikahi ngelola, tyilekesa oñgeni oundyale ukahi nokuliyawisa. 1. Omatutu, konthele yovanthu vamwe, mo Internet, motelevisau no mono jornale. 2. Ovanthu kavesuku, novituwa viavakuavo, nongeleya yavakuavo. 3. Wokuti mavapilulula otyipuka tyimwe momwenyo wavo, mavevepolo ovipuka viavo, vokuehei etyi matyivemonekela. 4. Oundyale, okapungulula, okulingwa onya, nokuvetwa.

OKUEHELIHANDE KATYATUKILE MOVANTHU. Oundyale wahimbika etyi oandyu imwe keulu, Satanasi Eliapu yatyitukilapo Huku. Etyi Eliapu liatyitukilapo Huku alikala “omuipai.” Mokonda ankho “onkhembi iya ohe yomatutu,” ehimbika okuhongiliya ovanthu opo veliyale poyavo. (Suau 8:44; 1 Suau 3:11, 12) Ombimbiliya ipopia okuti Eliapu ekalavi unene, lianumana, tupu lina onyengo. — Jó 2:7; Eholololo 12:9, 12, 17.

MOKONDA OVANTHU OVAKUANKHALI TYIPEPUKA UNENE OKUYALA VAKUAVO. Omulume wotete Andau nae watyitukililepo Huku etyi etavela ku Satanasi. Mokonda yotyo ovanthu aveho vapiñgana onkhali. (Ova Loma 5:12) Omona wotete wa Andau Kai aipaa ondenge yae Abele. (1 Suau 3:12) Namphila kuna ovanthu vamwe vehole vakuavo tupu vena okankhenda, mahi mokonda yonkhali tuapiñgana ovanthu ovanyingi vena omalityindailo, vena onkhi, velipakako iya ovituwa ovio, ovio vieta okuliyala. — 2 Timotiu 3:1-5.

OMUNTHU UNA WOKUHAHANDE OVANTHU VOTYIVALA OTYIKUAVO UPONDOLA OKUVEYALA. Ouye uhongiliya ovanthu okuyala vakuavo mokonda uhongiliya ovanthu okukala novituwa ovivi. Ouye weyula tupu ovipuka ovivi ngetyi okapungulula, okulipopia omapita, okulipenya nokupunda ovipuka viavakuavo, omokonda “ouye auho utuminwa nondingavivi,” Satanasi Eliapu. — 1 Suau 5:19.

Ombimbiliya kaipopi vala opi kuatuka oundyale, mahi tupu itupopila etyi tuesukisa okulinga opo tuyekepo okuyala vakuetu.