OITYI MATYITUKUATESAKO OPO TUAHAYALE VAKUETU?

1 | Wahalinge Okapungulula

Ombimbiliya Ipopia Okuti:

“Huku utupu okapungulula, mahi momalongo aeho omunthu una onthilo nae nokulinga etyi tyaviuka umutavela.” — OVILINGA 10:34, 35.

Otyo Tyihangununa-tyi?

Siovaaa Huku ketutale okuti tuvanthu ovawa okutalela kotyilongo tuatyitilwa, notyivala tyetu, nomovanthu tuatuka. Mahi wesuka netyi tyili momutima wetu. Tyotyili, “omunthu utala vala kolupe mahi Siovaa utala mokati komutima.” — 1 Samuel 16:7.

Oityi Ove Upondola Okulinga?

Namphila tuehetyivili okutala etyi tyikahi mokati komutima womunthu, onthwe tupondola okuhetekela Huku, atuahalingi vakuetu okapungulula. Lityilika okutala ovanthu vamwe ngatyina vena vali esilivilo kuvakuavo. Inkha pamwe utala ovanthu vamwe ngatyina vena vali esilivilo kuvakuavo okutalela kotyilongo vatyitilwa, likuambela ku Huku ekukuateseko okulipola omalusoke oo. (Salmo 139:23, 24) Inkha wiita ku Siovaa nomutima auho opo ulipole okapungulula, matehelela elikuambelo liove, ekukuatesako. — 1 Petulu 3:12.

a Ngetyi Ombimbiliya ipopia, Siovaa enyina lya Huku. — Salmo 83:18.

“Ame ndyitupu onthiki nakalele peke nomunthu otyindele . . . Ankho pahe ndyivasiwa pokati kovafendi va Siovaa.” — TITUS

Etyi Tyaendele na Umwe—TITUS

Wetyivilile Okuyekapo Oundyale

Omulume umwe utiwa o Titus, ankho unumana unene mokonda yokapungulula. Mokonda yotyo, elipake motyikundyi tyonongangala ankho navo velitehela ngae. Wapopia okuti: “Ankho tuenda umwe ponomphangu apa ankho ovanthikovei vahatambulwa, ngetyi omono otele nomo no mbale, opo vala tukahinde omalwei.” Titus muene nae ankho utyii umwe okuti uyele vakuavo. Wapopia okuti: “Tyina namahimbika okutañguna nomunthu umwe, tyilinge omulume, tyilinge omukai, ame vala ankho ndyitetekela okumuveta.”

Mahi Titus apiluluka etyi ahimbika okulilongesa Ombimbiliya no Nombangi mba Siovaa. Etyi atanga mo Mbimbiliya, tyili atyimukuatesako umwe. Ahuvu unene etyi anoñgonoka okuti mouye omupe “ononkhia kamambukakala-ko vali, nii okuliyava, nii okulila nii omaluihamo kavikakala-ko vali.” — Eholololo 21:3, 4.

Ponthyimbi, Titus walingile ononkhono opo elipole okapungulula momutima wae. Wapopia okuti: “Tyepuiyile unene okupilulula onkhalelo yange yokusoka, novipuka ndyilinga.” Mahi tyemukuatesileko otyetyi anoñgonoka momukanda Ovilinga 10:34, 35, upopia okuti Huku kalingi okapungulula.

Ouwa patyi apolako? Titus wati: “Etyi namona okuti Onombangi mba Siovaa namphila vena ovivala vielikalaila tupu vakala movilongo vielikalaila mahi ovanthu velihole unene, andyikala nonthumbi yokuti veli mongeleya yotyotyili. Atee umwe etyi nehenembatisalwe, umwe mewaneno otyindele, ankhongo ndyikañguale keumbo liae. Otyipuka otyo ankho hityisoko. Ame ndyitupu onthiki nakalele peke nomunthu otyindele, pahe okulila peke nae mahi meumbo liae, ankho hityisoko. Ankho pahe ndyivasiwa pokati kovafendi va Siovaa.”