Omapulo Ovatangi

Oityi Sesusi ankho ahanda okupopia etyi ati: “Muhasokei okuti naeta ombembwa”?

Sesusi ankho ulongesa ovanthu vakale nombembwa na vakuavo. Mahi nthiki imwe wapopilile ono apositolu mbae okuti: “Muhasokei okuti naeta ombembwa pano pohi. Haetele ombembwa, mahi naeta omutunga. Mokonda ame naeta omaliyapauko, omukuendye mayale he, omuhikuena mayale ina iya omukuekai mayale inaivi.” (Mat. 10:34, 35) Oityi Sesusi ankho ahanda okupopia?

Hakuti Sesusi ankho uhanda okuyapaula onombunga, mahi ankho utyii okuti etyi malongesa otyo matyiyapaula onombunga ononyingi. Vana vahanda okukala ovalongwa va Kilisitu avambatisalwa, ankho vena umwe okusoka kovitateka vitundulila kuetyi mavalingi. Pamwe ankho vayalwa nombunga yavo mokonda yokufenda Siovaa, opo mavetyivili umwe okukakatela mondongeso ya Kilisitu.

Ombimbiliya ipopila ovakilisitau opo vakale ovanthu ‘vombembwa novanthu aveho.’ (Loma 12:18) Mahi etyi Sesusi alongesa, tyina omunthu ametyinoñgonoka, tyikala ngatyina uti “omutunga” ku vamwe. Otyo haunene tyimoneka-po putyina vamwe mombunga vetavela Sesusi, iya ava ovakuavo avemuanye. Otyipuka otyo pamwe tyieta umwe ‘oundyale’ omunene pokati kavo. — Mat. 10:36.

Ovalongwa va Sesusi vakala novanthu veli monongeleya ononkhuavo, pamwe vakala novitateka vilola ohole vena Siovaa na Sesusi. Mongeleka, umwe mombunga wehelilongesa, ukuluminya umwe mukuavo vende kotyipito tyongeleya. Tyina otyo tyamamoneka, vena okusoka liwa olie mavahambukiswa. Sesusi wapopia okuti: “Omunthu uhole vali unene he ine uhole vali ina tyipona ame, kafuilepo opo akale omulongwa wange.” (Mat. 10:37) Mahi Sesusi ankho kekahi nokuti ovanthu vena okumuhumba vali, avayale ovohe. Ankho ukahi vala nokuvelongesa vakoye okulinga otyipuka tyina vali esilivilo. Ine umwe mombunga yetu utuyele mokonda yokufenda Siovaa, onthwe tutualako okumuhumba, mahi tyityii okuti tuhole vali unene Huku tyipona ovanthu.

Tyotyili, okuyalwa nombunga tyiihama unene. No ngotyo, tuahalimbwei-ko etyi Sesusi apopia okuti: “Una uhetavela omuti wae wemone andandula, kafuilepo opo akale omulongwa wange.” (Mat. 10:38) Monondaka ononkhuavo, tyina ovakilisitau vakala ovalongwa va Kilisitu, ongatyina veliava opo vayalwe nonombunga mbavo. Mahi no ngotyo vena onthumbi yokuti ovituwa viavo oviwa, mavikuatesako vavo vehelilongesa navo avetavela Ondaka ya Huku. — 1 Pet. 3:1, 2.