Tyokulinyengwa Tyamana Ouye
“Ame apeho ndyilitehela vala ñgaa nalinga vala unene otyiho, naapa umwe vala ndyipumphi andyike mondywo.”
“Mwene pahe ndyilii umwe nawa, ndyiti vala nga nahambukwa, hikala-po-ale ehimbwe nkhatehela nasoya umwe unene.”
“Ame ndyilikwatehila umwe nahalinge otyiho nonthiki ya muhuka mahi pamwe ndyikati vala ñgaa otyiho tyeya umwe otyinene.”
Ovanthu vapopia onondaka ombo o vokuna onombela mbokulinyengwa, nokulimbaililwa vala. Okuti noove otyo uhole okukala ngootyo? Okuti noove una onombela mbatyo ngoombo? Okuti una ou wakalela una onombela mbatyo ngoombo?
Ine otyo uhole okukala ngootyo have vala. Hono ovanthu ovanyingi veli nokutumbukilwa nonombela mbatyo ngoombo. Vamwe vakalela ava vena onombela mbatyo ngoombo.
Tyotyili, tuli umwe “momuvo walema unene” mweyula vala ovipuka vitutokotesa omutwe. (2 Timotiu 3:1) Vokwatanga vati ovanthu ovanyingi mouye veli nokutumbukilwa nouvela wokulinyengwa. Mahi pahe tyevila-po umwe vali okuhimbikila mo 2020, momukihi Wokolona Vilu.
Otyiwa umwe okunoñgonoka okuti ovanthu ovanyingi veli nokumona emone kombanda youvela oo wokulinyengwa. Mahi otyipuka tyesukisa vali okutala etyi ove naava mukala navo muna okulinga mwahalinge otyiho otyinene tyimweetela ouvela ngoo, neetyi una okulinga tyina una ouvela oo.
Omunthu utiwa utupu onombela mbokulinyengwa oyou ukahi ñgeni?
Omunthu utiwa utupu onombela mbokulinyengwa, oyou ukahi umwe vala nawa, novilinga viae mwene uvilinga umwe nawa, wahati pamwe akala ñgana utehela ngoti welilovola, na tyina ena otyiho hamwe una etyi tyemutokotesa omutwe usoka umwe nawa etyi ena okulinga.
Onombela mbokulinyengwa . . .
OTYO HAKUTI ngootyo omunthu kesilivila.
OUVELA UMWE utwala omunthu kokusoka vala unene, nokwahasoko-ale nawa, nokuliunga-unga vala. Tyimupilulula umwe novipuka alinga aviehena oko viyemba.
Pamwe pahe uyemba vala kokulieeleka na vakwavo, otyo tyimusoyesa vala, novipuka ankho alinga ahevivili-ale vali.
Ouvela utumbukila ovanthu vatyo aveho, ovana novakulu, vomihoko viatyo aviho, vovivala viatyo aviho, vo monongeleya ambuho, vokwatanga no vokwahatangele, ovahona no vokwahepa.
Etyi tyipondola okukwatesako vokulinyengwa vala
Ine ove ukati ñgana olumphoki kulumono, nokulia kuli-ale nawa, utehela ñgana apa uli una vala otyiho nokuliunga-unga vala, hamwe tupu o mukwenyi mukala nae ukahi ngootyo, pamwe tyahanda umwe wende kosipitali ukatalwe oityi tyina nokukulingisisa ngootyo.
Omunongo umwe omunene wali-ale pano pohi, Sesusi Kilisitu, wati: “Ovanthu vakongoka kavesukisa omuhakuli, mahi vana vavela vesukisa omuhakuli.” (Mateusi 9:12) Vokuna onombela mbatyo ombo mbokulinyengwa vala, mwene ine vavasa umwe onondotolo mbatyo mbokutyivila okutyihakula, avapewa umwe ovihemba viatyo, vapondola umwe okukala nawa. Otyiwa umwe tyina ulitehela otyo ukahi ngootyo, otyo tyikukondaukila vala, ohakala vali ehimbwe oende kosipitali ukatalwe.a
Ombimbiliya yahula okuti hamukanda-ko upopia ovihemba omunthu ena okuhakulwa navio, mahi etyi ipopia tyipondola okukwatesako vana vena ouvela wokulinyengwa. Ine tyitavela umwe, tanga ononthele ambuho mbulandula kweei, mbupopia oñgeni Ombimbiliya ipondola okukwatesako ou una ouvela wokulinyengwa.
a Omutala Womulavi kaupopi ovihemba patyi una okunwa, munthu na munthu mwene pahe oe una okutala etyi ena okulinga.