4 | Onondunge Mbuli M’ombimbiliya

Oityi Otesitu Oyo Yahanda Okupopia

Namphila Ombimbiliya hamukanda-ko upopia ovihemba tuna okuhakulwa navio, mahi muna onondunge mbupondola umwe okutukwatesako. Onondunge mbuli-mo mbupondola okukwatesako vana vokuna ouvela wokulinyengwa nokulimbaililwa. Nkhele tala vala etyi tyapopia onotesitu mbumwe.

Oñgeni Onondunge Mbuli M’ombimbiliya Mbutukwatesako

“Ovanthu vakongoka kavesukisa omuhakuli, mahi vana vavela vesukisa omuhakuli.” — MATEUSI 9:12.

Ombimbiliya itupopila umwe okuti otyiwa umwe okwenda kosipitali tukahakulwe. Ovanthu ovanyingi vokuna ouvela wokulinyengwa tyevekalaisa umwe nawa, tyina vamaende konondotolo mbuyumbwa umwe onthumbi, ambuvepopila oñgeni vekahi.

“Okuhataika unane-nane monongolo, tyikalesa nawa olutu.” — 1 TIMOTIU 4:8, Ombimbiliya Contemporary English Version.

Okulinga umwe ovipuka ngeevi, okulinana-nana monongolo apeho, nokulia umwe ovikulia vikahi nawa, nokulangalapo omutenya upululukwe-po umwe nawa, tyipondola umwe okukwatesako wokuna ouvela wokulinyengwa nokulimbaililwa vala, autepuluka umwe katutu.

“Omutima wahambukwa otyihemba, mahi omutima wanumana ukukutisa omankhipa.” — PROVÉRBIOS 17:22.

Okutanga onondaka mbuli m’Ombimbiliya mbupameka, nokupanga evi tuvila okulinga, tyitukalesa umwe nawa, atukala apeho nehambu. Tupu okusoka kovipuka oviwa tuna-vio-ale, nokusoka okuti ovipuka komutwe wandyila mavikaviuka, tyikwatesako umwe unene ava vokuna ouvela wokulinyengwa.

“Vena onondunge o vokwapola pokati.” — PROVÉRBIOS 11:2.

Tyina wamatale pahe kutyivili vali okulinga awike ovipuka aviho wahanda okulinga, tavela ku vakwenyi tyina vahanda okukukwatesako. Tolela omapanga ove novenyi o movipuka patyi uhanda okukwatesiwako mokonda pamwe ngwe vahanda umwe okukukwatesako mahi kevetyeete-vo etyi ñgeno vekulingila. Etyi vamalingi-ko vala, tyilinge otyitutu tyilinge otyinene pandula.

Onondunge Mbuli M’ombimbiliya Mbuli Umwe Nokukwatesako Vokuna Ouvela Wokulinyengwa

“Etyi netyimona okuti tyafwa hikahi nawa, andyiende ankhaovola ondotolo. Ondotolo navasa ainthale umwe aimphopila ouvela ndyina-o. Pahe andyimono umwe okuti naina hikahi nawa andyikaovola onondotolo mambunthyakula umwe nawa ouvela ndyina-o.” — Tyapopiwa na Nicolau,a una ouvela umwe wokulinyengwa utiwa transtorno bipolar.

“Netyimona umwe okuti okutanga Ombimbiliya ononthiki ambuho nomukai wange, tyinkhalesa umwe nawa andyihimama nokusoka kovipuka vikahi nawa. Netyimona-mona-le ehimbwe, onthiki pamwe nehehimamene nawa, ndyimona umwe ovelesikulu imwe y’Ombimbiliya imphameka umwe omutima.” — Tyapopiwa na Petulu una ouvela wokulinyengwa.

“Ankho tyimphona unene okupopila vakwetu ouvela ndyina-o mokonda tyinkhundisa. Mahi omuhikwena umwe epanga liange ankhwatesa-ko umwe, anthehelela nawa. Otyo alinga tyotyili tyankhalesile umwe nawa andyityimono umwe okuti naina hike-ko.” — Tyapopiwa na Ji-yoo, una ouvela wokulinyengwa, umupa umwe okwahali nawa.

“Ombimbiliya yankhwatesako umwe pahe ndyilinga umwe vala evi ndyivila okulinga. Tupu ndyilangala-po omutenya ndyipululukwe umwe nawa. Onondunge mbuli-mo mbankhwatesako umwe andyityimono etyi ndyina okulinga nouvela ou ndyina-o wokulinyengwa vala.” — Tyapopiwa na Timotiu, una ouvela wokulinyengwa, umupa umwe okulimbililwa.