Huku Wesuka Umwe Noove
M’ombimbiliya omo tuvasa onondunge mbukahi nawa mokonda yatunda ku Huku. Ombimbiliya hamukanda-ko upopia ovihemba tuna okunwa, mahi onondunge mbuli-mo mbupondola okutukwatesako tyina pena etyi tyetwiihama komutima, tyetutokotesa omutwe, na tyina tuna ouvela wokulinyengwa nomauvela omakwavo vali.
Mahi otyipuka tyesukisa vali Ombimbiliya ipopia, okuti Omutungi wetu Siovaa,a utwii vali nawa kovanthu vakwetu. Utwii umwe nawa, wii nawa etyi tusoka, wii etyi tyitukalesa nawa neetyi tyitukalesa omapita. Ngwe wahanda umwe okutukwatesako movitateka aviho vitutumbukila. Tala vala etyi tyapopia onotesitu ombu onombali mb’Ombimbiliya mbututulisa omutima:
“Siovaa uli popepi navana veihamenwa komutima; uyovola vana vokuli nokumona ononkhumbi.” — SALMO 34:18.
“Mokonda ame Siovaa Huku yove, ndyikwata mokulio kwove, ame una wokukupopila okuti: ‘Wahakale nowoma. Ame mandyikukwatesako.’” — ISAÍAS 41:13.
Mahi pahe oñgeni Siovaa etukwatesako tyina tuna ouvela wokulinyengwa? Mononthele mbulandula kweei mwapopiwa ovipuka Siovaa alinga vilekesa okuti tyili wesuka umwe noonthwe, ya uhanda okutukwatesako.
a Siovaa enyina lya Huku. — Salmo 83:18.