2 | ‘Ovihonekwa Vitupameka’

OMBIMBILIYA YATI: “Ovipuka aviho viokuahonekwa kohale, viahonekwa opo vitulongese, na tukale nekevelelo mokonda yokukoleleya kuetu nepameko litunda Movihonekwa.” — OVA LOMA 15:4.

Oityi Otesitu Oyo Yahanda Okupopia

M’ombimbiliya mwapopiwa ovipuka ovinyingi vipondola umwe okutwavela ononkhono atutyivili okukoleleya tyina momutwe mwameya omalusoko omavi. Tupu itupopila okuti apa katutu otyo tyokulinyengwa matyikalinga otyipuka tyokwalamba.

Oñgeni Otyo Tyipondola Okutukwatesako

Ovanthu atuho, pamwe uti umwe okala-po utehela pena tyimwe tyekutokotesa omutima. Mahi vana vokuna ouvela wokulinyengwa vala, nokulimbaililwa, ovo vapondola otyo umwe vala vakalela ononthiki mbatyo ambuho. Oityi Ombimbiliya ipopia tyipondola okuvekwatesako?

M’ombimbiliya mweyula onondunge ononyingi mbupondola okutukwatesako atulipolo omalusoko apenga. (Ova Filipu 4:8) Ine onondunge mbatyo ombo, ombo tuyulisa momutwe wetu, mambututulisa umwe omutima, atutyimono etyi tuna okulinga tyina tuna omalusoko apenga. — Salmo 94:18, 19.
Na tyina umwe pamwe tusoka okuti katusilivila-le, Ombimbiliya ipondola umwe okutukwatesako olusoko lwatyo olo atulipolo-lo. — Luka 12:6, 7.
M’ombimbiliya muna onotesitu ononyingi mbuyumbisa-ko umwe onthumbi okuti katukahi atwike, tuna Huku yetu utwii nawa, wii umwe nawa neetyi tyitwiihama. — Salmo 34:18; 1 Suau 3:19, 20.
Ombimbiliya itupopila okuti Huku makapola momitwe vietu evi vitwiihama, avieheya vali komutima. (Isaías 65:17; Eholololo 21:4) Ine tuna ouvela wokulinyengwa nokulimbaililwa, okusoka kwootyo Huku makalinga tyipondola umwe okutwavela ononkhono, atutyivili okukoleleya.

Ombimbiliya Ina Umwe Nokukwatesako Ovanthu Jessica

Okulinyengwa Tyinkhalesa Omapita

“Pweetyi ndyina omanima 25, nakati vala ñgaa nthiki imwe hiliivite-ale nawa. Etyi natwalwa kosipitali, andyitiwa ndyina ouvela wokulinyengwa. Otyipuka otyo naina ankho tyatuka umwe kokusoka unene kovipuka vimwe nalingailwe kohale. Onondotolo ambumphopila okuti, ouvela oo ndyina-o watuka umwe kovipuka vimwe nalingailwe kohale, viti tyina namevisoko vindyihama. Andyipewa umwe ovihemba viatyo, mahi tupu ankho nesukisa okwenda konondotolo mambunkhwatesako nahasoke vali kovipuka ovio.”

Ombimbiliya Ina Umwe Nokunkhwatesako

“Nga tyambasa tyokulinyengwa, ndyilitehela natila vala unene owoma, nalinga vala unene otyiho, nolumphoki nii hilumono. Pamwe kounthiki ndyikatehela momutwe wange mweya vala omulusoko omanyingi ehekahi nawa. Ngeetyi tyipopia o Salmo 94:19, Huku upondola umwe okutupameka, nokututulisa omutima tyina otyo yatyo tyokusoka omapita tyameya momutwe. Pahe, ndyipaka Ombimbiliya yange, nomukanda wange apa nahoneka onotesitu mbumphameka, ponthele poula wange. Tyina nehena olumphoki, ndyitanga onotesitu mbumwe mb’Ombimbiliya, ndyiive onondaka Huku apopia mbunthulisa omutima.

“Mwene Ombimbiliya ituti umwe tuna okulipola omalusoko apenga. Kohale ankho ndyisoka okuti, ame hisilivila-le, petupu-ale ou unthyole, no kouye ndyitupu-ale etyi ndyilinga-ko. Mahi ovipuka ovio havio-ko Ombimbiliya itupopila, mokonda ina yati, Huku o Tate yetu wolwembia, wokankhenda, usuka noonthwe atuho. Katutu-katutu andyityivili umwe, na tyina tyameya-po pahe ndyilikwatehila. Netyivila okulitala ngeetyi Huku anthala. Otyo tyankhwatesako umwe unene, andyilipolo atyiho ankho ndyisoka tyapenga tyina ndyilitala.

“Ame ndyikevelela omuvo kwahamakakala vali ovipuka aviho vinkhalesa omapita. Okunoñgonoka okuti tyokulinyengwa, nokulimbaililwa, apa katutu mavikalinga ovipuka viokwalamba, tyimpha umwe ononkhono andyityivili okukoleleya pehepano, otyo ndyisoka vala komutwe wandyila tyina pahe mandyikakala umwe tyehena vali ouvela watyo ou.”