3 | Lilongehila Kwaava Vapopiwa M’ombimbiliya

M’OMBIMBILIYA . . . Mwapopiwa ovanthu ovanyingi, ovalume novakai ankho vafenda Huku, navo ankho ‘ovanthu vala ngoonthwe.’ — TIAKU 5:17.

Oityi Otesitu Oyo Yahanda Okupopia

M’ombimbiliya mwapopiwa ovanthu ovanyingi, ovalume novakai vali novitateka ovinyingi, atyiti ou tyemukalesa ñgaa ou tyemukalesa ñgaa. Pokutanga Ombimbiliya, tupondola okuvasa-mo umwe wasokele umwe ngeetyi noonthwe tuli nokusoka.

Oñgeni Otyo Tyipondola Okutukwatesako

Ovanthu atuho twahanda ñgeno vakwetu vetunoñgonoka, haunene umwe una una ouvela wokulinyengwa, nokulimbaililwa. Ine tutanga evi vialingaile ava vapopiwa m’Ombimbiliya, matutyimono umwe okuti navo ankho vasoka umwe vala ngoonthwe. Opo pahe matutyimono umwe okuti naina hanthwe vala tuna-tyo tyokulinyengwa, tupu matutyimono etyi tuna okulinga tyina twamakala nomalusoko ahaviukile.

M’ombimbiliya tupu muna onondaka ononyingi mbapopailwe novanthu vatyo ovo ankho vehulilwa, vatile na tyina velitehela ñgaa ngoti ankho vetupu-ale ou uvekwatesako. Okuti nthiki imwe watile-ale: ‘Pahe nelilovola, hahe tyikale-po vala?’ Oo Mwisesi na Eliya na Ndaviti, navo vetyikalele-ale ngootyo. — Números 11:14; 1 Reis 19:4; Salmo 55:4.
Ombimbiliya ituhipululila omukai umwe utiwa o Ana “weihamenenwe unene” kombanda yokwahamono ovana, notyipuka ankho alingwa omukwele na mukai mukwavo vanepwa nae. — 1 Samuel 1:6, 10.
Ombimbiliya ipopia omulume umwe utiwa o Sombe, wehikile umwe kokupopia otyipuka tyimwe pamwe noonthwe tyipondola twapopile-ale. Namphila ali omulume uyumba onthumbi mu Siovaa, weihamenenwe umwe unene, ehiki kokuti: “Nelilovola; nomwenyo watyo ou heuhandele-ale vali.” — Jó 7:16.

Okunoñgonoka etyi ovanthu ovo valingile vetyivile umwe okulipola omalusoko oo ahaviukile, noonthwe tyipondola umwe okutwavela ononkhono, atutyivili okukoleleya tyina tuna evi vitwiihama komutima.

Ombimbiliya Ina Umwe Nokukwatesako Ovanthu Kevin

Ndyina Ouvela Umwe Utiwa Transtorno Bipolar Unkhalesa Omapita

“Pweetyi ndyihungi kokuvetesa omanima 50, opo natalwa nonondotolo andyitiwa ndyina ouvela umwe wokulinyengwa vala utiwa transtorno bipolar. Pamwe ndyilitehela umwe ñgaa andyiti ovipuka aviho vala vinthumbukila tyafwa himevivili-ale vali, ine nankhile vala pahe ñgeno hahe vali.”

Ombimbiliya Ina Umwe Nokunkhwatesako

“Omunthu umwe wapopiwa m’Ombimbiliya wali umwe novitateka ngo viange, omu apositolu Petulu. Walingaile ovipuka vimwe viemutwaile umwe kokusoka okuti tyafwa kesilivila-le. Petulu ahasoko vala unene kovipuka vimusoyesa, mahi asoko vali unene komapanga ae vesuka nae. Ame pahe tyina tyamati umwe ouvela watyo ou wambasa, andyisoko vali kovipuka pamwe ndyilinga viokupengesa-le vala, ndyilitehela umwe ngoti hisilivila-le vali. Pahe ndyilinga umwe nga Petulu, netyimona okuti pomivo viatyo ngoopo otyiwa ndyisoke komapanga ange vahanda umwe okunkhwatesako nahasoye.

“Omunthu omukwavo wapopiwa m’Ombimbiliya, uti umwe tyina na masoko ovipuka alingaile tyimphameka unene, Ohamba Ndaviti. Pamwe ankho usoya unene mokonda yovipuka ovivi alingaile. Naame ndyilitehela umwe ngae, mokonda pamwe ndyilinga umwe otyipuka tyimwe, tyina haa nametyisoko, andyilivele umwe. Onondaka Ndaviti apopia mo Salmo 51 mbumphameka omutima. Movelesikulu 3 wati: ‘Ame mwene ndyii ononkhali mbange. Onkhali yange kaipu-ko komutima wange.’ Ngwe ongootyo umwe ndyikala tyina tyameya tyokulinyengwa kwatyo oko, na tyina pamwe ndyisoka ñgaa, ndyilitehela nelilovola umwe. Tupu pamwe ndyisoka umwe ngeetyi Ndaviti apopia movelesikulu 10, wati: ‘Huku yange mphevo omutima wasukuka, paka mokati kange omalusoke omape, apama.’ Naame pamwe otyo ndyiita otyo ku Huku ankhwateseko ndyikale nolusoko lwaviuka tyina nahanda okusoya. Ovelesikulu onkhwavo imphameka umwe omutima, ovelesikulu 17 yati: ‘Ove Huku, ove kumaanye omutima wateka-teka, omutima wamiangaulwa.’ Ovelesikulu oyo inkhalesa umwe nonthumbi yokuti Huku naina unthyole.

“Okusoka kovanthu ovo vapopiwa m’Ombimbiliya, no kweevi Huku eli-ale nokumpha pehepano, tyimpha umwe ononkhono ndyikevelele koviwa matukamona komutwe. Ame ndyiyumba-ko umwe onthumbi kweevi Ombimbiliya yati mavikamoneka apa katutu. Otyo tyimpha umwe ononkhono ndyityivile okukoleleya.”