[okupolelela kokumbili okwenda no kokulio] O Marcelo, o Yomara, o Hiver. Aveho vetatu vakwata on’Ombimbiliya mbavo, Ombimbiliya Ikola Yaava Ekevelelo Liouye Omupe mo braile
Vetyimona Umwe Okuti Vevehole
YOMARA nonomphange mbae oo Marcelo na Hiver, vakala mosandyala imwe mepunda-umbo lyo Guatemala. Yomara etyi ahimbika okulilongesa Ombimbiliya Nonombangi mba Siovaa, pakala vala kapii nonomphange mbae avahimbika okulilongesa. Mahi pahe ankho matyipwilisa-po tyike vala, aveho vetatu ovamphoki, ngwe kavetyivili okutanga o Braile. Pahe ankho wokuvelongesa uvetangela vala apa veli nokulilongesa, nonotesitu mbatyo mbuli-po.
Tupu tyevepwilisile unene okwenda komaliongiyo mokonda okutunda peumbo liavo okwenda Kondywo Yomaliongiyo paendwa onominutu 40, ngwe aveke vala kavetyivili okweenda otyikambo otyo atyiho. Mahi vomewaneno avevekwatesako vakale pomaliongiyo atyo aeho. Etyi pahe vahimbika okupewa ononthele meliongiyo lyo mokati kosimanu, vakwavo mewaneno avevekwatesako vapake momutwe etyi mavakapopia.
Tyina tyiti mohanyi ya Maio yo 2019, no mosandyala yavo amuhimbika okulingilwa omaliongiyo. Pomuvo watyo opo, pena ovakokoli-ndyila vamwe vevali velinepa vailukilile mosandyala yavo. Ovakokoli-ndyila ovo, omphango ankho vena-yo okuvelongesa aveho vetatu vetyivile okutanga nokuhoneka o braile, namphila ngwe ankho vehetyivili-ale okwiihoneka nokwiitanga. Avahimbika okutanga unene vanoñgonoke o braile, no oñgeni ilongeswa ovanthu.
O Marcelo uli nokukumbulula meliongiyo
Pakala vala onohanyi ononthatu, ovamphoki ovo vetatu avahimbika okutanga umwe nawa-nawa o braile, otyo pahe atyivekwatesako avahimbika okukula motyili.a Pehepano pahe oo Yomara na Marcelo na Hiver ovakokoli-ndyili vomuvo auho. Marcelo omukwatesiko wovakulu vewaneno. Aveho velipaka unene movilinga vya Huku onosimanu ambuho. Ehambu liatyo vena-lio movilinga vya Huku, na vakwavo vala vakala navo tyivepa umwe okuundapela Huku nombili.
Ovamphoki ovo vetatu vapandula unene otyipuka vakwatehiwako newaneno. Yomara wati: “Tundee vala apa nahimbika okulimona Nonombangi, netyimona okuti Ovakilisitau umwe votyotyili vena olwembia.” Marcelo wati: “Onthwe tuna omapanga omawa mewaneno lietu, tupu tuli mombunga imwe yelikwata-po yaoya ouye watyo auho.” Oo Yomara nonomphange mbae, vakevela nehambu enene onthiki ohi maikala omphangu yombembwa. — Salmo 37:10, 11; Isa. 35:5.
a Ombulusula yokwati: Lilongesa Okutanga o Braile, yalingilwa umwe ovamphoki no vokwahamono-po nawa vetyivile okutanga nokuhoneka o braile.