Oityi Molingi Utyiliye Tyina Wamailukila Mewaneno Ekwavo

Oo Nicolas na Céline otyitateka vali natyo tyelikalela. Vatuminwe no Mbetele yo ko França vailukile mewaneno ekwavo avetavela. Vapopia vati: “Potete twahambukilwe umwe, mahi pahe atyiketulemena vali mokonda ankho tweivaluka omapanga etu. Mewaneno twailukila nkhele ankho tutupu-mo nawa-nawa omapanga.”a Okutala ovitateka ovio omunthu akala navio putyina ailukila kewaneno ekwavo, pahe oityi ove molingi utyiliye liwa mewaneno wailukila? Wokwailukila mewaneno ekwavo oñgeni makwatesiwako na vakwavo? Oviwa patyi ove wokwailuka momono? Oityi upondola okulinga ukwateseko ewaneno wailukila?

ONOTESITU ONONKHWANA MUNA ONONDUNGE MAMBUKUKWATESAKO

1. Yumba onthumbi mu Siovaa. (Ovii. 37:5) Umwe utiwa o Kazumi ukala ko Japão, una mewaneno akalele omanima 20, etyi omulume wae vovilinga vemutuma kokukwavo, mewaneno omo ailuka-mo. Oñgeni “apakulile ondyila yae ku Siovaa?” Wapopia wati: “Ankho ndyipopila Siovaa atyiho tyili komutima wange, evi vinthilisa owoma, na tyina namelitehela ngoti ndyimulike, neevi vindingisa otyiho. Apeho tyina namalingi ngootyo Siovaa umpha umwe ononkhono nakamba.”

Oityi una okulinga onthumbi yove mu Siovaa ikule? Onthumbi mu Siovaa yafwa omuti wokutwikwa. Usukisa okutapelelwa aupakwa ombumbi opo ukule. Nonthumbi yetu mu Siovaa tuna okwipaka ombumbi opo ikule. Nicolas twapopia-le, etyi asoka umwe nawa etyi tyalingile Ambalayau na Sesusi na Paulu, ovanthu vasile-po ovipuka ovinyingi vetyivile okulinga etyi Huku ahanda, atyipameka onthumbi yae mu Siovaa, etyimono okuti memukwatesako. Okulilongesa apeho Ombimbiliya, kamatyikwavela vala ononkhono utyivile okulwisa ovitateka vikutumbukila, mahi tupu matyikumanekesa omono etyi upa vakwenyi mewaneno wailukila.

2. Wahahande ovipuka vilifwe vala. (Omup. 7:10) Jules etyi atunda ko Benin ailukila ko Estados Unidos, wamwene okuti ovituwa vyo ko Estados Unidos vielikalela unene. Wapopia wati: “Kuna namona okuti omunthu wamavasi, wahanda okunoñgonoka etyi wakala-kala natyo momwenyo wove.” Mokonda onthwe kotyilongo tyetu hatyo-ko twetyiliya ngootyo, pahe andyihimbika okukala vala andyike andyilipolo ku vakwetu mewaneno. Etyi anoñgonoka umwe nawa vakwavo mewaneno, ehevepolo-po vali omapita. Wapopia wati: “Netyimona okuti kombanda yeheke apeho vala apa twamaende, ovanthu vekahi vala otyipuka tyike. Velikalela vala pokutomphola pokulinoñgonoka, noomu valingila ovipuka. Otyiwa umwe okuti omu ovanthu vakalela ngaamo uvetyiliyila.” Naina wahahande ovanthu vomewaneno wailukila velifwe no vooku watunda. Omukokoli-ndyila umwe utiwa Anne-Lise, wati: “Tyina namailuka hakuti opala nkhavase evi nasa-po, mahi opala nkhanoñgonoke evi ame nehei.”

Omukulu wewaneno wailukila kewaneno ekwavo, una okuliyunga kokuhanda etyi ankho valinga ovipuka kewaneno atunda, ñgeno otyo valinga mewaneno omu eli. Okuti ava valinga ñgaa ava valinga ñgaa, katyapengele. Naina otyiwa tete okunoñgonoka oityi ava wavasa valingila ngootyo ovipuka, haa opopi nawa etyi wasoka. (Omup. 3:​1, 7b) Hahe vali ove nkhele okulinga vala etyi wii okuti otyo tyaviuka vakwenyi vatalele-ko, tyipona okuveti ngaliti pano tuna okulinga ñgaa. — 2 Kol. 1:24.

3. Undapa newaneno. (Fili. 1:27) Tyokwiluka otyiliya tyiseta ya tyipwilisa. Mahi otyiwa okuti vala hikee oku wailukila, ohimbika okwenda komaliongiyo. Tyina tyetavela oende umwe Mondywo yatyo Yomaliongiyo, ohatalela vala monovindiu. Ine vomewaneno wailukila kavekumono, okuti hatyo hamwe vekumona vala pamwe-pamwe, navo kamavetyivili okukukwatesako. Lucinda, uhinangela oñgeni tyaendele etyi tyati nae novana vae vevali vailukila mepunda-umbo limwe enene mo Africa do Sul. Wati: “Omapanga ange vamphakailile-mo okuti ndyina okulipaka mokuundapa unene na vakwetu mewaneno movilinga viokwivisa no momaliongiyo. Atupopila vakwetu mewaneno okuti tupondola okulingaila peumbo lietu eliongiyo liokukaivisa.”

“Okututumbila kumwe na vakwenyi” pokuundapa movilinga vya Huku mewaneno wailukila, otyo tyikukwatesako upameke “eyumba-nthumbi liove moviwa ovipe.” Anne-Lise twapopia-le, wapelwe ondundo novakulu vewaneno aovole onomphitilo mbokuundapa novaivisi aveho movilinga viokwivisa. Oñgeni otyo tyemukwatesako? Wati: “Hasetele-po-ale andyimono okuti naina omunthu otyo ena okulinga opo etyiliye liwa.” Okulipaka movilinga viokukomba Mondywo Yomaliongiyo nokwiviukisa, natyo matyikupake pokati ka vakwenyi mewaneno. Ine uundapela kumwe na vakwenyi mewaneno kumasete-ale, matyiti umwe na vakwenyi vekutyiliya, noove otyiliya ombunga wavasa.

4. Ovola omapanga. (2 Kol. 6:​11-13) Okusuka na vakwenyi otyo matyikukwatesako okukala nomapanga. Naina kala na vakwenyi tyina eliongiyo liehenehimbike, na tyina liamapu, otyo mutomphola mulinoñgonoke nawa. Kwata umwe nawa omanyina avo weheelimbwe. Okuhinangela omanyina a vakwenyi okala ondyandyi, nokusuka novanthu, otyo matyieta vakwenyi no kwoove, omono vali omapanga ekahi nawa.

Etyi ukahi mwene otyo ukala, na vakwenyi ngoomo vekunoñgonokela umwe. Wehesuke unene neetyi ove wehevili. Linga ngeetyi tyapopia Lucinda wati: “Pehepano tuna oupanga omuwa na vakwetu mokonda tuhole okuveihana veye meumbo lietu.”

“LIYAKULEI-VO NAWA NA VAKWENYI”

Okunyingila Mondywo Yomaliongiyo muna vala ovanthu wehei, ku vamwe tyilema. Oityi ove una okulinga opo ava vailukila mewaneno lienyi tyivepepukile? Omutumwa Paulu wati: “Liyakulei-vo nawa na vakwenyi, lingei nga Kilisitu wemuyakula-vo nawa.” (Loma 15:7) Ine ovakulu vewaneno vahetekela Kilisitu, mavetyivili okukwatesako ava vailukila mewaneno, navo avetyimono umwe okuti vayakulwa nawa. (Tala okakasa kati: “Oityi Tyikwatesako ou Wailukila Mewaneno Ekwavo.”) Okuyakula nawa vakwetu, pamwe okuveihana umwe veye keumbo lietu, mahi tupu pamwe okuvekwatesako movipuka vesukisa.

Tala vala etyi tyalingile omuhikwena umwe. Etyi umwe ailukila mewaneno liavo, emutyindi-po avakaenda-enda aveho mepunda-umbo, otyo emupopila opi apondola okuvasa omatuku-tuku tyina ena oku ahanda okwenda. Otyipuka otyo omuhikwena oo alinga mukwavo, atyimukalesa nawa, nae etyiliya liwa.

OMPHITILO ONGWA YOKUKULA

Otyimphunia-mphunia tyina tyamekulu-ko kapii, tyilitetula opo omavava etyivile okukatuka tyityivile okunthanana. Noonthwe tyina twamailukila mewaneno ekwavo, tuna okulinga ngatyina uti tulitetula atulipolo evi vitutyika, opo omavava etu akatuke tutyivile okunthanana movilinga vya Siovaa. Oo Nicolas na Céline vapopia vati: “Mokwilauka omu tukopa-mo oviwa ovinene. Okulityiliya novanthu ankho twehei, nokutyiliya otyilongo otyikwavo, tyitwavela omphitilo atukala nonontheto ankho tuhena.” Jean-Charles twapopia-le, wapopia oviwa nae no vomeumbo liae vakopa mokwailukile. Wati: “Tyokwailuka tyakwatesako ovana vetu avekulu motyili avakala noupanga wapama na Siovaa. Twakala vala onohanyi mbehehi omona wetu omukainthu etavelwa alinge-linge ononthele meliongiyo lyo mokati kosimanu, omukwendye watyo akala omwivisi.”

Pahe molingi ñgeni ine omu wakalela nkhele katyitavela okwilukila kewaneno ekwavo kwesukisa ovaivisi? Opo naina linga ngatyina uti wailukila mewaneno ekwavo, olingi ovipuka twapopia monthele ei. Yumba onthumbi mu Siovaa, undapela kumwe newaneno, ovola onomphitilo mbokuundapa na vakwenyi movilinga viokwivisa, pameka oupanga wenyi na vakwenyi. Ava nkhele vehemapanga ove, ovola onomphitilo mbokukala noupanga navo. Tupu soka kweetyi una okulinga ukwateseko ava vailukila mewaneno lienyi. Ine ukala nolwembia na vakwenyi mokulu motyili, mokonda olwembia olo otyilimbo ty’Ovakwa-Kilisitu votyotyili. (Swau 13:35) Tyotyili, “ovilikutila viatyo ovio, ovio Huku ehole.” — Hemb. 13:16.

Namphila okwiiluka katyapepukile, mahi ovanyingi vetyivila okutyiliya momawaneno vailukila. Noove motyivili! Anne-Lise wati: “Okwailukila mewaneno ekwavo tyankhwatesako okuhandyula omutima wange.” Kazumi pahe wetyimona okuti okwiluka, “Siovaa ukukwatesako movipuka noove wehenemone-ale.” Ya Jules oñgeni akala? Wati: “Omapanga nakala nao ankhwatesako andyikala umwe nawa, kuti-ale nailukila mewaneno ekwavo. Pahe netyiliya umwe, na tyina ndyisoka ñgaa ine haa ndyitunda-mo matyindemena.”