Okuti Ankho Utyii-ale?

Okutyi tutyimonena okuti oviimbo ankho viesukisa unene kova Isilayeli?

OVA ISILAYELI ankho vetyihole unene tyokwiimba. M’Ombimbiliya mwapopiwa ovipuka ovinyingi ova Isilayeli ankho vahika pokwiimba, noviimbo vaimbaile. M’Ombimbiliya, otyinyingi-mo vali oviimbo. Oviimbo viatyo ovio, tuvivasa momukanda watyo mwene w’Oviimbo, no momukanda w’Otyiimbo tya Salomau, no momukanda Onongengeya. Omukanda umwe upopia evi vialingailwe pomuvo wahipululwa m’Ombimbiliya (Music in Biblical Life), wati: “[Ombimbiliya] ityipopia umwe nawa okuti, ova Isilayeli povipuka ovinyingi ankho valinga, apeho ankho vaimba.”

Okwiimba nthiki na nthiki. Ova Isilayeli, moviimbo omo ankho vapopila etyi tyili komutima wavo. (Isa. 30:29) Tyina vamatilisa onondyale mbavo, na tyina pena ou uvialekwa, no povipito viavo, ovafikwena ankho vahika onopandelu, otyo vanyana, otyo vaimba. (Ovak. 11:34; 1 Sam. 18:​6, 7; 1 Oha. 1:​39, 40) No putyina vanyimisa omunthu, pokumulila vaimba. (2 Ehi. 35:25) Omukanda umwe wahonekwa nomukulu umwe utiwa o John McClintock na umwe utiwa o James Strong, wati: “Tyimoneka umwe nawa okuti ova Isilayeli ankho vetyihole tyokwiimba.”

Okwiimbila mombala. Onohamba mbova Isilayeli ankho mbutyihole tyokutehelela oviimbo. Ohamba Saulu yaihanene Ndaviti aye mombala yae opo emwimbaile-po. (1 Sam. 16:​18, 23) Na Ndaviti yatyo etyi akala Ohamba, wali novihumba viae viokuhika, wahonekele oviimbo, tupu waovolele ovanthu vaimba pokufenda Siovaa. (2 Ehi. 7:6; Amo. 6:5) Ohamba Salomau wali novaimbi ovakwendye novafikwena mombala yae. — Omup. 2:8.

Oviimbo pokufenda Siovaa. Ova Isilayeli ankho vaimba pokufenda Siovaa. Mondywo ya Huku mo Selusalei, mwali ovaimbi vena 4.000. (1 Ehi. 23:5) Ankho vahika omalata, novihumba, novisandyi, nononkhwino. (2 Ehi. 5:12) Mahi havo vala ovo ankho vafenda Siovaa noviimbo. Ova Isilayeli ovanyingi tyina ankho venda kotyipito tyilingwa like menima ko Selusalei, ankho vaenda nokwimba Oviimbo vyo Movilondeka. (Ovii. 120–134) Ova Isilayeli ankho vaimba otyiimbo tyimwe tyitiwa o Halelea tyina valia Opasikwa. Otyiimbo otyo tyapopiwa m’Oviimbo.

Na hono, oviimbo viesukisa unene kovanthu va Siovaa. (Tia. 5:13) Noonthwe pokufenda Siovaa twiimba. (Efe. 5:19) Tulikwata-po na vakwetu tyina twimbila kumwe oviimbo pokufenda Siovaa. (Kolo. 3:16) Tupu vitupameka tyina tuli nokukondya novitateka. (Ovil. 16:25) Oviimbo, omphitilo imwe ongwa tuna-yo yokulekesa okuti tuyumba onthumbi mu Siovaa, tumuhole.