Omapulo Ovatangi

Ondywo yokunyingilila yo komutwe wondywo ya Huku okwaya no peulu ankho ina onokovandu onoñgapi?

Ondywo yatiwa oyokunyingilila, ondywo ankho ili kombundi yondywo ya Huku. Mondywo omo, omo ankho munyingililwa pokwenda momphangu ikola. Ombimbiliya Ikola Yaava Ekevelelo Liouye Omupe, yalingwa etyi twehenehike mo 2023 yati: “Ondywo yokunyingilila yo komutwe wondywo, mounthanda ankho ilifwe nondywo yatyo, ankho ina onokovandu 20. Okwaya no peulu ankho ina onokovandu 120.” (2 Ehi. 3:4) No n’Ombimbiliya mbumwe, mbuti umwe Ondywo yokunyingilila ankho ina onokovandu “120 okwaya no peulu,” otyo okuti ankho ina onometulu 53.

Mahi okuhimbikila mo 2023, Ombimbiliya Ikola Yaava Ekevelelo Liouye Omupe, pokwapopia ondywo yokunyingilila yo komutwe wondywo ya Huku yatungilwe na Salomau, yati: “Okwaya no peulu ankho [ina] onokovandu 20,” onokovandu 20, onometulu mbukehika 9.a Pahe tala oityi otyipuka otyo tyapilulukila.

Momukanda 1 Onohamba 6:3 kamwapopilwe opi ondywo yokunyingilila ankho ilifwe okwenda no peulu. Movelesikulu oyo Selemiya wapopia-mo vala oulaale wayo, nondywo yayawiswa-ko, ahapopi apa ankho ilifwe okwenda no peulu. Pahe movelesikulu 7 wapopia-mo ovipuka ovikwavo viali pondywo ya Huku, apopi-mo elunga liotyivela tyayokwa, noutuku-tuku 10, nonomphandyi 2 mbotyivela otyitasu, mbapakwa kombundi yondywo yokunyingilila. (1 Oha. 7:​15-37) Ine tyili-tyili ondywo yokunyingilila okwenda no peulu ankho ina onometulu mbulamba 50 oityi Selemiya ehetyipopilile? No pweetyi umwe palamba-le omanima omanyingi, ova Sundaa ankho vetyipopia okuti ondywo yokunyingilila ankho handaande-ko vali tyipona ondywo ya Huku Salomau atungile.

Vokwatanga velipula ine kovimato viondywo ya Huku ankho kupondola okuyawiswa vali otyimato tyina onokovandu 120 okwenda no peulu. Kohale ovimato viokwaya no peulu viatungwa nomamanya, hamwe omatisolu, ngeetyi tyali ovimato vyo konombundi mbokufendela vyo ko Isitu, elisesu liatyo ankho lilinga enthanda pombwelo keulu alihiti. Mahi ondywo ya Huku yokwatungilwe na Salomau ankho hatyoko ikahi ngootyo. Vokwatanga vati ondywo ya Huku yatungilwe na Salomau, mounthanda ankho itupu onokovandu mbulamba 6. Onokovandu 6 onometulu 2.7. Theodor Busink, wali omuhipululi wovipuka vyo kohale, una apa honeka onondaka ombu wati: “Pokwatala apa ankho pelifwe otyimato [tyondywo ya Huku kombundi] mounthanda, tyimoneka umwe okuti ondywo yokunyingilila ankho itupu onokovandu 120 [okwaya no peulu].”

Tyipondola pokwakopiyala onondaka mbuli mu 2 Ehipululo 3:4 pena tyimwe tyeveponyene. Namphila ovihonekwa vimwe povelesikulu oyo vipopia okuti ankho ina onokovandu “120,” mahi tupu ovihonekwa ovikwavo navio viyumbwa onthumbi, vipopia okuti ankho ina “onokovandu 20.” Ovihonekwa vimwe vipopia ngootyo, o Códice Alexandrino (yomo século 5), no Códice Ambrosiano (yomo século 6). Oityi hamwe tyalingisisa wokwakopiyalele, ahoneka okuti “onokovandu 120”? Melaka lyo Hembeleu ondaka “otyita,” nondaka “onokovandu,” mbelifwa unene. Naina, tyipondola wokwakopiyalele tyemuponya, ahoneka “otyita” ahahoneka “onokovandu.”

Mahi mwene tyina tututumba nokunoñgonoka ovipuka viali pondywo ya Huku yatungilwe na Salomau, etyi tusuka vali natyo otyetyi ondywo oyo ilekesa. Ondywo oyo ilekesa eumbo enene lya Huku. Onthwe tupandula unene mokonda Siovaa wetukonga atuho tumufendele meumbo lyae enene! — Hemb. 9:​11-14; Ehol. 3:12; 7:​9-17.