Okuti Utyihinangela?

Okuti welilongesa Omutala Womulavi wa Kupupu atee wa Kayovo wenima lino? Ine welilongesa-o, tala ine utyivila okukumbulula omapulo aa:

Oityi Siovaa alinga tyitulongesa oñgeni tuna okutekula ovakai?

Kevelingi okapungulula, kati ovalume vesukisa vali kovakai. Uvetehelela, usuka novakai, usuka neevi vasoka, novitateka vakondya navio. Uveyumba onthumbi, uvepa ovilinga meongano liae. — Omutala Womulavi wa Kupupu yo 2024, pefo 15-16.

Oityi tuna okulinga tulandule etyi tyapopia Ova Efesu 5:7 yokwati: “Onwe mwahalingei tyavo”?

Omutumwa Paulu wetulondola twahalinge oupanga novanthu vapondola okutuyapula movitumino vya Huku. Otyo tyati umwe, tyilinge okulivasa navo, tyilinge omo Internete, no motelevisau. — Omutala Womulavi wa Tyitalale yo 2024, pefo 22-23.

Oityi twesukisila okulunguka tyina twameivi omatutu?

Tuna okulunguka kweevi vitunda ku vakwetu tufenda navo pamwe veiva vala otyipuka avehetyitale ine otyili umwe, no konomesase mbunyingila vala monotelefone mbetu nooku mbatunda atwehekwii-ale, no ko vokwatyitukila-po otyili valinga ngoti vesuka notyili. — Omutala Womulavi wa Tyikukutu yo 2024, pefo 12.

Oityi twii, ya oityi twehei, tyiyemba kweetyi Siovaa makalinga Ohamba Salomau, naava vankhile mo Sondoma nomo Ngomola novo pononthiki mba Nowee?

Katutyii ine vankhia umwe tyokwakakota, Siovaa kamekevetutilisa vali. Mahi etyi twii okuti, etyi malingi otyo tyaviuka, ngwe una okankhenda okanene. — Omutala Womulavi wa Kapepo yo 2024, pefo 3-4.

Tya Siovaa okwatiwa “Onkhanda” tyituyumbisa-ko onthumbi yokuti malingi-tyi? (Epal. 32:4)

Tupondola okuholama mu Siovaa. Uyumbwa onthumbi, apeho etyi apopia utyilinga. Etyi ekahi otyo vala, kapilauluka, nonomphango mbae kambupilauluka. — Omutala Womulavi wa Pepo Linene yo 2024, pefo 26-28.

Oityi molingi utyiliye tyina wamailukila mewaneno ekwavo?

Yumba onthumbi mu Siovaa, mekukwatesako ngeetyi akwataisile-ko ovafendi vae vo kohale. Wahahande ovipuka aviho vilifwe vala, avikala ngo kewaneno oku watunda. Undapa newaneno, ovola omapanga mewaneno wailukila. — Omutala Womulavi wa Kakwenye yo 2024, pefo 26-28.

Oityi tulilongesila komihe vitatu vili mu Mateusi okapitulu 25?

Omuhe wonongi novinkhombo, utulongesa okuti tuna okuyumba onthumbi mu Huku, atwehemuyeke-po. Omuhe wovahikwena vokwalunguka no vokwatopa, utulongesa okuti tuna okukala apeho tyafwa-po, tyavindya. Omuhe wonotalendu, utulongesa okuti tuna okukala ovanthu vonduvia, vesuka novilinga. — Omutala Womulavi wa Tungonkhe yo 2024, pefo 20-24.

Ondywo yokunyingilila yo komutwe wondywo ya Huku okwaya no peulu ankho ina onokovandu onoñgapi?

Ovihonekwa vimwe vyo kohale viti ankho ina onokovandu “120 okwaya no peulu,” otyo okuti ankho ina onometulu 53. Mahi ovihonekwa ovikwavo navio viyumbwa onthumbi, vipopia okuti ankho ina “onokovandu 20.” Etyi tyapopia evi viokwati ankho ina “onokovandu 20,” tyatamo umwe okutalela kweetyi tyatungilwe ovimato viondywo ya Huku. — Omutala Womulavi wa Kulindi yo 2024, pefo 31.

Onondaka mbokwati omukwatesiko wovakulu vewaneno una okukala “nomukai wike” mbupopia-tyi? (1 Tim. 3:12)

Otyo tyilekesa okuti una okukala vala nomukai wike, kapondola okulala nou vehelinepele nae. Tupu tyilekesa okuti una okuhula vala komukai wae no momutima, ahapeleya ou wehe-wae. — Omutala Womulavi wa Kuhuhu yo 2024, pefo 19.

Oityi tutila etyi tyivasiwa mu Swau 6:53, tyelikalela neetyi Sesusi apopile Pondalelo ya Tatekulu?

Momukanda wa Swau 6:53 Sesusi wapopia okuti tuna ‘okulia ohitu yae nokunwa ohonde yae.’ Onondaka ombo wembupopilile ova Sundaa ankho ena-vo ko Ngalileya menima 32 P.K. Ova Sundaa nkhele ankho vesukisa okuyumba vali onthumbi mu Sesusi. Apakala umwe otyikonda tyenima, nthiki imwe pokuli mo Selusalei auku Ondalelo ya Tatekulu. Onondaka apopia Pondalelo, ankho uli vala nokumbupopila vana makatumina navo keulu. — Omutala Womulavi wa Kayovo yo 2024, pefo 10-11.