Kala Epanga Liotyotyili

OKUTI nthiki imwe watumbukililwe-ale notyitateka, tyina ulitehela ñgaa ngoti wike vala natyo, petupu-ale ou uli nokukukwatesako? Pamwe tyili matulitehela umwe ngoti twike vala, mokonda tuli “mononthiki mbalema, ononthiki mbepwiya okukala,” ya pamwe mapamoneka umwe evi vipondola okutusoyesa, atulitehela okuti ngoti twike vala. (2 Tim. 3:1) Mahi onthwe evi vitutokotesa omutwe, katupondola okututumba navio atwike. Ombimbiliya ipopia okuti otyiwa okukala nomapanga otyotyili maetukwatesako “putyina tyatokota.” — Omih. 17:17.

OITYI OMAPANGA OTYOTYILI ALINGA ETUKWATESEKO

Momaungendi omutumwa Paulu alingile, wakwatesilweko nomapanga ae. (Kolo. 4:​7-11) Etyi Paulu akwatwa, mo Loma, omapanga ae vemulingilile-ko ovipuka ankho ehevili vali okulinga. Epafolonditu watwailile Paulu ovipuka vimwe vo kewaneno liova Filipu vemutumikisile. (Fili. 4:18) Tikiku ankho utwala omikanda vya Paulu komawaneno. (Kolo. 4:7 tala okatoi m’Ombimbiliya yokulilongeswa moputu) Mokonda yomapanga ae vemukwatesileko, Paulu wetyivilile umwe okwivisa, nokupameka vakwavo momawaneno, namphila ankho akwatwa. Oityi una okulinga noove hono ukale epanga liotyotyili?

Na hono kuna umwe ovanthu vatiwa omapanga otyotyili. Elisabet omukokoli-ndyila woko Espanha, wapopia okuti pena omuhikwena umwe epanga liae wemukwatesileko unene. Etyi Elisabet atiwa me yae una câncer mahi kamahupu-ale, wati omuhikwena oo epanga liae, emuhonekela o mesase, apake-po onotesitu mbumupameka. Elisabet wati: “Etyi natanga omesase oyo, andyikala nawa andyityimono umwe okuti naina pena omunthu usuka naame, anehelitehela vali okuti ndyimulike.” — Omih. 18:24.

Tupu tupondola okukwatesako vakwetu tufenda navo, vomewaneno lietu. Okuti ine una etuku-tuku ya mewaneno lienyi muna ou wakulupa upondola okukemutyinda-po mwende nae keliongiyo, hamwe omovilinga viokwivisa? Ine otyo ulinga ngootyo, moti umwe ove ukala nehambu, ove tupu upamekwa. (Loma 1:12) Vamwe tufenda navo kavaenda-enda, vakala vala momaumbo. Oityi tupondola okulinga tuvekwateseko?

KALA EPANGA LIOTYOTYILI KWAAVA VAKALA VALA MEUMBO

Vamwe tufenda navo kavavete-mo nawa, ovakwavo vena vimwe vivetyika avehetyivili okuya apa tulingila omaliongiyo. Nomukulu umwe utiwa o David ankho o ngootyo. Etyi atiwa una ouvela umwe utiwa o câncer, akala umwe onohanyi epandu nokuhakulwa vala. Momuvo eli nokuhakulwa, ankho vatalela vala omaliongiyo pondywo motelefone nomukai wae Lidia.

Oityi vakwavo mewaneno valingile vevekwateseko? Vamwe mondywo yomaliongiyo ankho vati tyina eliongiyo liamapu, nkhele avatomphola noo David na Lidia motelefone. Tyina oo David na Lidia vamakumbulula meliongiyo, vakwavo vomewaneno avevehonekela okamukanda avapake-po onondaka mbuvepameka. Otyipuka otyo ovo David na Lidia tyevekalesile ñgeni? Vetyimwene okuti vakwavo mewaneno vevehole kaveke-ko vala.

Okuti upondola okupanga okwivisa na vana vakala vala meumbo? Tupondola okupilulula etyi ankho tulinga pokukaivisa, atupange okukaivisa navo opo tyimoneke okuti katwevelimbilwe. (Omih. 3:27) Upondola okwenda peumbo liavo mukaivise navo, amuhonekela ovanthu omikanda nokuvelikalela. Ava vokukala vala momaumbo, navo vapondola okutehelela eliongiyo liokwenda movilinga viokwivisa, avelitehelelela vala motelefone. Otyipuka otyo, ovo David na Lidia vetyipandulile unene. David wati: “Okutehelela etyi vakwetu vapopia peliongiyo olio nokutehelela elikwambelo namphila o mokamuvo kehehi vala, tyetupamekele unene.” Tupu pamwe ine tyetavela, upondola okwenda nomunthu ulongesa Ombimbiliya peumbo liovaivisi vakala vala peumbo, ngapo mukelilongesila.

Tyina twivisa na vakwetu tufenda navo vakala vala meumbo, tuvenoñgonoka vali nawa, tunoñgonoka ovituwa oviwa vena-vio, atukala vali omapanga. Tyina wenda navo movilinga viokwivisa omono ounongo vena-o pokulongesa Ondaka ya Huku, otale oñgeni vetyivila okupopia etyi tyihika komitima viovanthu, mokala vali nonthilo navo. Tyina uvekwatesako okwenda komaliongiyo no movilinga viokwivisa mokala vali nomapanga omanyingi. — 2 Kol. 6:13.

Paulu wapamekelwe unene etyi epanga liae Titu ekemutalela-po. (2 Kol. 7:​5-7) Noonthwe tupondola okupameka vakwetu ha mweevi vala tupopia, mahi na tyina twovola omuvo wokukala navo, atuvekwatesako mweevi vesukisa. — 1 Swau 3:18.

KALA EPANGA LIOTYOTYILI LYA VANA VELI NOKUHUKAISWA

Vakwetu tufenda navo voko Russia veli nokulinga otyipuka tyimwe otyiwa, velikwatesako na vakwavo. Tala etyi tyalingilwe umwe utiwa o Sergey nomumee wae Tatyana. Nthiki imwe onopulisa mbeile meumbo liavo, ambulongaulula ovipuka viavo, pahe avai navo vekevepule ovipuka vimwe. Tatyana ngae utetekela okupulwa pahe avemuyeke akondoke keumbo. Sergey wati: “Tatyana wati vala hikee meumbo akuya omuhikwena umwe ombangi weya okumutala, akuya vali omapanga etu omakwavo avetukwatesako okuviukaisa nawa mondywo yetu.”

Sergey wapopia vali wati: “Ndyihole unene Omihe 17:17 yati: ‘Epanga liotyotyili, oyou ukuhole umwe apeho, ulinga omukulu wove, ondenge yove, owove no putyina tyatokota.’ Pomuvo ankho tuli nokuhukaiswa twesukisile unene okukwatesiwako nomapanga. Siovaa wetwavelele omapanga otyotyili etukwatesileko unene, ankho etupu owoma wokukala ponthele yetu.”a

Mokonda tuli momuvo wepwiya tuli nokututumba novinyingi, tusukisa umwe okukwatesiwako nomapanga etu. Mahi matukesukisa okukwatesiwako vali unene nomapanga etu, mononkhumbi ononene. Naina tulikwatehilei tukale omapanga otyotyili pehepano. — 1 Pet. 4:​7, 8.