Lipaka Koututu Otavela Okuti Vimwe Kuvii

1. Siovaa wetutunga ñgeni, oityi etutungila ngootyo?

SIOVAA wetutunga umwe nawa, twati umwe onthwe tusoka, onthwe tutyivila okukungunyika nokunoñgonoka ovipuka, onthwe tupu tuvanongo. Oityi Siovaa etutungila ngootyo? Siovaa uhanda tuvase ‘enoñgonoko Liae,’ atukoyo-po okumufenda mokonda twemunoñgonoka. — Omih. 2:​1-5; Loma 12:1.

2. (a) Okuti twii ovipuka aviho? (Sombe 37:​23, 24) (Tala olutalatu.) (b) Omokonda yatyi otyiwa okunoñgonoka okuti pena ovipuka vimwe twehei?

² Namphila Siovaa etutunga nounongo wokunoñgonoka ovipuka, mahi no ngootyo, tuna apa tuhulila. (Tanga Sombe 37:​23, 24.) Nkhele tusokei vala ku Sombe, Siovaa watompholele na Sombe emulingi omapulo omanyingi, Sombe etyimono umwe okuti una ovipuka ovinyingi ehei. Etompho olio, alimukwatesako okulipaka koututu, apilulula etyi ankho eli nokusoka. (Som. 42:​3-6) Noonthwe tupola-ko ouwa tyina tulipaka koututu atwiimbuka okuti pena ovipuka ovinyingi twehei. Okuhinangela okuti pena ovipuka ovinyingi twehei, matyitukwatesako okulipaka koututu, atuyumbu-ko onthumbi yokuti Siovaa apeho metupopila etyi twesukisa okunoñgonoka, tulinge ovipuka nonondunge. — Omih. 2:6.

3. Oityi matulilongesa monthele ei?

³ Monthele ei, matulilongesa ovipuka vimwe twehei, atutale omokonda yatyi tyipondola okutulemena okwahanoñgonoka ovipuka ovio. Tupu matulilongesa omokonda yatyi otyiwa, okuhanoñgonoka ovipuka vimwe. Okulilongesa ovipuka ovio, matyitukwatesako okuyumba vali onthumbi mu Siovaa, “wokuna enoñgonoko liaoya,” utupopila etyi onthwe twesukisa okunoñgonoka. — Som. 37:16.

ONTHWE KATUTYII ONALUPI ONTHYULILO MAIYA

4. Omu mutyipopila Maluku 13:​32, oityi onthwe twehei?

⁴ Tanga Maluku 13:32. Onthwe katutyii onalupi onthyulilo youye uno maiya. Na Sesusi etyi eli pano pohi, nae ankho kei “onthiki nii oola.”a Sesusi wapopilile ovatumwa vae okuti Siovaa oe Omuvaluli Omunene, ovipuka vimwe, mwene vili vala “kolutei lwae.” (Ovil. 1:​6, 7) Mwene onthiki onthyulilo youye uno maiya, Siovaa wii-ale, mahi onthwe katwatele-mo mokunoñgonoka onalupi onthiki oyo maiya.

5. Mokonda onthiki onthyulilo maiya katwii tyipondola okutukalesa ñgeni?

⁵ Okutalela kweetyi Sesusi apopile, onthwe tyili katutyii omuvo ulifwe-pi matukevelela atee onthyulilo iya. Mokonda yootyo, tupondola atwahapu vali elundo atusoyo, haunene umwe ine apa twahimbika okukevela onthiki ya Siovaa, palamba-le omuvo omunyingi. Otyikwavo tyipondola okutusoyesa, okulingwa omukwele no vetu mwene, novanthu ovakwavo vali. (2 Pet. 3:​3, 4) Pahe tupondola atusoko atuti, ine twanoñgonokele onthiki onthyulilo maiya, opo ñgeno twetyivila okupwa-elundo, atukoleleya tyina ovanthu vetulinga omukwele.

6. Oityi tutila otyiwa okuhanoñgonoka onthiki onthyulilo maiya?

⁶ Etyi Siovaa alinga tyokwehetupopila onthiki onthyulilo maiya, tyitwaavela omphitilo yokulekesa okuti tumufenda tupu, omokonda tumuhole, tumuyumba onthumbi. Onthwe katufende Siovaa tyisoka vala konthiki onthyulilo maiya, ngatyina uti ankho iseta onthumbi yetu maitende atuyeke-po okumufenda. Onthwe kamatumufende vala atee konthyulilo youye ou, matumufende pala apeho. Twahakalelei vala okusoka onalupi “onthiki ya Siovaa” maiya, tusokei vala kovipuka oviwa mavikamoneka tyina onthiki oyo yamalambe. Ine otyo tulinga otyo, matulingi omapanga omanene a Siovaa, atumuyumbu vali onthumbi, atulingi ovipuka viovanthu valinga onthilo Huku, atumuhambukiswa. — 2 Pet. 3:​11, 12.

7. Ovipuka patyi onthwe twii?

⁷ Otyiwa tusoke vala haunene kovipuka twii-ale. Onthwe tutyii okuti ononthiki mbahulilila mbahimbika menima lyo 1914. M’Ombimbiliya Siovaa wapopia omaulo alekesa umwe nawa okuti ononthiki mbahulilila mbahimbika-le menima lyo 1914, tupu wapopile oñgeni ovipuka ankho mavikala tyina ononthiki ombo mbamahimbika. Mokonda omaulo oo eli umwe nokulifwilapo, twayumba-ko onthumbi yokuti “onthiki onene ya Huku ili popepi.” (Sof. 1:14) Tupu tutyii okuti otyilinga Siovaa ahanda tulinge, okupopila ovanthu aveho twevila-ko “oviwa ovipe Viouhamba wa Huku.” (Mat. 24:14) Ya oviwa ovipe vili-ale nokupopiwa movilongo vihungi po 240, momalaka alamba po 1.000. Katusukisa-le okunoñgonoka “onthiki noola” onthyulilo maiya, opo tuundape nombili movilinga ovio viesukisa unene.

ETYI SIOVAA MALINGI ETUKWATESEKO KATUTYII

8. Onondaka “ovilinga vya Huku yotyotyili” mbulekesa-tyi? (Omupopi 11:5)

⁸ Ha apeho onthwe tunoñgonoka ‘ovilinga vya Huku yotyotyili.’ (Tanga Omupopi 11:5.) Onondaka ombo mbulekesa okuti Siovaa upondola okuhinda ovipuka vimwe, okuti hatyo, eviyeke vimoneke, vifwisepo etyi ahanda. Onthwe katutyii nawa-nawa oityi Siovaa ayekela otyipuka tyimwe tyimoneke, tupu katutyii nawa-nawa etyi malingi etukwateseko tyina twamatumbukilwa na tyimwe. (Ovii. 37:5) Ombimbiliya ipopia okuti onthwe katwii ovilinga vya Huku, ngeetyi twehei oñgeni olukembe meimo lukula. Novanongo vokwatanga umwe unene, kavetyii nawa-nawa oñgeni olukembe meimo lukula.

9. Mokonda yokwehei nawa-nawa etyi Siovaa malingi etukwatesako oityi tupondola okusoka?

⁹ Mokonda katwii umwe nawa-nawa etyi Siovaa malingi etukwateseko, pokupanga etyi tuhanda okulinga tupondola okungwangwana. Pamwe momutwe tyipondola umwe okuya-mo tyokuundapa vali unene movilinga viokwivisa, nokulipola vimwe, nokwenda oku kwesukisa ovaivisi. Mahi mokonda katwii nawa-nawa etyi Siovaa malingi etukwatesako, tupondola atulikondola. Tupu tupondola atulingi otyiho tyokuti ine twovola otyilinga tyimwe meongano atwehetyivasi, Siovaa kamahambukwa. Ine tuundapa unene movilinga viokwivisa atuhakala novalongwa Siovaa kamahambukwa. Ine pena tyimwe tyitupona motyilinga tyimwe meongano, Siovaa kamahambukwa.

10. Mokonda katutyii nawa etyi Siovaa malingi etukwatesako, otyo tyitukwatesako okukala ovanthu patyi?

¹⁰ Okwehei nawa-nawa etyi Siovaa malingi etukwatesako, tyitukwatesako okukala ovanthu vekahi nawa, velikondola koututu, vapola pokati. Okulikondola koututu, nokupola pokati, tyitukwatesako okunoñgonoka okuti omalusoke a Siovaa, aya vali peulu apona po etu. (Isa. 55:​8, 9) Tupu tulilonga okuyumba onthumbi mu Siovaa, atukevela vala kwe, tyityii okuti ovipuka meviende-ka nawa. Pahe tyina twametyivili okulongesa ovanthu movilinga viokwivisa, aa okulinga nawa otyilinga tyimwe meongano, ou tupandula vala o Siovaa. (Ovii. 127:1; 1 Kol. 3:7) Ya ine ovipuka kaviende ngeetyi ankho tusoka, tuna okuhinangela okuti Siovaa ovipuka aviho uvieete. (Isa. 26:12) Onthwe tuna vala okulinga-ko tyetu, atuyumbu-ko onthumbi okuti Siovaa malingi-ko tyae, metukwatesako. Onthwe twayumba-ko onthumbi yokuti Siovaa metupopila etyi tuna okulinga, mahi kamalingi omaelema ngeetyi alingile kohale. — Ovil. 16:​6-10.

11. Oityi onthwe twii?

¹¹ Onthwe tutyii okuti Siovaa una olwembia, uviukisa, omunongo. Tutyii okuti Siovaa upanda unene etyi tumulingila neetyi tulingila vakwetu tufenda navo. Tupu tutyii okuti, Siovaa apeho uyamba vana vakakatela mwe. — Hemb. 11:6.

ONTHIKI YA MUHUKA KATWII

12. Omu mutyipopila Tiaku 4:​13, 14, oityi onthwe twehei?

¹² Tanga Tiaku 4:​13, 14. Atuho vala onthiki ya muhuka katwii. Mouye uno tuli “ovihuna vitumbukila vala aveho, kavilae.” (Omup. 9:11) Mokonda yootyo, onthwe katutyii ine etyi twapanga matyiende umwe nawa, tupu katutyii ine matutwalako umwe nomwenyo atee tumanuhula etyi twapanga.

13. Okwehei etyi matyitumonekela muhuka tyipondola okutukalesa oñgeni?

¹³ Tyipondola okutupwiya okukoleleya mokonda etyi matyitumonekela muhuka katutyii. Ñgeni ngootyo? Tupondola okulinga unene otyiho neetyi matyitumonekela muhuka, otyo atyitupolo ehambu lietu. Tupondola okuuhulukilwa novitateka ankho twahavalula-le avitulingisa otyiho, avitutokotesa omutwe. Tupu, tyina ovipuka viahaende ngeetyi ankho tusoka, otyo tyipondola okutuvelesa omutima, atyitusoyesa. — Omih. 13:12.

14. Ehambu lietu lituka kutyi? (Tala omalutalatu.)

¹⁴ Tyina tukoleleya ovitateka tukondya navio, tulekesa okuti tufenda tupu Tate yetu wokeulu okumuhole, hakuti tuhanda vala okupewa oviwa. Etyi Ombimbiliya ipopia tyilekesa umwe nawa okuti, katupondola okusoka okuti Siovaa metuyakulila kovitateka aviho. Tupu katupondola okusoka okuti oe ukoya ovitateka matukondyo navio. Ngwe utyii okuti ehambu lietu kalituku kokunoñgonoka etyi matyitumonekela komutwe, mahi mwene lituka kokwovola okululikwa nae, nokumutavela. (Sele. 10:23) Tyina tuyumba onthumbi mu Siovaa pokupanga etyi tuhanda okulinga, ongatyina tuli nokuti: “Ine Siovaa wetyihanda, nkhele matukala-ko atulingi etyi neetyi.” — Tia. 4:15.

15. Oityi twii matyikamoneka komutwe oku?

¹⁵ Namphila twehei etyi matyitumonekela muhuka, mahi twii etyi Siovaa apopia. Wati makaavela ovanthu omwenyo wahapu, vamwe o keulu, vamwe opopano pohi. Onthwe tutyii okuti Siovaa kakembe, petupu otyipuka natyike tyipondola okumutyika, ehetyivili okulinga etyi apopia. (Titu 1:2) Siovaa oe vala upopia ‘onthyulilo nkhele tya kohale oe vala upopia ovipuka nkhele viehenelingwe.’ Kohale, ovipuka atile mevilingi wevilingile umwe. Naina neevi ati mekevilinga komutwe oku, navio mekevilinga umwe. (Isa. 46:10) Tupu tutyii okuti petupu otyipuka natyike tyipondola okutyika Siovaa okukala nolwembia noonthwe. (Loma 8:​35-39) Siovaa utwaavela ounongo, utupameka, utwaavela ononkhono twesukisa tukoleleye movitateka aviho. Tuyumbei-ko onthumbi, Siovaa metukwatesako, eketwaavela oviwa. — Sele. 17:​7, 8.

OTYIPUKA SIOVAA ETWII NAWA KATUTYIVILI-ALE OKUTYISOKA

16. Omu mutyipopila Oviimbo 139:​1-6, oityi Siovaa ei nawa? Ya otyo tyitukalesa ñgeni?

¹⁶ Tanga Oviimbo 139:​1-6. Omutungi wetu utwii umwe nawa. Wii evi tusoka, wii evi tupopia, wii evi tulinga. Wii oityi tyitutwala kokulinga ovipuka, oityi tyitutwala kokupopia ovipuka vimwe. Wii umwe neetyi tyili kohi, komutima wetu. Ohamba Ndaviti wetyimwene okuti, Siovaa wesuka natyo tyokutukwateseko, utweete, petupu onthiki matukala kokule ehetumono. Pahe oñgeni tukala, okusoka okuti Huku Omutungi wovipuka aviho, Omunanene kombanda yohi aiho usuka noonthwe utweete? Tukala umwe ngeetyi tyakalele Ohamba Ndaviti, watile: “Ove undyi umwe nawa nokutyisoka tyinthyuvisa unene. Enoñgonoko liove liaya peulu, nokulikungunyika hilivili.” — Ovii. 139:​6, okatoi.

17. Oityi tyipondola okutulingisisa atwehetavela okuti Siovaa utwii umwe nawa?

¹⁷ Pamwe mokonda yeevi twakondyaile navio meumbo, neevi vilingwa momuhoko wetu, neevi ankho tutavela, tyipondola okutupwiya okutavela okuti Siovaa o Tate yetu utuhole, usuka noonthwe. Tupu mokonda yovipuka ovivi twalingaile kohale, tupondola okusoka okuti katwatele-mo mokulinga omapanga a Siovaa, atusoko okuti Siovaa uli kokule noonthwe. Na Ndaviti pamwe ankho otyo asoka ngootyo. (Ovii. 38:​18, 21) Tupu ine omunthu umwe uli nokulikwatehila ayeke-po ovipuka ovivi ankho alinga, aendele movitumino vya Siovaa, upondola elipulu ati: ‘Ine Huku undyii umwe nawa unoñgonoka umwe nawa, omokonda yatyi anthumina okuyeka-po ovipuka evi viamphona ñgaa?’

18. Oviwa patyi matupolo-ko ine tutavela okuti Siovaa utwii nawa? (Tala omalutalatu.)

¹⁸ Tupondola okulilonga okutavela okuti Huku utwii nawa, umona ovipuka oviwa tuna, onthwe twahamono. Namphila amona okuti tupengesa, ei umwe nawa evi vitutwala kokulinga evi viapenga, mahi no ngootyo utuhole. (Loma 7:15) Tyina twametyimono okuti Siovaa apeho umona ovipuka oviwa tuvila, otyo matyitwaavela ononkhono, atumufende nehambu, atuhemuyeke-po.

19. Oityi onthwe twii tyiyemba ku Siovaa?

¹⁹ Onthwe tutyii okuti Siovaa olwembia. Otyo tutyii umwe nawa, katusimo-ale vali. (1 Swau 4:8) Tupu tutyii okuti onondunge Siovaa etupopila m’Ondaka yae mbaviuka, mbulekesa okuti utuhole, apeho usoka kweevi vitweetela ouwa. Tutyii okuti Siovaa uhanda tukamone omwenyo wahapu, otyo ayekela ofeto yeyovo. Ofeto yeyovo ituyumbisa-ko onthumbi yokuti tupondola okuhambukiswa Siovaa, namphila tupengesa. (Loma 7:​24, 25) Tupu tutyii okuti: “Huku omunene vali komitima vietu, ngwe ovipuka aviho uvii.” (1 Swau 3:​19, 20) Siovaa utwii umwe nawa-nawa ya wayumba-ko onthumbi yokuti matutyivili okulinga etyi ahanda.

20. Oityi matyitukwatesako okwahalingi otyiho?

²⁰ Petupu otyipuka natyike Siovaa etuholeka ankho ñgeno tusukisa okunoñgonoka. Tyina tupola pokati atutavela otyipuka otyo, katulingi otyiho novipuka twehei, tusuka vala novipuka viesukisa vali. Tyina tulinga ngootyo, tulekesa okuti tuyumba onthumbi mu Siovaa “wokwii atyiho.” (Som. 36:4) Namphila pehepano tuna ovipuka ovinyingi twehei, mahi tutyii okuti tyina twamakakala-ko apeho, matukelilongesa ovipuka ovikwavo vali twehei viyemba ku Huku yetu Omunene. — Omup. 3:11.