Ovipuka Watetekela Okunoñgonoka na Hono Vikukwatesako?

1. Ovipuka watetekela okunoñgonoka m’Ombimbiliya viekukalesile ñgeni?

OVIPUKA twatetekela okunoñgonoka m’Ombimbiliya, ovio umwe vietupilulula. Etyi twanoñgonoka okuti Huku utiwa o Siovaa, atuhimbika okulinga ovipuka mavitufweneka vali kwe, tulinge omapanga ae. (Isa. 42:8) Etyi twanoñgonoka okuti vokwankhia vetupu vali etyi vei, atuyeke-po okulinga otyiho tyokuti vetu vokwankhia veli nokumona ononkhumbi. (Omup. 9:10) Etyi twanoñgonoka okuti Huku wati, komutwe wandyila ohi maikala Omphangu Yombembwa, atuhalingi vali otyiho. Atuyumbu-ko onthumbi okuti Siovaa ketutungile tukaleko vala omanima 70 aa 80, mahi wetutunga tukaleko apeho. — Ovii. 37:29; 90:10.

2. Omu mutyipopila 2 Petulu 1:​12, 13 oityi Petulu ahinangelesilile Ovakwa-Kilisitu ovipuka vatetekela okulilongesa?

² Katupondola okulimbwa ovipuka twatetekela okunoñgonoka m’Ombimbiliya. Omukanda 2 Petulu, Petulu weuhonekelele Ovakwa-Kilisitu ankho ‘vapama-le motyili.’ (Tanga 2 Petulu 1:​12, 13.) Pomuvo watyo opo mewaneno ankho tyati umwe omo muna ovanthu ovakalavi vahanda okuveyapula motyili, omo tupu muna ovalongesi vomatutu. (2 Pet. 2:​1-3) Petulu wevehonekela tupu omukanda oo omokonda ankho wahanda okuvekwatesako vahayondywe novanthu ovo. Pahe opo evekwateseko evehinangelesa ovipuka vatetekela okulilongesa. Ovipuka viatyo ovio, ovio umwe ankho mavivekwatesako vakakatele mu Siovaa aloo konthyulilo.

3. Omokonda yatyi Ovakwa-Kilisitu vesukisila okutwalako okusoka kovipuka vatetekela okulilongesa m’Ombimbiliya? Popia-po tyimwe.

³ Tyina omunthu afenda-le Siovaa omanima omanyingi utyivila vali okukopa onondunge, kovipuka viotete elilongesile. Otyo o ngokutunga otyimbala. Nkhele tusokei komukulu ukahi nokulongesa omona wae okutunga otyimbala. Mokonda omukulu omunongo-ale kokutunga, namphila aveho vena umwe evale, noloi, nononkhwiko, mahi pokuundaisa, omukulu mati umwe apa waundisa ñgaa apa waundisa ñgaa, mahi omona watyo mokonda uli vala nokulilongesa upondola okuundisa vala otyipuka tyike. Novanthu vokufenda Siovaa ongootyo. Okuti nou wahimbika-le okufenda Siovaa kohale, nou wahimbika vala pahe, vapondola umwe okutanga otesitu ike, ou wokwehimbika-le kohale akopo-mo umwe ovinyingi, ou wokwehimbika vala pahe ahakopomo-ale ovinyingi. Tyina twamambatisalwa tyiti umwe ou ulinga otyilinga etyi meongano ou ulinga otyilinga etyi. Tyina tusoka kovipuka twanoñgonoka pweetyi twahimbika okulilongesa Ombimbiliya tukopa-ko oviwa vitukwatesako no pehepano. Tutalei etyi ovanthu vapama-le motyili vapondola okulilongesila kovipuka vitatu viapopiwa m’Ombimbiliya.

SIOVAA OMUTUNGI

4. Okunoñgonoka okuti Siovaa oe wetutunga tyitukalesa-ñgeni?

⁴ Tutyii okuti ouye novipuka aviho vina omwenyo viatungwa Nomutungi omunongo, una ononkhono ononene. Ombimbiliya yapopia okuti: “Watunga ovipuka aviho o Huku.” (Hemb. 3:4) Mokonda Siovaa Huku oe wetutunga, utwii umwe nawa ya wesuka nokututekula. Wii umwe nawa etyi tyata mwoonthwe. Okunoñgonoka okuti Siovaa oe wetutunga, wesuka noonthwe, ututekula, tyetukwatesako okukala nomwenyo omuwa atumono omu tupamena.

5. Otyili patyi tyipondola okutukwatesako okulikondola koututu? (Isaiya 45:​9-12)

⁵ Otyili tyokuti Siovaa oe Omutungi wetu tyitutwala kokulikondola koututu. Nthiki imwe Sombe ankho uli vala nokusoka kwee mwene no kovanthu vakwavo, ku Siovaa alimbwiko. Mahi Siovaa emuhinangelesa okuti: Ame, ame Mutungi wovipuka aviho, ame omuvili waatyiho. (Som. 38:​1-4) Otyipuka otyo Sombe ahinangelesilwe, atyimukwatesako okumona okuti ovipuka aviho Siovaa alinga viaviuka. Otyo omuuli Isaiya atila: “Okuti onthata ipondola okupopila Omuhongi okuti: ‘Oityi ukahi nokulinga?’” — Tanga Isaiya 45:​9-12.

6. Onalupi tuna okusoka umwe nawa kounongo no kounene Womutungi wetu? (Tala omalutalatu.)

⁶ Tyina omunthu afenda-le Siovaa omanima omanyingi, pahe upondola okuyumba vala onthumbi mweetyi asoka mokonda wamona-mona-le ovinyingi, ahayumbu vali onthumbi mu Siovaa no m’Ondaka yae. (Som. 37:​23, 24) Mahi oityi tutila otyiwa omunthu asoke umwe nawa, kounongo no kounene Womutungi wetu? (Isa. 40:22; 55:​8, 9) Otyipuka otyo tyesukisa, mokonda matyimukwatesako okulikondola koututu etyimono okuti omalusoko a Siovaa alamba-po ae.

7. Oityi tyakwatesileko Rahela okutavela etyi ovipuka meongano viapilululwa?

⁷ Rahela ukala ko Eslovénia, wetyimona okuti okusoka ku Siovaa Omutungi wetu, tyemukwatesako okutavela tyina otyipuka tyimwe meongano tyamapilululwa. Rahela wati: “Tyihole okumphwiya okutavela tyina ava vetululika vamapilulula tyimwe. Natalele Ovindiu 8 Yononkhalamutwe yo 2023, yapopile okuti pahe ovakwendye vapondola okukala nonondyeli. Mahi etyi namona omukwatate una onondyeli uli nokulinga elongomona atyindingi navi. Andyilikwambela ku Siovaa ankhwateseko okutyiliya otyipuka otyo.” Rahela wetyimona okuti mokonda Huku Omutungi weulu nohi, oe umwe wata-mo mokuhongolela nawa-nawa eongano liae. Ine noove tyihole okukupwiya okutavela tyina tyimwe tyamapilululwa, okuti hatyiwa okulikondola koututu, osoko kounongo, no kounene Womutungi wetu? — Loma 11:​33-36.

OITYI HUKU AYEKELELA-KO ONONKHUMBI

8. Ouwa patyi tupola kokunoñgonoka okuti Huku hae-ko utumonesa ononkhumbi?

⁸ Oityi Huku ayekelela-ko ononkhumbi? Ovanthu vokuhetyivili okukumbulula epulo olio vanumanena Huku, etyi vamalingi avati kouye kutupu Huku. (Omih. 19:3) Mahi ove utyii, welilongesa okuti tumona tupu ononkhumbi onkhali noukwankhali twapiñgana, ha Siovaa-ko utumonesa ononkhumbi. Tupu welilongesa okuti Siovaa wapwa-elundo, otyo tyipa omphitilo ovanthu ovanyingi-nyingi vemunoñgonoke, pahe kumbi mavekelimonena-ko kweetyi makalinga amane-ko evi vitweetela ononkhumbi. (2 Pet. 3:​9, 15) Ovipuka ovio, ovio viekufweneka ku Siovaa pahe mumapanga.

9. Onalupi tusukisa okusoka umwe nawa omokonda yatyi Huku ayekelela-ko ononkhumbi?

⁹ Twetyimona okuti naina twesukisa okupwa-elundo mokukevelela Siovaa eye okumana-ko ononkhumbi. Mahi no ngootyo tyina twamahiwapo no wetu, na tyina tulingwa onya, aa hamwe o wetu ulingwa onya, tupondola atunumana atusoko okuti Siovaa uli nokuseta okumana-ko evi vitweetela ononkhumbi. (Hamb. 1:​2, 3) Tyina momutwe mwameya omalusoko ngoo, pamwe otyiwa tusoke omokonda yatyi Siovaa ayekela omunthu wokulinga evi viaviuka amone ononkhumbi.a (Ovii. 34:19) Tupu tupondola okusoka komphango ya Huku yokuya okumana-ko evi vitweetela ononkhumbi, avihamonaika-ko vali.

10. Oityi tyatulisile Anne omutima wahiwa-po na ina?

¹⁰ Okunoñgonoka omokonda yatyi Huku ayekelela-ko ononkhumbi tyipondola okutukwatesako tyina ovipuka viamaleme. Anne, ukala kotyilongo tyimwe tyili pokati kelunga tyitiwa Mayotte, wati: “Omanima amwe konyima oku, etyi nahiwa-po na mee tyendyihamene unene. Mahi apeho ndyihinangela okuti Siovaa hae-ko uvelwa onombei ononkhumbi ndyili nokumona. Siovaa wesuka umwe natyo tyokumana-ko ononkhumbi atutilisa vetu. Okusoka kovipuka ovio tyitepulula kolwihamo lwange, tupu tyinkhwatesako okutula omutima nokukala nombembwa.”

11. Oityi tutila okusoka omokonda yatyi Huku ayekela-ko ononkhumbi tyitukwatesako okwivisa?

¹¹ Okunoñgonoka okuti Huku hae-ko utwetela ononkhumbi tyitwavela ondundo tutwaleko okwivisa. Petulu wapopile okuti Siovaa wapwa-elundo uhanda ovanthu velivele aveya okuyovolwa. Pahe ati vali: “Onwe pahe talei muna okulinga ovanthu vekahi ñgeni. Lingei ovanthu vasukuka movipuka mulinga, okulinga evi vilinga omunthu wonthilo na Huku.” (2 Pet. 3:11) Povipuka vilinga omunthu “wonthilo na Huku” tyimwe okwivisa. Noonthwe tuhole ovanthu nga Tate yetu Siovaa. Tuhanda ovanthu vakakale mouye omupe wa Huku. Siovaa wapwa-elundo uli nokwaavela omphitilo ovanthu vakala apa wiivisa vemunoñgonoke avemufende. Ove una elao limwe enene, liokuundapela kumwe na Huku okwatesako ovanthu ovanyingi-nyingi okumunoñgonoka tyina nkhele onthyulilo iheneye! — 1 Kol. 3:9.

TULI “KONONTHIKI MBAHULILILA”

12. Tyina tutala ovipuka vili nokumoneka mouye tukala nonthumbi patyi?

¹² Ombimbiliya yetyipopia umwe nawa oñgeni ovanthu mavakala “kononthiki mbahulilila.” (2 Tim. 3:​1-5) Tyina tutala otyipuka hono ovanthu mouye vekahi, tutyimona umwe nawa okuti etyi tyapopia Ombimbiliya otyili. Tupu tyina tumona otyipuka hono ovanthu veli nokuvila-po kokulinga ovivi, tukala nonthumbi yokuti Ondaka ya Huku iyumbwa onthumbi. — 2 Tim. 3:​13-15.

13. Okutalela komuhe Sesusi apopia uli mo Luka 12:​15-21, oityi tuna okulipula?

¹³ Okunoñgonoka okuti tuli kononthiki mbahulilila tyitukwatesako okwiika omutwe movipuka viesukisa vali. Tutalei omuhe umwe Sesusi apopile utukwatesako okwiika omutwe movipuka viesukisa vali, uli mu Luka 12:​15-21. (Itanga.) Oityi omulume una omuhona atilwa “otyova”? Ha mokonda-ko youhona wae mahi omokonda ankho kaikile omutwe movipuka viesukisa vali. Namphila ankho “amona umwe mahi ku Huku ankho wahepa.” Okwiika omutwe momalumono ae ankho owova mokonda ankho utupu-ale vali ononthiki ononyingi kouye. Huku apopila omulume oo ati: “Omwenyo wove hono kounthiki mavekwiiti-o.” Okuti etyi tyapopiwa momuhe ou noonthwe hono tyipondola okutukwatesako? Eenga, ouye ou utupu-ale vali ononthiki ononyingi apa kapii onthyulilo maiya. Naina otyiwa tulipule okuti: ‘Ovipuka ndyipanga okulinga vilekesa umwe okuti naika omutwe movipuka viesukisa vali? Ovana vange ndyivekwatesako vaike omutwe mutyi? Okuti ndyili nokulipakela omalumono keulu ine ndyitutumba vala nokuliovolela omalumono pano pohi?’

14. Okutalela kweetyi tyahipulula Miki, omokonda yatyi otyiwa okusoka umwe nawa okuti tuli kononthiki mbahulilila?

¹⁴ Okusoka kovipuka vilekesa umwe okuti tyili tuli kononthiki mbahulilila tyipondola okutukwatesako okupanga nawa evi tuhanda okulinga. Otyo tyakwatesileko omwivisi umwe utiwa o Miki. Wapopia wati: “Etyi ndyili nokulongeswa, ankho nahanda tyina namamane andyiende mosikola onene ndyikalongeswe evi viyemba kovinyama. Mahi tupu ankho nahanda okukala omukokoli-ndyila womuvo auho haa andyiende oku kwesukisa ovaivisi. Omapanga ange apama motyili o mewaneno avamphakaila-mo ndyisoke-po umwe nawa ine mandyityivili umwe okuti, ame ndyili mosikola ame mukokoli-ndyila haa ndyende oku kwesukisa ovaivisi. Tupu avanthyinangelesa okuti apa kapii ouye ou mauhanywa-ko, mahi mouye omupe mandyikakala-ko umwe omanima nomanima andyikelilongesa umwe aviho ndyihanda viyemba kovinyama. Pahe andyisoko andyiti naina hahe nahaye vali mosikola onene, ndyilongeswe vala tyimwe matyimphe oufwiso wokulinga ovipuka vimwe ndyilitekule. Pahe andyimono ovilinga vimwe vikahi nawa vimpha omuvo ndyikale omukokoli-ndyila, etyi pakala andyiilukila ko Equador oku kwesukisa ovaivisi.” Pehepano oo Miki nombwale yae vapililapo omawaneno mepunda-umbo omo.

15. Oityi tutila hatyiwa-ko okusoya tyina ovanthu vehetutehelela? Popia-po tyimwe. (Tala olutalatu.)

¹⁵ Tyina twamakaivisa, atutomphola novanthu avehetutavela twahasoyei. Ovanthu vapilauluka. Tusokei vala kweetyi tyalingile Tiaku ondenge ya Sesusi. Ankho vakala umwe na Sesusi nkhele tyapouna, wemumwene etyi akala Mesiya tupu ankho utyii okuti petupu omunthu ulongesa nawa ngae. Mahi apakala umwe ehimbwe otyo Tiaku ahakala-le omulanduli wa Sesusi. Tiaku wakakala vala omulanduli wa Sesusi, etyi Sesusi atutiliswa emumonekela.b (Swau 7:5; Ngal. 2:9) Naina wahankhie elundo liokutomphola no venyi nkhele vehesukile notyili, nokukondoka pomaumbo a vana vehekutehelelele. Hinangela okuti tuli kononthiki mbahulilila, ovilinga vietu viokwivisa viesukisa unene, vialumbanesa. Vamwe vapondola umwe okukahinangela evi twevepopilile aveya mefendelo liotyotyili tyina ononkhumbi ononene mbamehimbika.c

TWALAKO OKUPANDULA EVI SIOVAA EKUHINANGELESA

16. Ovipuka Siovaa etuhinangelesa vitukwatesako okulinga-tyi? (Tala okakasa kati: “Kwatesako Navio Vakwenyi.”)

¹⁶ Omikanda ominyingi vilingwa meongano vilingilwa umwe vana vehei-ale ovinyingi viyemba k’Ombimbiliya. Elongomona tulingilwa meliongiyo lyo konthyulilo yosimanu no nonthele mbumwe mbuli mo jw.org, nomikanda vimwe vili-mo, ovio vialingwa umwe opo vikwateseko vana vehe Nombangi. Mahi no ngootyo noonthwe Onombangi tukopa onondunge mweevi vipopiwa momikanda ovio. Vitukwatesako okuhumba vali Siovaa, vitukwatesako okuyumba onthumbi mweetyi Ondaka yae ipopia, tupu vitukwatesako okulongesa vali nawa ovanthu. — Ovii. 19:7.

17. Onalupi twesukisa okusoka kovipuka twatetekela okulongeswa?

¹⁷ Onthwe Nombangi tuhambukwa unene tyina otyipuka tyimwe ankho tunoñgonoka otesitu imwe y’Ombimbiliya tyamapotoyolwa vali nawa. Tupu tuhole unene ovipuka twatetekela okulongeswa, mokonda ovio vietukwatesako okulinga omapanga a Siovaa. Na hono nkhele vitukwatesako. Tyina twamapopilwa tyimwe neongano atusoko okuti ñgeno ovipuka viaenda vali nawa ine twalingile tyongandi, tuna okulikondola koututu atuhinangela okuti uli nokululika eongano eli o Siovaa, Omutungi wetu una ononkhono ononene omunongo vali kouye. Tyina twamamono wetu uli nokumona emone, tuna okupwa-elundo atuhinangela omokonda yatyi Huku nkhele eli nokuyekela-ko ononkhumbi. Pahe tyina tuti pokupanga evi matulingi, tuna okuhinangela okuti tuli kononthiki mbahulilila, apa kapii onthyulilo maiya. Evi Siovaa etuhinangelesa vitwaleko okutupameka nokutwavela ondundo nokutukwatesako okulinga ovipuka nonondunge.