Omapulo Ovatangi

Omukanda Omihe 30:​18, 19 upopia okuti “ondyila yomulume weenda nomufikwena” ‘kainoñgonokwa-le.’ Otyo tyahanda okutiwi?

Otyipuka otyo, ovanthu ovanyingi-ale velipula-tyo, naava umwe vokwatanga unene. Mwene otesitu yatyo aiho m’Ombimbiliya Ikola Yaava Ekevelelo Liouye Omupe yati: “Kuna ovipuka vitatu nahanoñgonoka, [okatoi kati “vinthyuvisa unene.”] Evi vikwana hivikungunyika: Ondyila yonkhombe meulu, ondyila yonyoka kombanda yonkhanda, ondyila yombaluku mokati kelunga, ondyila yomulume weenda nomufikwena.” — Omih. 30:​18, 19.

Ankho tusoka okuti onondaka “ondyila yomulume weenda nomufikwena” mbupopia etyi tyapenga. Omokonda yatyi? Omokonda onovelesikulu ononkhwavo mbupopia ovipuka viehekuta-le, viahati “tyapwa.” (Omih. 30:​15, 16) Tupu ovelesikulu 20, ipopia omukai ekunga uti “ame ndyitupu-ale etyi nalinga tyapenga.” Ankho tusoka okuti ngeetyi twahamono ondyila yonkhombe meulu, nondyila yonyoka kombanda yonkhanda, nondyila yombaluku mokati kelunga, nomulume upondola umwe okulinga otyipuka otyivi ovanthu avehetyimono-ale. Mokonda yolusoko olo, ankho tusoka okuti ondaka ei yokwatiwa, “ondyila yomulume weenda nomufikwena,” ipopia otyipuka tyapenga. Ankho tusoka okuti ipopia omukwendye welilungukisa uyondya omuhikwena tyokwahanda okulala umwe nae, mahi omuhikwena ahanoñgonoka etyi omukwendye ahanda.

Mahi pahe twamona ovipuka ovikwavo tutila mwaina onovelesikulu ombo mbupopia etyi tyaviuka. Mwene apa omuhoneki ou, ankho wahuva vala novipuka eli nokupopia.

Ovihonekwa vimwe vyo Hembeleu navio viyaka olusoke olo lwokuti onovelesikulu ombo mbupopia ovipuka viaviuka. Omukanda umwe upotoyola evi viyemba kovihonekwa vyo Hembeleu wati, ondaka yapopiwa m’Omihe 30:18 yatiwa: ‘hivinoñgonoka-le,’ ipopia otyipuka tyihuvisa, otyipuka otyinene, otyipuka omunthu ehevili-ale okunoñgonoka.

Omulongesi umwe utiwa o Crawford H. Toy ulongesa mosikola onene yoko Estados Unidos, nae wetyipopia umwe okuti onondaka ombo mb’Ombimbiliya kambupopi otyipuka tyapenga. Omulongesi oo wati: “Omuhoneki oo ankho uli vala nokupopia okuti, ovipuka ovio vihuvisa.”

Naina onondaka ombo mbuli m’Omihe 30:​18, 19 mbupopia umwe vala ovipuka vihuvisa, ovipuka twehevili-ale okunoñgonoka. Ngeetyi tyapopia omuhoneki oo nonthwe tyituhuvisa unene okutala otyipuka onkhombe inthanana meulu, nokutala otyipuka ombaluku yalema yeendela kombanda yomeva, nokutala otyipuka omukwendye afweva omuhikwena avelihande avakala kumwe aveho nehambu.