‘ Likwatei-po na Vakwenyi’
OMUTUMWA Paulu wapopilile ovalanduli va Sesusi vo ko Efesu okuti: ‘Koleleyei nolwembia evi vakwenyi vemulinga, otyo mututumba mukale-kale umwe tyelikwata-po apeho momphepo ikola memphu liombembwa lihonyeka.’ — Efe. 4:2, 3.
Opo ‘tulikwate-po’ na vakwetu tutei ‘komphepo ikola.’ Otyo okuti tulikwata-po tupu na vakwetu o Huku utukwatesako. Mahi Paulu wapopia okuti noonthwe tuna okulikwatehila tutwaleko “tyelikwata-po” na vakwetu.
Soka ñgeno pena omunthu wekwaavela etuku-tuku. Ine liteka olie ulipangiyisa? Ove yatyo. Kupondola okwenda komunthu una wekwavelele etuku-tuku oti lipangiyisa.
Noonthwe utukwatesako tulikwate-po na vakwetu o Huku. Mahi munthu na munthu una okulikwatehila tutwaleko tyelikwata-po. Pahe ine pena umwe mwehelivilile nae mewaneno, wesukisa okulipula okuti: ‘Oityi nalinga-le tumane-po okandaka ketu atulikwate-po?’
TULIKWATEHILEI TULIKWATE-PO NA VAKWETU
Paulu wapopia okuti pamwe pesukisa umwe okututumbwa tulikwate-po na vakwetu. Tyesukisa haunene umwe tyina mewaneno pena umwe wetulinga tyimwe twahahandele. Mahi okuti omunthu okutulinga vala otyipuka twahahandele ngootyo tuna okukapopia nae? Au. Hahe nkhele ulipule okuti: ‘Ine ndyikapopia nae matumane-po okandaka oko, ine matuvilisa-po vala ovipuka?’ Pamwe hahe vali okuyeka-ko vala, omweevela. — Omih. 19:11; Malu. 11:25.
Lipula okuti: ‘Ine ndyikapopia nae matumane-po okandaka oko, ine matuvilisa-po vala ovipuka?’
Omutumwa Paulu tupu wati, ‘twesukisa okukoleleya nolwembia evi vakwetu vetulinga.’ (Efe. 4:2) Omukanda umwe onondaka ombo wembwenda ñgaa, “twesukisa okutavela etyi vakwetu vekahi.” Vakwetu mewaneno navo ovakwankhali. Onthwe atuho tuli nokulikwatehila ‘tupake-mo omunthu omupe.’ (Efe. 4:23, 24) Mahi no ngootyo atuho vala tupengesa. (Loma 3:23) Ine tutavela umwe otyipuka otyo, tyina vakwetu vametulingi tyimwe matuvepolela-po atutwalako “tyelikwata-po.”
Tyina mukwetu ametulingi tyimwe atumupolela-po, tutwalako tyelikwata-po “memphu liombembwa.” Ondaka yokwatiwa ‘emphu liombembwa,’ m’Ova Efesu 4:3 mo Ngeleku tupu ipopia etyi tyihonyeka olutu ngeetyi tyili m’Ova Kolosu 2:19. Olutu lwetu lwahonyaikwa umwe nawa. Tupu okulivila na vakwetu nokulilinga olwembia tulikwata-po, naapa pamwe tukala umwe noundaka.
Naina ine umwe mewaneno wekulinga etyi tyekunumanesa, mulinga onkhenda mupolela-po wehemupopie omapita. (Kolo. 3:12) Mokonda atuho tuvakwankhali, tyipondola nthiki imwe noove wanumanesile-ale mukwenyi. Ine uhinangela otyipuka otyo, opo molikwatehila umwe ‘mulikwate-po’ na vakwenyi.