Jeova Wankhuatesako Movilinga Viae

NATYITWA mo 1926 mo Crooksville, Ohio, mo Estados Unidos. Tate na Me ankho vetupu ongeleya, mahi ankho vapopila ovana vavo etyinana opo tuende kokapela. Ankho ndyenda Kokapela ko Metodista. Etyi ndyina omanima 14, onkhalamutwe aimphe ondyambi mokonda ankho ndyenda kokapela Ovityalumingu aviho.

Pomuvo opo, munthele yetu utiwa o Margaret Walker, Ombangi ya Jeova, ehimbika okutalelapo me yange otyo vapopia konthele yo Mbimbiliya. Onthiki imwe, andyitokola okuenda ponthele yavo. Me asoko okuti mandyityopola etyi ekahi nokulongeswa, ngotyo amphopila opo ndyende pondye. Mahi andyitualako okutehelela etompho liavo. Konyima etyi ovalinepi vamwe veya vali okututalelapo, Margaret amphulu okuti, “Ove enyina lia Huku uli?” Andyiti, “Ovanthu aveho vetyii okuti litiwa o Huku.” Margaret ati, “Kapole Ombimbiliya yove matutale o Salmo 83:18.” Andyikeipola, andyimono okuti enyina lia Huku litiwa o Jeova. Andyihateka noko mapanga ange andyivepopila okuti, “Tyina muamehiki keumbo kounthiki, talei o Salmo 83:18 Mombimbiliya iya amutale enyina lia Huku litiwa olie.” Ove upondola okuti nehimbika okuivisa monkhalelo ikahi nawa.

Nelilongesa Ombimbiliya andyimbatisalwa mo 1941. Apakala vala katutu, andyipewa otyilinga tyokuendesa elilongeso liomukanda mewaneno. Andyiavela ondundo me no nomphange mbange, mavehimbike okuenda kelilongeso liomukanda ankho ndyilinga. Namphila ankho Tate ehesukile.

OUNDYALE MEUMBO

Andyipewa vali ovilinga mewaneno, andyikala nomikanda ominyingi vialingwa no Nombangi mba Jeova. Nthiki imwe, Tate alekesa komikanda viange ati: “Watangale omikanda evi aviho? Nahanda vitunde mondyuo muno, noove upondola okuenda navio.” Andyitundu meumbo, andyikakala popepi no Zanesville, Ohio, mahi andyikondoka okukapameka ombunga yange.

Tate ahetekela okutalameka Me opo ahaye vali komaliongiyo. Pamwe tyina enda, umulandula emukondola keumbo. Mahi akalupukila kepito ekuavo aende keliongiyo. Andyipopila Me okuti: “Wehesuke. Maponwa ale okukutaata.” Mokueenda kuomuvo, Tate ehemutyilika vali, iya atualako okuenda komaliongiyo.

Etyi Osikola Yovilinga via Huku yehimbika mo 1943, andyihimbika okulinga omalongomona ovalongwa mewaneno. Onondonga napelwe etyi namana okulinga onthele yange mosikola yankhuatesako okulongesa nawa.

ETYI TYATUKA KOKUHELIPAKE MOPULITIKA

Mo 1944, mokueenda Kuovilwa Viavali Viouye Auho, andyipopilwa opo ndyende moufualali. Andyiende koseketa itiwa Fort Hayes ko Columbus, Ohio, ankho nakatalwa, iya andyihoneka omikanda aviho. Tupu andyipopila omutumini okuti hihande okukala efualali. Andyeke ndyikondoke keumbo. Mahi etyi pakala ononthiki mbehehi, omutumini eya pepito liange ati, “Corwin Robison, nekutumwa opo wende mokaleya.”

Etyi palamba onosimano onombali, omukoyesi amphopila okuti: “Inkha tyali ame, ñgeno nekupaka mokaleya. Una etyi uhanda okupopia?” Andyiti: “Mutumini, ame ndyitalwa ngatyina ndyimutumini. O trimbuna yange omapito ovanthu, ame ndyiivisa onondaka onongwa Mbouhamba kovanthu ovanyingi.” Omukoyesi apopila omukuatesiko wae okuti: “Ove kupondola okutokola inkha omukuendye ou omutumini ine hamutumini ko. Una yokutokola inkha ukala efualali ine kakala efualali.” Etyi pakala katutu, omukuatesiko womukoyesi atokola okuti napengesa. Omukoyesi amphopila okuti mokala mokaleya omanima etano mo Ashland, Kentucky.

JEOVA WANDYAKULILA MOKALEYA

Nakala mokaleya onosimanu onombali mo Columbus, Ohio. Andyilikuambela ku Jeova okuti: “Hipondola okukala mokaleya omanima epandu. Hityii etyi mandyilingi.”

Monthiki onkhuavo, ovayungi avampholomo. Andyiende napamwe ankho paya peulu, andyimono omunthu umwe omulale nae ankho onkhuatua, otyo tulitalela pondyanena. Amphulu okuti: “Omokonda yatyi wakuatelwa, Musupi?” Andyiti, “ Ame Ndyimbangi ya Jeova.” Ati, “Umbangi? Iya opo muno ulinga tyi? Ame andyiti, “Onombangi mba Jeova kavahande okuenda kovilwa avakaipaa ovanthu.” Ngwe ati, “Vekupaka mokaleya mokonda kuhande okuipaa ovanthu. Tupu vapaka mokaleya vokuipaa ovanthu. Okuti ngotyo tyaviuka?” Ame andyiti, “Katyaviukile.”

Konyima apopi okuti: “Momanima 15 nakalele mokaleya okakuavo, mokaleya omo natangele omikanda vienyi.” Etyi natanga andyilikuambela okuti, “Jeova nkhuateseko ndyikale nomulume ou ponthele yange.” Pomuvo opo, onkhuatua imwe itiwa o Paulu aiti: “Inkha ovakuendye ava vekuviya mphopile. Etyi mandyivelingi ame ndyityii.” Ngotyo ononthiki nakalamo, hakalele notyitateka no nonkhuatwa mbuna 50.

Etyi omafualali anthuala kokaleya koko Ashland, andyivasiko omukuatate umwe wapama motyili. Omukuatate oo ankhuatesako kumwe navakuetu okutualako noupanga wetu na Jeova. Etuavela otyilinga tyokutanga Ombimbiliya onosimanu ambuho, atupongiya omapulo atukekumbulula melilongiyo ankho tuihana okuti Ononyiki Mbombimbiliya. Ankho tukala mokaleya kahandyuka kena omaula motyimato. Omukuatate aonganeka o telitoliu yetu. Amphopila okuti: “Robison, otyilinga tyove oula ou nou. Omunthu wamapakwa koula oku o telitoliu yove. Kala nonthumbi yokuti wemuavela oumbangi tyina nkhele eheneende.” Ongotyo ankho tuivisa monkhalelo yaongana nawa.

OITYI NAVASA KONDYE YOKALEYA

Ovilwa Viavali Viouye Auho viamanuhuka mo 1945, mahi andyitualako okukala mokaleya etyi ovilwa viapwa. Ankho nalinga otyiho nombunga yange mokonda Tate wamphopilile okuti, “Inkha ndyilipola ove, ovakuavo kamavemphuilisa.” Etyi nayovoka, andyikala nehambu enene. Ovanthu vena epandu mombunga yange ankho venda komaliongiyo iya umwe pono mphange mbange wambatisalua namphila Tate emuyele.

Etyi Ovilwa mo Coréia viehimbika mo 1950, andyihanwa vali opo ndyikale efualali. Andyiihanwa vali koseketa Fort Hayes. Etyi vatala ounongo wange efualali alimphopila okuti, “Ove umunongo vali povanthu vopo tyikundyi tyove. Ame andyiti, “Tyikahi nawa, mahi ame himaende koufualali.” Andyipopi omukanda wa 2 Timóteo 2:3 andyiti, “ame ndyifualali lia Kristu.” Akalapo katutu otyo ahapopi, pahe ati, “Upondola okuenda.”

Etyi pakala katutu, andyiende peliongiyo lio vokuhanda okuenda ko Mbetele motyonge tyalingililwe mo Cincinnati, Ohio. Omukuatate Milton Henschel etupopila okuti ko Mbetele kuesukisa ovakuatate vahanda okuundapa unene pala Ouhamba. Andyihoneka omukanda wokuenda ko Mbetele iya andyitavelwa. Andyihimbika okuundapa mo Brooklyn mu Kwenye Kunene yo 1954, andyikala mo Mbetele okutuka opo alo hono.

Apeho nakalele novilinga ovinyingi mo Mbetele. Mokueenda kuomanima omanyingi, ankho ndyiundapa no nomakina mbokulinga omikanda nokuviukisa ovimato viono seketa, nokuviukisa omakumba. Tupu naundapele Mondyuo Yovionge Mepundaumbo lio Nova York.

Ankho mo Mbetele ndyihole efendelo liombunga komuhuka Nelilongeso Liomutala Womulavi, nokukaivisa newaneno. Tyina usoka ovipuka ovio, ovipuka onombunga ambuho Mbonombangi mba Jeova vesukisa okulinga apeho. Tyina ovohe vatangela kumwe o testu yonthiki, nokulinga Efendelo Liombunga, nokuenda komaliongiyo, nokukala nombili movilinga viokuivisa onondaka onongwa, ombunga aiho maitualako noupanga omuwa na Jeova.

Ndyina omapanga omanyingi mo Mbetele nomewaneno. Vamwe ankho ovalembulwa vapitale keulu. Vamwe havalembulwa. Mahi ovaumbili aveho va Jeova ovakuankhali, no vokuundapa mo Mbetele. Inkha ndyikala notyitateka nomukuatate wange, apeho ndyiovola ombembwa. Ndyisoka ku Mateus 5:23, 24 nokusoka oñgeni matutetulula otyitateka tyetu. Katyapepukile okuti “otyiponyo,” mahi ongotyo vala otyitateka tyitetululwa.

OUWA WATUNDA KOVILINGA VIANGE

Pehepano tyimphuilisa unene okukaivisa umbo na umbo mokonda nakulupa, mahi hiyekeko. Nelilongesa katutu elaka lio Mandarim lipopiwa ko China iya ndyihambukwa okupopia novanthu vapopia elaka olio. Pamwe komihuka ndyiava 30 ine 40 Yomutala Womulavi no Despertai! kuvana vesuka.

Andyikondoka vali ko China! Onthiki imwe, omukainthu umwe alambela ponthele yange andyolela tyina alamba nopomutala ulandeswa ovinyango. Naame andyiyolo andyimuavela Omutala Womulavi no Despertai! melaka lio Chinês. Evitale iya amphopila okuti utiwa o Katie. Konyima yotyo, etyi ankho anthala, Katie eya okupopia naame. Ame andyimupopila omanyina ovinyango mo Ingelesi, nae otyo apitulula muetyi ndyipopia. Tupu andyimuhangununina ono testu mbo Mbimbiliya iya andyimuavela omukanda Ombimbiliya Ilongesa. Etyi palamba onosimano mbumwe anehemumono vali.

Etyi palamba onohanyi mbumwe, andyiavela omikanda omuhikuena omukuavo ankho ukahi nokulandesa, evitambula. Mosimanu onkhuavo, amphe o telefone yae, ati “Popia na umwe uli ko China.” Andyiti, “Ame hi nawike ko China.” Mahi ngwe atualako, ngotyo andyikuate o telefone iya andyiti, “Alo, ame Robison.” Ondaka onkhuavo aiti, “Robby, ame Katie. Nakondoka ko China.” Andyiti, ko “China?” Katie ati, Enga. Ati, Robby omuhikuena oo wekuavela o telefone umwii? Ondenge yange. Ove wandongesa ovipuka ovinyingi oviwa. Mbambavo nae mulongesa ngetyi wandongesa.” Andyiti, “Katie, mandyilingi ononkhono opo ndyimulongese. Napandula etyi wamphopila oku ukahi.” Etyi pakala katutu, andyitualako okupopia nomphange ya Katie. Katyisukisa oku ovahikuena ovo vevali vekahi pehepano, ndyikevelela velilongese vali unene konthele ya Jeova.

Naumbila Jeova omanima 73, iya ndyihambukwa mokonda wankhuatesako okuhelipake movilwa nokukala nekolelo mokaleya. Tupu, onomphange mbange vamphopila okuti nevepameka etyi nayalwa na Tate mahi anahayekeko. Konyima, Me nonondenge mbange epandu no nomphange mbange avambatisalwa. Etyi Tate apiluluka, ahimbika okuenda komaliongiyo amwe etyi ehenenkhie.

Inkha o kehando lia Huku, ombunga yange nomapanga vokuankhia mavakakala vali nomuenyo mouye omupe. Soka ehambu matukakala nalio, okufenda Jeova pala apeho naava tuhole!a—Tala onondaka pokatoi.