Hetekela Omapanga Omanene a Jeova

1-3. (a) Omokonda yatyi tupondola okukala nonthumbi yokuti tupondola okukala omapanga a Huku? (b) Oityi matulilongesa monthele ei?

MOMBIMBILIYA, Abraiau waihanua ovikando vitatu okuti epanga lia Huku. (2 Crônicas 20:7; Isaías 41:8; Tiago 2:23) Oe vala aike Mombimbiliya Huku apopia umwe okuti epanga liange. Okuti otyo tyilekesa okuti oe vala wakalele epanga lia Jeova? Au. Ombimbiliya ilekesa okuti atuho tuna elao olio.

² Ondaka ya Huku ipopia ovanthu ovanyingi vekolelo ovalume novakai vena onthilo na Jeova, vakalele nekolelo mwe, iya avakala omapanga ae omanene. (Tanga Salmo 25:14.) Ovo valinga onthele “yekaka enene lio nombangi” vapopiwa na Paulu. Aveho vakalele omapanga a Huku.—Hebreus 12:1.

³ Pahe matutale omapanga etatu a Jeova apopiwa Mombimbiliya: (1) Rute, omuhikuena omukuatyili omuhepe woko Moabe, (2) Ezekia, ohamba yekolelo yomo Juda, iya (3) Maliya, me ya Jesus weliola omutima. Oityi tupondola okulilongesila konkhalelo kese umwe puvo akala epanga lia Huku?

WALEKESILE OHOLE YOTYOTYILI

4, 5. Etokolo patyi liepuiya Rute ankho ena okulinga, iya omokonda yatyi ankho katyapepukile? (Tala olutalatu pefo pahimbikila onthele.)

⁴ Noemi, no vakuekai vae ovo Rute na Orpa, ankho vekahi nokueenda otyikambo tyimwe otyile, okutunda ko Moabe okuenda noko Isilayeli. Tyina vehenehike nkhele vekahi vala mondyila, Orpa atokola okukondoka keumbo ko Moabe. Mahi Noemi ankho watokola okukondoka ko Isilayeli, kotyilongo tyae. Oityi Rute atokolele okulinga? Ankho una yokulinga etokolo limwe lialema unene. Okuti makondoka ko Moabe kombunga yae, ine makala na Noemi, inaivi, aende noko Mbelei?—Rute 1:1-8, 14.

⁵ Ombunga ya Rute ankho ikala ko Moabe. Ankho upondola okukondoka kombunga, avemutekula. Ankho wii ovanthu, nelaka, novituwa vio ko Moabe. Noemi kapopilile Rute natyike povipuka ovio ko Mbelei. Noemi ankho walinga otyiho tyokuti hamwe Rute kamakamona omunthu mavelinepe nae ine eumbo apa makakala. Ngotyo Noemi emupopila opo akondoke noko Moabe. Ngetyi tuetyimona, Orpa “akondoka kovanthu vae noko no huku mbae.” (Rute 1:9-15) Mahi Rute atokola okuhakondoka kovanthu vae noko no huku mbomatutu.

6. (a) Etokolo patyi Rute aholovonene nounongo? (b) Omokonda yatyi Boaz apopila Rute okuti walinga ngatyina akaholama mombuelo yomavava a Jeova?

⁶ Tyafuile Rute welilongesa konthele ya Jeova nomulume wae ine o na Noemi. Welilongesa okuti Jeova kekahi ngo no huku mbomo Moabe. Rute wakalele nohole na Jeova iya elilongesa okuti wesukisa okukala nohole na Jeova nokumufenda. Ngotyo Rute alingi etokolo limwe nounongo. Apopila Noemi okuti: “Ovanthu vove mavakakala ovanthu vange, iya Huku yove, makakala Huku yange.” (Rute 1:16) Tyilunda unene omutima wetu tyina tusoka ohole Rute akalele nayo na Noemi. Mahi tyihuvisa vali ohole Rute akalele nayo na Jeova. Tupu atyihuvisa Boaz, konyima emuhilivika etyi ‘atilila momavava a Jeova.’ (Tanga Rute 2:12.) Onondaka Boaz apopia mbutuhinangelesa eilona likahi mombuelo yomavava otyiina. (Salmo 36:7; 91:1-4) Tupu, Jeova walekesa Rute ohole emuyakulila iya emuyambe mokonda yekolelo liae. Rute kelivelele mokonda yetokolo liae.

7. Oityi tyipondola okukuatesako vana velikondola okupakula omuenyo wavo ku Jeova?

⁷ Ovanthu ovanyingi velilongesa konthele ya Jeova mahi vaholovona okuhaholama mwe. Velikondola okulipakula ku Jeova nokumbatisalwa. Inkha noove ongotyo ulitehelela, soka omokonda yatyi ulikondolela. Ovanthu aveho vena huku vaumbila. (Josué 24:15) Ounongo okuholovona okuumbila Huku yotyotyili. Tyina wamelipakula ku Jeova, ulekesa okuti una ekolelo iya makala ondyakulilo yove. Upondola okukukuatesako opo utualeko okumuumbila katyesukisile ovitateka mokala navio. Otyo Huku alingile na Rute.

“KAYEKELEPO JEOVA”

8. Popia onkhalelo Ezekia atekulwa.

⁸ Onkhalelo Ezekia atekulwa yelikalela noya Rute. Ezekia ankho ulinga onthele yelongo lielipakula ku Huku. Mahi haveho ova Isilayeli vatuaileko nekolelo. Tate ya Ezekia Ohamba Akasi, ankho ondingavivi. Ankho utupu onthilo nondyuo ya Huku, iya ahongiliya ovanthu okufenda ono huku ononkhuavo. Akasi wayokele onondenge mba Ezekia, evelingi otyilikutila kono huku mbomatutu. Ezekia wekulilile mononkhumbi.—2 Reis 16:2-4, 10-17; 2 Crônicas 28:1-3.

9, 10. (a) Omokonda yatyi ñgeno ankho Ezekia apondola okunumana? (b) Omokonda yatyi tuhapondola okunumanena Huku? (c) Omokonda yatyi tuhapondola okusoka okuti ombunga yetu oyo ilekesa etyi matukala?

⁹ Ongeleka ombi ya Akasi ñgeno yakalesa Ezekia omukalavi ine okunumana na Jeova. Hono, vamwe valambela movitateka ovitutu vali tyipona via Ezekia vasoka okuti hamwe vena ehunga “liokunumanena Jeova” ine eongano liae. (Provérbios 19:3) Vamwe vasoka okuti ovituwa ovivi viombunga yavo vievelingisa okutyinda omuenyo omuvi ine okulinga ovipuka ovivi ovohe ankho valinga. (Ezequiel 18:2, 3) Mahi okuti otyo otyili?

¹⁰ Omuenyo wa Ezekia walekesa okuti otyo hatyiliko! Kutupu ehunga nalike lipondola okutulingisa okunumanena Jeova. Haeko weetako ovipuka ovivi vimonekela ovanthu. (Jó 34:10) Tyotyili ovohe vapondola okulongesa ovana vavo okulinga etyi tyaviuka ine okulinga ovivi. (Provérbios 22:6; Colossenses 3:21) Mahi otyo katyilekesa okuti ombunga yetu oyo maitulongesa atyiho tuna okulinga. Omokonda yatyi? Omokonda Jeova wetuavela otyiawa tyokuliholovonena, tyihangununa okuholovona etyi uhanda okulinga tyikale otyiwa ine otyivi. (Deuteronômio 30:19) Oñgeni Ezekia aundapesa otyiawa otyo tyakolela?

11. Oityi tyakalesile Ezekia imwe pono hamba mbukahi nawa mo Juda?

¹¹ Namphila tate yae wali imwe po nohamba onondingavivi mo Juda, mahi Ezekia wakalele ohamba imwe ikahi nawa. (Tanga 2 Reis 18:5, 6.) Ezekia waholovonene okuhalandula ongeleka ombi ya tate yae. Mahi waholovonene okutehelela nawa ovauli va Jeova, nga Isaia, na Mikeia, na Oseia. Watehelele nawa onondonga mbavo nomaviyulo. Otyo atyimulundu okusoka unene kovitateka tate yae aetele. Wasukulile ondyuo ya Huku, aiti ku Huku opo aevele ononkhali mbovanthu, ahanyemo ovilolo aviho motyilongo. (2 Crônicas 29:1-11, 18-24; 31:1) Konyima, etyi ohamba yoko Asiria Senakelibe ahandele okulwisa o Jelusalei, Ezekia alekesa okuti una ekolelo iya wakola omutima. Wayumbile onthumbi mondyakulilo ya Jeova iya apameka ovanthu vae. (2 Crônicas 32:7, 8) Otyikando tyimwe Ezekia wakalele nelungavi, mahi etyi Jeova emuviyula, eliolo omutima. (2 Crônicas 32:24-26) Tyotyili, Ezekia ongeleka imwe ongwa tupondola okuhetekela. Kayekele ombunga yae inyone omuenyo wae. Mahi walekesile okuti epanga lia Jeova.

12. Nga Ezekia, oñgeni ovanyingi hono valekesa okuti omapanga a Jeova?

¹² Ovanthu hono mouye ovakalavi, vetupu ohole, iya alo umwe ovana vamwe vekula tyehena ovohe vevehole. (2 Timóteo 3:1-5) Namphila ovakristau ovanyingi hono vatunda monombunga mbuna ovitateka, mahi vaholovona okukala noupanga na Jeova. Nga Ezekia, valekesa okuti ombunga yavo hayoko ivelekesa oñgeni mavakakala komutwe. Huku wetuavela otyiawa tyokuliholovonena, tupondola okuholovona okuumbila Huku, nokumunkhimaneka ngetyi tyalingile Ezekia.

“AME UNO OMUPIKA WA JEOVA!”

13, 14. Omokonda yatyi otyilinga Maliya apelwe ankho tyimoneka ngoti tyalema unene, mahi oñgeni onondaka mba Gabrieli mbemukalesile?

¹³ Etyi palamba omanima omanyingi konyima ya Ezekia, omuhikuena umwe utiwa o Maliya wakalele noupanga omuwa na Jeova iya apewa otyilinga tyimwe tyakolela. Maliya ankho makala omulemi, akutula, iya ekulisa Omona wa Huku! Jeova wakalele nohole na Maliya nokumuyumba onthumbi emuavela otyilinga tyimwe tyihuvisa. Mahi oñgeni akalele etyi tete eiva okuti mapewa otyilinga?

¹⁴ Tuhole vala okupopia konthele yelao enene Maliya apelwe. Mahi oñgeni akalele? Mongeleka oandyu Gabrieli yemupopila okuti makala omulemi namphila ehenelale nomulume. Mahi Gabrieli ahapopi ombunga yae novomunthele yae oñgeni makala omulemi. Oityi mavasoko? Oñgeni mapopila Jose okuti kalalele nomulume omukuavo? Okuhulililako, akala notyilinga otyinene tyokutekula Omona wa Huku! Katwii ovipuka aviho ankho Maliya asukalalele navio, mahi twii etyi alingile etyi Gabrieli apopia nae. Wati: “Ame uno mupika wa Jeova! Tyilingwe kuame ngetyi wapopia.”—Lucas 1:26-38.

15. Omokonda yatyi ekolelo lia Maliya lihuvisa?

¹⁵ Ekolelo lia Maliya ankho limoneka umwe nawa! Ankho wafuapo okulinga kese etyi aitwa ngomupika. Wakalele nonthumbi yokuti Jeova memukuatesako nokumuyakulila. Oñgeni Maliya akalele nekolelo liapama? Onthwe katuatyitilwe nekolelo. Mahi tupondola okukala nekolelo inkha tuliola omutima, nokuita ku Huku opo ayambe ononkhono mbetu. (Gálatas 5:22; Efésios 2:8) Maliya walingile ononkhono mbokupameka ekolelo liae. Oñgeni tutyii? Pahe matutale oñgeni atehelele iya oityi apopile.

16. Oityi tyilekesa okuti Maliya ankho utehelela nawa?

¹⁶ Oñgeni Maliya atehelela. Ombimbiliya ipopia okuti tuna “okukanyauka okutehelela, nokulipulukwa okupopia.” (Tiago 1:19) Maliya ankho utehelela nawa. Ombimbiliya ilekesa okuti watehelele nawa ovipuka eiva, haunene ovipuka elilongesa konthele ya Jeova. Ankho wovola omuvo wokusokolola kovipuka ovio viakolela. Ongeleka imwe, etyi Jesus atyitwa ovanthita avapopila Maliya onondaka veiva koandyu. Konyima, etyi Jesus atuula omanima 12, wapopile otyipuka tyimwe tyahuvisile Maliya. Movikando ovio vivali, Maliya watehelela, ahinangela, iya asoko nawa kovipuka eiva.—Tanga Lucas 2:16-19, 49, 51.

17. Oityi tupondola okulilongesila konkhalelo Maliya apopile?

¹⁷ Oityi Maliya apopile. Ombimbiliya kaitupopila unene konthele yetyi Maliya apopile. Onondaka apopile mbukahi mu Lucas 1:46-55. Onondaka ombo mbulekesa okuti Maliya ankho wii nawa Ovihonekwa viova Hebreu. Ñgeni ngotyo? Onondaka mba Maliya mbelifwa nonondaka mbelikuambelo lia Ana, me ya Samuele. (1 Samuel 2:1-10) Tyafuile Maliya wapopia onondaka mbukahi Movihonekwa ovikando vihungi 20. Tyimoneka nawa okuti Maliya ankho utyihole tyokupopia otyili elilongesa Kepanga liae enene, Jeova.

18. Omononkhalelo patyi tupondola okuhetekela ekolelo lia Maliya?

¹⁸ Nga Maliya, pamwe tupewa otyilinga na Jeova atusoko okuti tyalema. Tuhetekelei ongeleka yae, yokutavela nomutima weliola atukala nonthumbi yokuti Jeova metukuatesako. Tupu tupondola okuhetekela ekolelo lia Maliya tyina tutehelela nawa Jeova, nokusokolola kuetyi tuelilongesa konthele yae nomilao viae. Konyima tupondola okukala nehambu liokupopila vakuetu etyi tuelilongesa.—Salmo 77:11, 12; Lucas 8:18; Romanos 10:15.

19. Tyina tuhetekela onongeleka mbekolelo mbapopiwa Mombimbiliya, onthumbi patyi tupondola okukala nayo?

¹⁹ Tyimoneka nawa okuti Rute, na Ezekia, na Maliya vakalele omapanga a Jeova, ngetyi tyali Abraiau. Ovanthu ovo aveho valinga onthele “mekaka enene lionombangi” tupu vakala nelao liokukala omapanga a Huku. Tupondola okutualako okuhetekela onongeleka ombo mbekolelo. (Hebreus 6:11, 12) Inkha tulinga ngotyo, tupondola okukevelela ondyambi yokukakala omapanga a Jeova apeho!