Tyandyetela Ouwa Okueenda Novanongo

AME NKHELE ndyihinagela outalala umwe neivile momanima amwe okualamba komuhuka, mo Brookings, kokumbili kuo Dakota, ko Estados unidos. Ankho ongandyi ikahi nokuhimbika. Ankho tukahi mongalandya imwe muhena ondyuo itokota, atuho ankho tuaandwa unene. Tukahi popepi neiva limwe liomaande. Yeka nkhele ndyikupopile katutu konthele yomuenyo wange opo unoñgonoke omokonda yatyi tuakalela mongalandya.

OMBUNGA YANGE

Ame natyitwa mu 7 ya Tyitalale yo 1936. Onthue tuatyitwa vekuana, iya ame ndyinkhelo. Onthue ankho tukala mongalandya koutundilo yo Dakota do Sul. Okuundapa mongalandya ankho otyipuka tyimwe ombunga yetu ilinga unene, mahi ankho hatyoko tyakolela vali unene. Ovo tate vambatisalwa avakala Onombangi mba Jeova mo 1934. Mokonda ankho vapakula omienyo viavo ku Jeova, ngotyo okulinga ehando liae ankho otyo tyakolela vali kuvo. Tate yange Clarence, na Alfred titiyu yange, vakalele ovakuatesiko vewaneno (pehepano ñgeno vaihanwa okuti ononkhalamutwe mbo vakulu vewaneno) kewaneno limwe etutu ko Conde okumbili kwo Dakota.

Ombunga yetu apeho ankho yenda komaliongiyo, no momaumbo ovanthu opo vevepopile konthele yekevelelo lihuvisa lio Mbimbiliya maliya komutwe wandyila. Ongeleka yo tate, novipuka vetulongesa vietukuatesako okukala nohole na Jeova. Ame nomphange yange Dorothy, tuakala ovaivisi Vouhamba etyi ankho tuna omanima epandu. Mo 1943 andyihimbika okulinga onthele Mosikola Yovilinga via Huku.

Ovionge vio nonthiki ononthatu no vio nthiki ike ankho otyipuka tyakolela momuenyo wetu. Ame ndyihinangela otyonge tyononthiki ononthatu tyalingwa mo 1949 ko Sioux Falls, kokumbili kuo Dakota. Omukuatate Grant Suiter walingile elongomona liati: “Lietaka Vali Tyipona Etyi Usoka!” Apopi unene okuti Ovakristau aveho velipakula vesukisa okuundapesa omienyo viavo movilinga viokuivisa onondaka onongwa Mbouhamba wa Huku. Konyima, andyipakula omuenyo wange ku Jeova. Ame nambatisalwa motyonge tyalandulako tyo nonthiki onombali mo Brookings, mu 12 ya Kuhuhu yo 1949. Ponthyimbi napopia okuti ankho tukahi mongalandya mutenda unene. Mongalandya oyo omo tuambatisalelwa onthue vekuana.

Konyima andyitokola okukala omukokoli-ndyila. Andyihimbika ovilinga ovio mu 1 ya Kupupu yo 1952, etyi ankho ndyina omanima 15. Ombimbiliya yati: “Una weenda no vanandunge, nae makala nonondunge,” iya mombunga yetu ankho muna ovanthu ovanyingi ovanongo vankhuatesako okukala omukokoli-ndyila. (Provérbios 13:20) Ovikando ovinyingi ankho ndyienda movilinga viokuivisa na titiyu yange utiwa Julius, ankho una omanima 60. Namphila ankho omukulu unene kuame, mahi onthue ankho tutyihole tyokuundapa kumwe movilinga viokuivisa. Ame nelilongesila unene kwe no kounongo wae. Pakala vala katutu Dorothy nae akala omukokoli-ndyila.

OVATALELIPO VOMAWANENO VANKHUATESAKO

Puetyi ndyimukuendye, ovo tate ankho vakonga ovatalelipo vomawaneno no vakai vavo opo vakale nonthue. Ovalinepi vamwe vankhuatesileko unene o Jesse na Lynn Cantwell. Ankho vankhuatesako unene nokumphameka. Tyina vatalelapo ewaneno limwe likahi popepi, pamwe ankho vankhonga opo tuende navo movilinga viokuivisa. Tyotyili, ame ankho ndyityihole tyokukala navo! Ame ankho nahanda okuundapa unene movilinga via Jeova ngavo.

Kovilinga viokutalelapo omawaneno avapingwa nomukuatate Bud Miller. Etyi eya okutalelapo ewaneno lietu nomukai wae Joan, ame ankho ndyina vala omanima 18. Pomuvo opo, andyikelilekesa kotyikundyi tyovanthu vatokola olie una okuenda kotolopa. Ankho vahanda ndyilinge ovilinga vimwe, ame andyisoko okuti kavielikuatele kumwe nomalongeso a Jesus okuhelipake mopulitika. Mahi ame ankho nahanda vala okuivisa onondaka onongwa Mbouhamba wa Huku. (João 15:19) Andyiveiti opo nahalinge ovilinga ovio mokonda ndyimuivisi.

Andyihambukwa etyi Omukuatate Miller amphopila okuti upondola okuenda naame opo akapopie notyikundyi otyo. Omukuatate Miller ankho omunthu umwe ondyandyi, iya utupu owoma novanthu. Ankho wii nawa Ovihonekwa. Atyimphameka unene! Konyima mo 1954, mokonda yeliongiyo olio, avetavela etyi neveita. Ame pahe ankho ndyipondola okuundapela vali unene Jeova.

Konyima, andyikongwa opo nkhaundape mo Mbetele. Andyipewa otyilinga tyo kuundapa mongalandya yo Torre de Vigia ikala ko Staten Island, mo Nova York. Andyuundapa-mo omanima etatu. Omuvo umwe nahamalimbwa mokonda naundapa novakuatate nomphange ovanongo.

OKUUNDAPA MO MBETELE

Mongalandya yoko Staten Island ankho omo muundapela olalio itiwa WBBR. Yaundapeswa no Nombangi mba Jeova okuhimbikila menima lio 1924 alo 1957. Mo mbunga Yombetele ovanthu vaholovonwa opo vaundape kongalandya ankho vena 15 ine 20. Ovanyingi ankho ovakuendye, vehena ounongo. Mahi ankho tuundapa nomukuatate umwe omulembulwa, utiwa Eldon Woodworth. Ankho ututala vala ngo vana vae, iya etulongesa ovipuka ovinyingi. Pamwe tyina tuna otyitateka poyetu, Omukuatate Woodworth uhole okupopia okuti: “Tyihuvisa okutala etyi Tatekulu alinga novanthu aundapesa.”

Omukuatate Frederick Franz nae ankho ukala mongalandya iya wakuatesileko ovanthu ovanyingi. Ankho omunongo iya ankho wii nawa Ombimbiliya. Iya ankho usuka na kese umwe ponthue. Omuteeki wetu ankho o Harry Peterson. Ankho tyetupepukila okumuihana enyina olio tyipona okumuihana okuti Papargyropoulos. Nae ankho omulembulwa iya ankho uhole unene ovilinga viokuivisa. Omukuatate Peterson ankho ulinga nawa otyilinga tyae mo mbetele, mahi tupu apeho ankho wenda movilinga viokuivisa. Kese hanyi ankho waava omikanda ominyingi. Tupu nae ankho wii nawa Ombimbiliya, iya ankho ukumbulula omapulo aeho tumulinga.

NELILONGESILA KO NOMPHANGE OVANONGO

Kongalandya tupu ankho tulingila ombunga yo Mbetele onosumu, novinyango no nombi. Ankho tuna ovilinga ovinyingi. Ankho ndyiundapa nomphange umwe wii nawa ovipuka utiwa Etta Huth. Ankho walinga omphangu imwe apa ankho tupongiyila ovinyango no nombi. Oe ankho utupopila oñgeni tuna okulinga osumu. Onomphange mbumwe ankho vakala popepi veya okutukuatesako iya omphange Etta, ankho uvepopila oñgeni vena okuundapa. Namphila Etta ankho ei nawa otyilinga tyetu, mahi apeho ankho utavela kovakuatate vahongolela ovilinga mongalandya. Wetuavela ongeleka imwe ongwa.

Umwe po nomphange ankho uya okukuatesako ko ngalandya o Angela Romano. Etyi anoñgonoka otyili Etta emukuatesako. Ame na Angie tuelinepa mu Tyikukutu yo 1958, onthue tuaumbila Jeova kumwe mokueenda kuomanima 58. Mokueenda kuomanima oo, oukuatyili wa Angie mu Jeova wapameka otyinepo tyetu. Ame ndyimuyumba onthumbi, katyesukisile ovitateka patyi tunavio.

OTYILINGA TYO UMISIONALIU NOTYO KUTALELAPO OMAWANENO

Etyi ovakuatate valandesa ongalandya mo 1957, ame andyikaundapa ko Mbetele yoko Brooklyn. Etyi tuelinepa na Angie, atutundu mo Mbetele. Mokueenda kuomanima etatu, atukala ovakokoli-ndyila popepi naapa ankho pakala ongalandya yombetele. Andyiundapela ovanthu valandapo olaliu yetu pahe ankho veiluka okuti WPOW.

Ame na Angie ankho tuatyinda omuenyo wapepuka, ankho tuhanda okukaundapa oku kuesukisa vali ovaisi. Mokonda yotyo, mo 1961 atukongwa opo tukale ovakokoli-ndyila vavilapo Mepunda-umbo lio Falls ko Nebraska. Mahi etyi tuehikako, atukongwa opo tulinge Osikola Yovilinga Viouhamba, kokumbili kuo Lansing ko Nova York, atukalako ohanyi ike. Onthue ankho tuahambukua unene netyi tualongeswa mosikola oyo, iya etyi yapua ankho tusoka okuti matukondoka ko Nebraska. Mahi atutumphuluka unene etyi tuapewa otyilinga otyikuavo. Atutumwa ko Cambodia opo tukakale ono misionaliu! Otyilongo tyimwe otyiwa tyikala koutakelo wa Asia, atumono, nokulia ovipuka ovipe ankho tuhei. Onthue ankho tuhanda okupopila ovanthu aveho onondaka onongwa Mbouhamba.

Mahi mokonda ko Cambodia ankho kuna ovitateka vio pulitika, onthue atutumwa koutakelo wo Vietnam. Etyi palamba omanima evali andyivele unene, atukondoka ko Estados Unidos. Ankho nesukisa omuvo opo ndyikale nawa. Etyi nakala nawa atukala vali ovakokoli-ndyila.

Mu Tyitalale yo 1965 tuehimbika ovilinga viokutalelapo omawaneno. Mokueenda kuomanima 33, ame na Angie tuaundapa nehambu movilinga viokutalelapo omawaneno novio distritu, tupu nokukuatesako ovionge vio nonthiki ononthatu. Ame ankho ndyihole unene ovilinga ovio, namphila pomuvo wo vionge ndyikala novilinga ovinyingi. Ovionge ovinyingi tuevilingila kotyipembe tyokusanena ombola tyitiwa Estádio Ianque.

TUAKONDOKA KO MBETELE NOMO NOSIKOLA MBA HUKU

Ame na Angie tuapewa ovilinga ovinyingi vipuilisa. Mo 1995, andyiitwa opo ndyikalongese Mosikola Yovilinga Viokuivisa. Etyi palamba omanima etatu, atuihanwa ko Mbetele. Tunde apa natunda mo Mbetele ankho palambale omanima 40, andyihambukwa unene etyi nakondoka mo Mbetele, omu nehimbikile ovilinga viange viomuvo auho. Mokueenda kuomanima, naundapa Moseketa Yovilinga tupu nalongesa mo nosikola ononyingi. Mo 2007, Ononkhalamutwe mbo Nombangi vaonganeka Oseketa yo Nosikola, pala okuhongolela onosikola ambuho mbulingwa mo Mbetele. Iya mokueenda kuomanima omanyingi, ame ankho ndyihongolela oseketa oyo.

Momanima ano, kualingwa omapiluluko amwe omanene mo nosikola mbo Mbetele. Mo 2008 akuhimbika Osikola Yovakulu Vewaneno. Etyi palamba omanima evali, ovakulu vewaneno vena 12.000 avalongeswa mosikola oyo ko Patterson no ko Mbetele yo ko Brooklyn. Onosikola ombo pahe mbulingwa kovilongo ovikuavo. Mo 2010 enyina Liosikola Yovilinga Viokuivisa alipilululwa alikala Osikola Yombimbiliya yo Vakuatate Vahanepele, tupu akuonganekwa osikoka omphe itiwa, Osikola Yombimbiliya yo Vakristau Ovalinepi.

Mu Tungonkhe yo 2014, onosikola ombo onombali ambuhonyekwa aikala vala ike iihanwa okuti Osikola Yovaivisi Vouhamba wa Huku. Pahe kosikola oyo kuenda ovanthu aveho tyilinge vana vanepa ine ovakuendye no nomphange vahanepelwe. Ovakuatate ovanyingi mouye auho avahambukwa okunoñgonoka okuti osikola oyo mailingwa movilongo viavo. Otyo tyihangununa okuti ovanthu ovanyingi mavakala nomphitilo yokuenda monosikola ombo. Andyihambukwa unene okunoñgonoka ovanthu ovanyingi valinga omapiluluko momuenyo wavo opo valambele mo nosikola ombo.

Pamwe ndyisoka kovipuka viaenda momuenyo wange, okuhimbikila monthiki nambatisalwa momaande ana atenda unene. Ndyipandula unene Jeova wankhuatesako okunoñgonoka ovanthu ovanongo. Ovanthu ovo aveho vankhuatesako okunoñgonoka Jeova, nokumuumbila nawa. Vamwe ankho ovana vali kuaame, iya ovakuavo ankho ovakulu vali kuame. Ovanyingi vatunda kovilongo vielikalela notyange, tupu ankho vasoka monkhalelo yelikalela no yange. Mahi vehole unene Jeova ankho tyiimbukilwa kovipuka vasoka nevi valinga. Ndyipandula unene Jeova mokonda yomapanga ovanongo nakala nao, vandongesa ovipuka ovinyingi.